Monday, August 15, 2005

சில ஆங்கில நூல்கள்

இந்தியப் பதிப்புகளாக முக்கியமான, ஐரோப்பிய சிந்தனைக் களம் சார்ந்த சில நூல்கள் தற்போது வெளிவந்துள்ளன. எல்லாம் பத்து/இருபது ஆண்டுகளுக்கு முன் வெளிநாட்டுப் பதிப்புகளாக வெளிவந்தவை.
இந்த வரிசையில் சிலவற்றைப் பரிந்துரைக்கிறேன்:
1. Cinema1, Cinema 2: Gilles Delueze; Rs250;Rs.295 ;
2. Jazz Writings: Philip Larkin; Rs. 195;
3. Violence and the Sacred: Rene Girard; Rs.295;
4. Aesthetic Theory: Theodore Adorno; Rs 395;
5. Criticism and Truth: Roland Barthes; Rs.95;

இன்னும் தெரிதா, ஹைடக்கர், பதேல் எல்லாம் உண்டு. அனைத்தும் இந்தியப் பதிப்பில் இவ்வளவு குறைந்த விலையில் (100-300ரூ) கிடைப்பது மகிழ்ச்சியாக உள்ளது. Continuum Impacts, Changing Minds என்ற தொடர்வரிசையில் இப்புத்தகங்கள் வெளியாகின்றன. விடுப்போர்: Viva Books Pvt Ltd
4263 Ansari Road, Daryanganj, New Delhi, 110002;
சென்னையில் லேண்ட்மார்க்கில் எல்லாம் கிடைக்கின்றன.

Sunday, August 14, 2005

ராஜாவும் ஜோக்கர்களும்

(ரோசா வசந்த் ஒரு நல்ல விவாதத்தை ஆரம்பித்து வைத்திருக்கிறார். அதில் மறுமொழியாகப் போட்டது. எனக்காக சேமித்து வைத்துக் கொள்ள இந்தப் பதிவு. ரோவ பதிவில் படிக்கவும். பலரது முக்கியமான கருத்துக்களும் உள்ளன).


முக்கியமான பல கருத்துகளை சொல்லிக்கொண்டிருக்கிறீர்கள். நிறைய நானும் ஒத்துக்கொள்ளும் விதயங்கள்தான். முக்கியமாக ஞானி, ராஜாவின் அரசியலைப் பற்றி உளறிக்கொட்டி தன் நல்ல பல அரசியல் செயல்பாடுகளையும் முட்டாள்கள்கூட கேள்விகேட்கும்படி தன்னைத்தானே எக்ஸ்போஸ் செய்து கொண்டது. சாரு தன் அறிவுப்புல இயக்கத்தைத் தக்கவைக்க இண்டர்நேஷனல் புரொடஸ்ட்டுகளை தமிழகத்துக்கு ஒட்டுப்பதியன் போட முயன்று அடித்துக்கொள்ளும் செல்ப் கோல்கள். விமரிசனங்களோடாவது நாம் ஏற்றுக்கொள்ளக் கூடியவர்கள் என்று நினைப்பவர்களே இன்றைக்கு தமிழகச் சூழலில் தாமே தம் முதுகில் shoot here என்று புல்ஸ் ஐ வட்டங்களை வரைந்து கொண்டு திரிகிறார்கள். அப்படியே சமுதாயத்தை கைபடாமல் நிலத்தோடு பெயர்த்தெடுத்து பத்தாம் பன்னிரண்டாம் நூற்றாண்டு சோழப் பேரரசுப் பெருங்கோயில் கலாச்சாரத் தீவிற்கு கொண்டுபோய் சிறைவைக்க திட்டம் போட்டு நடக்கும் அரசியல்-கலாச்சார இயக்கங்களுக்கும் அவற்றின் தொண்டர் படைகளுக்கும் கன குஷிதான். ராஜா சொல்வதில் முக்கியமானது அவர் இருபத்தைந்து வருடமாக சொல்லிவரும் " இருப்பதே ஏழு சுரங்கள். அதை வைத்துத் தான் மக்களை ஏமாற்றிக்கொண்டு இருக்கிறேன்" என்பதும்," எனக்கு தியாக ராஜர் கிருதியும், நாய் குறைப்பும் ஒன்றுதான். எல்லாவற்றிலும் இசை இருக்கிறது" என்பதும் தான். இதுதான் ராஜாவின் சாரம். நம் எழுத்தாளர்களெல்லாம் எங்களது சிருஷ்டியாக்கும், தானாக எழுத வருது, எல்லாம் சாமி கடாட்சம் என்ற ரீதியில் பினாத்திக் கொண்டிருக்கும் போது இதைவிட ஒரு கலைஞன் எப்படி தன் "சிருஷ்டி" ரகசியத்தைப் போட்டு உடைக்க முடியும். அய்யா இதையே அய்ரோப்பிய வடிவஇயல்வாதிகள் இலக்கியம் ஓவியம் இசை என்பதில் manifesto போட்டு ஒரு நூறுவருஷம் செயல் பட்டு அதுவே semiotics என்றெல்லாம் மாறி கல்விக்கூடங்களின் ஆராய்ச்சி பார்மால்டிஹைட் இறுக்கங்களாக மாற்றி கன காலமாச்சு. அதை இப்படி கண்ணெதிரே ஒரு கலைஞன் தமிழகத்து மக்கள் அத்தனை பேருக்கும் ரசித்து லயிக்குமாறு எல்லா எல்லைகளையும் காட்டியிருக்கிறான். இதைவிட இந்த அறிவு ஜீவிகளின் பன்னாடை எதிர்க்கலாச்சாரம் சாதித்து விடுமாக்கும்? நடப்பு உலகத்தில் சுற்றிவர இருப்பதை வைத்துச் சிந்திக்காமல் சும்மா தெரிதா விட்கன்ஸ்டைன் என்று உதிர்த்துக் கொண்டு ஒரு தலைமுறைக்கு அப்புறம் இந்தக் காலத்து இளைஞர்கள் எல்லாம் சரியில்லை. இவர்கள் கால் சென்டருக்குத்தான் லாயக்கு. எல்லாம் திராவிட அரசியல்-கலாச்சார சீரழிவால் வந்தது என்று 60 களின் சிறுபத்திரிக்கைச் சிந்தனைச் சிக்கலை இப்போது இடம்பெயர்த்துக் கொண்டு இருக்கிறார்கள். சிந்தனையாளர்கள் சிந்திக்க வேண்டும். கழுதை பொதி சுமப்பது போல அது இயல்பாக நடக்கவேண்டும். தம்மைத் தாமே ரேஸ் குதிரைகளாக நினைத்துக் கொண்டிருந்தால் இன்னும் பத்தாண்டுகால மாயாவாதப் புலரி விடியும்போது எல்லோரும் நரியாக லாயங்களை விட்டு ஓடவேண்டியதுதான்.

ஏனிந்து, நாநு ஹேளலாரே ...2

Art is a harmony parallel to nature - Cezanne



Mondrian felled by a formalist masquerade

- A play featuring the Motif Anonymous
ஏனிந்து, நாநு ஹேளலாரே ...

Friday, August 12, 2005

pick me up

எல். ஆர். ஈஸ்வரி, டி எம் எஸ் கூட்டணியில் இன்னொரு கலக்கல் பாடல். அருமையான ரிதம் கிடார். ஆரம்பித்ததில் இருந்து முடியும் வரை வேகம் குறையாமல் தெறிக்கும் பாட்டு.
வாரக்கடைசியில் சோர்ந்துபோய் வந்து காலையில் விட்டுப்போன தினத்தாளைப் படிக்கும்போது கேட்க ஏதுவான படலாக இருக்கிறது. Enjoy.
http://www.musicindiaonline.com/p/x/H5fgG-vV2dNvwrOupt7D/

Wednesday, August 10, 2005

1984

இந்திரா காந்தி இறந்தவுடன் நாடு முழுவதும், முக்கியமாக டெல்லியிலும் சீக்கிய இன மக்களுக்கு எதிராக பெரும் கலவரங்கள் நிகழ்ந்தன. டெல்லியிலிருந்து வந்து எங்களுடன் படித்துக்கொண்டிருந்த தமிழ் நண்பன் கலவரம் நடந்த போது அங்கேதான் இருந்தான். அவன் திரும்பி வந்து தன் கண்ணால் கண்ட பல நிகழ்சிகளைச் சொன்னபோது எத்தகைய ஒரு நாடு நம்முடையது என திகைக்காமல் இருக்கமுடியவில்லை. சீக்கிய மத மக்களை கும்பல்கள் நடுத்தெருவில் எரித்துக் கொண்டிருந்தபோது நாட்டின் ராணுவம் கவசவாகனங்களில் வீதிகளில் சும்மாதான் நிறுத்தப் பட்டிருந்தது. செயல் பட ஆணை இல்லை. அரசு இயந்திரம் தனது தலை நகரிலேயே செயல்படாமல் முடக்கிவைக்கப்பட்ட காலம் அது. இப்போது நானாவதி விசாரணைக் கமிஷன் இத்தனை காலம் கடந்தாவது விசாரணை அறிக்கை என்ற பெயரில் ஒரு ஆவணம் கொடுத்திருக்கிறது. அதன் மேல் தக்க நடவடிக்கை எடுக்கும்படி எதிர்கட்சிகள் அரசை இரண்டு நாட்களாக வற்புறுத்துகின்றன. நாடாளுமன்றத்தில் விவாதம் தொடர்கிறது. இந்திய ஜனநாயகத்தின் பலம் சாதாரண மக்கள் அதில் கொண்ட நம்பிக்கைதான். நாள்கணக்கில் இனப் படுகொலைகள் நடந்தாலும் அதை அரசு பலவருடங்கள் கழித்தும் அலட்சியப்படுத்தும் என்பது அந்த நம்பிக்கையின் அஸ்திவாரத்தையே அசைப்பதாகும்.

Tuesday, August 09, 2005

நூல் அறிமுகம்

பன்னிரண்டு கதைகள். சிறு சிறு கதைகள். நூறே பக்கங்கள். ஒருகதை சராசரியாக ஏழு பக்கம். ஒரு கதையைப் படிக்க ஐந்துமுதல் பத்து நிமிடங்கள் ஆகலாம். அப்புறம் அரைமணி நேரம் ஒன்றும் செய்ய முடியாது. தமிழகத்தின் கடந்த நூற்றாண்டின் சரித்திரம் இருக்கிறது. தமிழ்ச் சிறுகதை நடையின் எல்லையில் இணையத் தாத்தாக்கள் எல்லாம் இல்லை. படித்தால் தெரியும். தமிழ்ச் சிறுகதையில்
மிகச் சிறந்த தொகுப்புகளில் ஒன்று.

ரோபோ என்றொரு கதையிலிருந்து:

"
.......
குருஸ்வாமியின் குறிப்பாணை:

புதிய வரவின் பெயர் முக்தா என்று மாற்றப்படுகிறது - வர்ணம் பொற்கொல்லர்- விஸ்வகர்மா என்றே பதிவு செய்யப் பட வேண்டும். வர்ம முறையில் தற்காப்புக் கலைப் பயிற்சி பெற்றவன். நாட்டிற்கெதிரான நூல்களை மறக்கச் செய்யும் துறையில் வேலை. பத்திரிக்கை-சிறு பத்திரிக்கைகளை கண்காணிக்க வேண்டும். நமது முன்னோர்கள் இந்த நாட்டின் வேதகால ரிஷிகள் தாம் என்பதையோ, இந்த நாட்டின் மதம் கங்கைக்கரையில் தான் தோன்றியது என்பதையோ மறுத்துப் பேசுவோரை அடையாளம் காணவேண்டும். அவர்களை எதிரிகளாகப் பார்க்கவேண்டும். மிரட்டல் அவசியம். சம்பளம் திறமையைப் பொறுத்தது -அடிக்கடி மாறும். பிறவிஷயங்களை ராமாநந்த ஆசாரியரிடம் கேட்டுத் தெரிந்து கொள்ளலாம். தாய்பாஷையைத் தவிர தேவ பாஷயை கற்றுத்தீர வேண்டும்.
"
........
"துளசி மருத்துவச் சத்து மிகுந்தது என்று விஞ்ஞானம் சொல்கிறது"
"அதனால்தான் நம் முன்னோர் அதை கடவுளுடன் சேர்த்தார்கள்"
"நாளக்கு இன்னொரு விஞ்ஞானி துளசியைத் தொடர்ந்து பயன் படுத்தினால் ஒரு குறிப்பிட்ட நோய் வருமென நிரூபித்தால்..."
"அதனால்தான் ருத்ரன் துளசியை சேர்த்துக் கொள்வதில்லை. விஞ்ஞானம் மாறும்- மதம் மாறாது"
............................

மேலாளர் கோவிந்தா விடுப்பின் காரணத்தை வினவ "முத்தாரம்மன் கோவில் பூசனை" என்று பதில்.
......
இது நமது நெறிமுறைக்கு இழுக்கானதால் "முத்தம்மாளாவது ஜக்கம்மாளாவது. இந்த இடத்தில் சுலோகம் படி-தெரியாவிட்டால் சொல்லித்தருகிறேன் விடுப்பு கிடையாது" என்று கூற முக்தா அவரை நோக்கி ஓரடி வைக்கவும், "முக்தா -நில்" என்று எச்சரித்து இருக்கிறார்.
அதற்கு அவன் " என் பெயர் முத்துக் கறுப்பன். அம்மனைப் பற்றியோ பூசனை பற்றியோ இன்னும் ஒரு வார்த்தை பேசினால் எலும்புகள் இடம் பெயரும்" ...

மறக்கப் பட்ட இந்த அ-தயிர்வடை எழுத்தாளர் மா. அரங்கநாதன்.

நூல்: காடன் மலை
ஆசிரியர்: மா. அரங்கநாதன்
தாமரைச்செல்வி பதிப்பகம்
31/48 ராணி அண்ணா நகர்
சென்னை - 6000078
அக்டோபர், 1995
விலை: 20 ரூ

Saturday, August 06, 2005

தமிழரின் அக்காலம்


இன்று ஹிந்துவில் நான் சிறுவயதில் விளையாடி வளர்ந்த ஒரு ஊரைப்பற்றி வந்திருக்கிறது. பின்னால் விரிவாக எழுதுகிறேன்.

முன்பு ஒரு பதிவில் எழுதிய இந்தக் கதைகூட இவ்வூரின் நினைவுகளில் எழுதியதுதான்.


இங்கே சென்று பதினைந்து ஆண்டுகள் ஆகிவிட்டன. சீக்கிரம் போக வேண்டும்.

Thursday, August 04, 2005

அயற் படுகை - 3

Image hosted by Photobucket.com முத்திசைநோக்கு மாகலன் மீகாமன் மதவயன் என்ற மயன் தன் மகளே இந்த வான்தாக்கு ஓட்டத்திற்கு சரியான ஆள் என்று நினைத்தார். ஆனால் கிவிரா குழந்தைகளுடன் தளம் ஏழுக்கு விரைகிறாள். திட்டம் புரியவில்லை. மிதவைகளை எப்படியும் பெரோ காப்பாற்றியிருப்பான். ஏன் இவர்களுக்குள்
ஒத்துப் போவதில்லை? ஒரே தலைமுறையில் இத்தனை மாற்றங்களா? அவள் அம்மா இருந்தால் இதைப்பார்த்து என்ன நினைப்பாள்.
" கலனில் அமர்ந்து கனவுகாணாதே மயன். நீதான் நடு"
"ம்ம். ஆம். நன்றி. இடதும் வலதும் யார் "
" கவி, பிரன்"
"ஹ. சரியாப்போச்சு"
மிகுமூவர் என்றழைக்கப்படும் கவி-மயன்-பிரன் கூட்டுதானா மறுபடியும்.
"மயன், கவி. இது பிரன். உயரலாமா?"
"இது கவி. உடனே உயருங்கள். திரிபுரச் சமர் நினைவிருக்கட்டும்"
"அதேதான் நானும் நினைத்தேன். பாசாண்டர்கள் வீழ்வதில்லை"
மூன்று கலன்களும் வளையைவிட்டு கண்ணிமைக்கும் வேகத்தில் வானில் உயர்ந்தன.
மனிதர்களின் பறப்பிகள் தரைக்கு மிக அருகில் தாழப் பறந்து கொண்டிருந்தன. உருவுக்குண்டுகளை உயரத்தில் இருந்து சரியாக இயக்க முடியாதுபோல்
இருக்கிறது. மேலே வெகு உயரத்தில் இருந்து உணர்பொறிகளை இயக்கினர் மிகுமூவரும். ஒரு மனிதப் பறப்பி படு வேகமாய் விலகி உவர்குன்றுகளை
நோக்கி விரைந்தது. மற்றொன்று அதற்குள் இரண்டு உருவுகளை தரையில் செலுத்தி விட்டது.

"கவி. குன்றுகளில் மறையும் அப்பறப்பியை கவனி. நாங்கள் இந்த ஒன்றைப் பார்த்துக்கொள்கிறோம்"
கவி பிரிந்து குன்றுகளை நோக்கிச் சரிந்தான்.
மயனும் பிரனும் ஒத்திசைந்து செலுத்திய கற்றைகள் பறப்பியை அலைத்தன. கணத்தில் சிதறியது அது.
உருவுகள் அதற்குள் தரையைத் துளைத்து விட்டன. வளை வாயில் வெடித்து மண்மூடியது.
"கவி. வளை மூடிவிட்டது. பறப்பி என்ன ஆயிற்று?"
"குன்றுப் பாறை அளைகளில் ஒன்றில் ஒடுங்கிவிட்டது மயன். உணர்ந்து கொண்டிருக்கிறேன். ஒரு நிமிடம் "
"நாங்களும் சேர்கிறோம் கவி. இதோ "
மயனும் பிரனும் கலன்களை உவர்குன்றுகளுக்கு மேல் சரித்தனர்.
Image hosted by Photobucket.com "அளையை உணர்ந்து விட்டேன் மயன். அங்கே விரைகிறேன். இடக்குறி எண்கள் இதோ "
அவ்எண்களின் இடத்தை அடைய ஐந்து கல் தொலைவில் இருக்கும்போது மயனும் பிரனும் கவியின் கலன் நிலைபிறழந்து தரைநோக்கி வீழ்வதைக் கண்டார்கள். அழைப்புகளுக்கு கவியிடம் இருந்து பதில் வரவில்லை. கவியின் கலம் தரையில் முட்டித்தெறித்தபோது சூழ குன்றுகளில் காணும் நூற்றுக்கணகான அளைகளில் ஒன்றில் புறக்கதிர்கள் அணைந்தன. பறப்பியை விட்டு வெளிவந்து அளையின் தரைப் பாறைகளில் தாவி அமர்ந்த அந்த மானிடப்பெண் வெளியே பார்த்தபோது பரனும் மயனும் கலன்களை தன் அளையை நோக்கித் திருப்புவதைக் கண்டாள்.

Friday, July 29, 2005

அயற் படுகை -2

Image hosted by Photobucket.com
குழந்தைகளை கிவிரா சென்று அடைந்தபோது அவர்கள் தூங்கிப் போயிருந்தார்கள். பெரோ கூப்பிடுவதாகத் தெரியவில்லை. நிகழ்கலன் தொடர்பு முற்றுமாக அற்றுவிட்டது. போர்க்காலத்தில் இதற்குமேலும் நிலத்தின் மீதிருப்பதில் நம்பிக்கையில்லை. துளைவியின் சக்தியை சரிபார்த்துக் கொண்டாள். குழந்தைகளை பின்னால் படுக்கவைத்து கட்டினாள். இரண்டு நாளுக்கான உணவை திணித்தாள். துளைவியை மித வேகத்தில் செலுத்தினாள். அது சற்று தூரம் நெளிந்து சென்றதும் புல்புதர்களுக்குள் புகுந்தது. அருகிலிருந்த வளையை உடனே கண்டுபிடித்து உள்ளே துழாவி இறங்கியது. முற்றிலும் வளையினுள் மறையுமுன் மனிதப் பொறிகள் மேலே வானத்தில் அலைவதைக் கண்டாள். துளைவி வளையினுள் விரைந்தது.

"பெரோ..?"
"பெரோ எங்களுடன் இல்லை மனோ. நான் நிலைத்தளம் நான்கின் அருகில் இருக்கிறேன். பெரோ படுகையில் குறிப்பிகளைச் செப்பனிடப் போனான்."
"தெரியும் கிவிரா. தொடர்பு கொண்டால் சொல். அவன் நிகழ்கலன் இயங்குவதாகத் தெரியவில்லை. கவலைப் படாதே. பிறகு அழைக்கிறேன்"

தளம் நான்கில் அப்பாவை பார்க்கமுடியுமா தெரியவில்லை. மிதவைகளில் ஒன்றைக் காணவில்லை என்று நேற்றே அழைத்துச் சென்றுவிட்டனர். இருக்கும் நிலையில் மிதவைகளை இழந்தால் மனிதர் ஓரிரு நாட்களில் நம்மை எலிகளைப்போல வளைகளை விட்டு கிளப்பி வேட்டையாடித் தீர்த்து விடுவார்கள் என்று அப்பா அம்மாவிடம் பயமுறுத்திக் கொண்டிருப்பார்.
இப்போது ஒரு மிதவையை மனிதர் பிடித்து விட்டால் ...

Image hosted by Photobucket.com


"கிவிரா..? அப்பா"
"நல்ல வேளை. நானே கூப்பிட இருந்தேன். நாலில்தானே"
"இல்லை. ஒன்றில்"
கிவிராவின் முகம் வெளிறியது
"ஒன்றிலா... அப்பா."
குழந்தைகளை ஒருகணம் பார்த்துக்கொண்டாள்.
"கிவிரா பயப்படாதே. மூன்று பேர் செல்கிறோம். இரண்டே பரப்பிகள் மேலே உருவுகுண்டுகளை இடையின்றி வெடித்துக் கொண்டிருக்கிறார்கள். அணைத்து விட்டு வருகிறோம்"
"அப்பா. பார்த்து"
" ......"

நாலில் பத்து பதினைந்தே குடும்பங்கள் இருந்தனர். சக்திப் பெருப்பிகள் இன்னும் இயங்கிக் கொண்டுதான் இருந்தன. துளைவி கூட்டில் அடைந்ததும் குழந்தைகளைத் தூக்கிக் கொண்டு குதித்தாள். நீரமா இரண்டு குறுநாய்களோடு நின்று கொண்டிருந்த்தாள்.
"கிவிரா. விரைந்து வா. ஏழுக்கு எல்லோரையும் கொண்டு சொல்ல முழுக்கள் காத்திருக்கின்றன".

Thursday, July 28, 2005

அயற் படுகை

Image hosted by Photobucket.com மிதவைகள் ஒவ்வொன்றாக இறங்கிக் கொண்டிருந்தன. மறையும் சூரியனின் இள நீலக்கதிர்களில் குறிப்பிகளின் திசைகளைச் சரியமைத்துக் கொண்டிருந்தான். திரும்ப கிவிரா வருவாளா எனத் தெரியவில்லை. எதை விட்டுக் கொடுத்தும் அவளுடன் வாழ இனிமேல் முடியாது என
தெளிவாகி விட்டது. இன முட்டைகளை விற்றாவது வாங்கக் கூடிய பொருள் ஒன்று இருப்பதாக அவளுக்குத் தோன்றியதை நம்பவே
முடியவில்லை. சம்பவங்கள் அடுத்தடுத்து யாரோ திட்டமிட்டதைப் போல் நடந்து விட்டன. கையின் பிசுக்குகளை பஞ்சுத் திரட்டில் துடைத்து
எழுந்தான். குறிப்பிகள் சரியாக இயங்காமல் இரு மிதவைகள் ஏறக்குறைய இடித்துச் சிதறும் நிலையில் நேற்று கடந்தன. மீகாமர் கழகம் அச்சுறுத்தும் தகவலறிக்கை ஒன்றை பணிமனைக்கு அனுப்பியது. வயதானாலும் தானே வரவேண்டியது என்ன விதி என்று நினைத்துக் கொண்டான்.

"நகரங்களில் போர் தொடர்கிறது. உணர்விகளை முற்றிலும் செயலிழக்கச் செய்த பெய்கதிர் வளையம் இன்னும் நீக்கப் படவில்லை. நாளை நிலமை தெளிவாகும் என காப்பமைச்சர் உதவியாளர் தெரிவித்தார் ".

வானொலியை அணைத்துப் பையில் போட்டுக் கொண்டான். நிகழ்கலனில் கிவிராவின் அலைவரிசையை சோதித்தான். கர்கர்ரென்று வெள்ளை இரைச்சல்தான் கேட்டது. மூன்று மணி நேரம் குறிப்பிகளுடன் போராடிய வலி கால்களில் உறைத்தது. ரத்தம் பாய்வதற்காக இருமுறை காற்றில் உதைத்தான். காலங்கியின் பையிலிருந்து கீழே விழுந்து காசு ஒன்று உருண்டோடியது. மன்னனின் தலை பதித்த தங்கக் காசு.

பிடிக்கத் தாவினான். நிகழ்கலன்தொடர்புக்கு அலறியது. காசில் பார்வையை வைத்துக்கொண்டே கலனை அமுக்கினான்.

"பெரோ?"
"ஆம்"
"உடனடியாக அங்கிருந்து விலகு. மிதவைகள் அனைத்தும் இறங்கியாயிற்றா?"
"எல்லாம் இறங்கி விட்டன. என்ன ஆச்சு மனோ"
"அகன்று விடு பெரோ. இது ஆணை."
Image hosted by Photobucket.com
தொடர்பு உடனடியாகத் துண்டிக்கப்பட்டது. சாதனங்களைத் திரட்டி அடப்பத்தில் அடைத்தான். நிகழ்கலனின் மின்தொடர்பை நீக்கினான். அடப்பத்தை முதுகில் மாட்டி இறுக்கினான். இடமிருந்த பாறையைக் குதித்துக் கடக்கத் தாவும் தாவலில் காசை கைப்பற்றினான். வளையை அடைய இன்னும் இருநூறு அடிகளே இருந்தன. மனிதர்களின் விரைப்பறப்பிகள் நான்கு தலைக்குமேல் அவனைச் சூழ்ந்தன. அவைகளின் வெடிப்பிகள் எளிதில் அவனைஉணர்ந்து குறிவைத்து இயங்கின. கலன்களை இறக்கி மனிதர் நால்வர் வெளிப்பட்டு பெரோவின் மிச்சங்களையும் அடப்பத்தையும் பற்றித் திரும்பினர்.




...

Tuesday, July 26, 2005

POP - ஒரு கலந்துரையாடல்

Image hosted by Photobucket.com

Image hosted by Photobucket.com

Image hosted by Photobucket.com

Image hosted by Photobucket.com

Image hosted by Photobucket.com

Image hosted by Photobucket.com


"விடுத்த சரம் வென்றவியும்
தொடுத்த நிணக்குருதி போல்
பரத்துப் படர்ந்தலையும் இப்பேராறு
பெய் மழையின் நிலம் பறிக்குமமிலக்
குழைபற்றி யெழுகடற் புட்கள் ...."

வந்து வீட்டு முற்றத்தில் நெல் கொத்தும் போதே நினைத்துக் கொண்டான். இன்றாவது முறத்தில் சரியாக ஓட்டை போட்டுக் கொடுத்து விட்டால், பையனே பிடித்து விடுவான்.

Thursday, July 21, 2005

இ.தி- 45

Image hosted by Photobucket.com


" மாண்டீ ஒளிஞ்சிருந்த வளையைக் கண்டுபிடிச்சாச்சு. ஓடிவாங்க".


Bye, bye and thanks for everything Monti. Take care. Be back when you feel like.

Monday, July 18, 2005

புத்தி இல்லாமல் ஒரு பதிவு

Image hosted by Photobucket.com நேற்று வாங்கியதிலிருந்து கேட்டுக்கொண்டே இருக்கிறேன். பல இடங்களில் கண்ணில் நீர் வரச்செய்த இசைத்தட்டு. மாணிக்கவாசகர் ஒருபுறம். இசை ஒரு புறம். அப்பனைப் பாடியாச்சு. இனி ஒரு சுப்பன் இருக்கிறான். ஆயிரம் பாட்டோடோடு அருணகிரி இருக்கிறான். அய்யா, ராசய்யா எப்ப ஆரம்பம்.

Thursday, July 14, 2005

இத்தகைய கொள்கைப் பிரகடனங்க

இத்தகைய கொள்கைப் பிரகடனங்களற்ற ஓவியர்கள் அருகிப் போனது விமரிசகர்களுக்கும் ஓவிய முதலீட்டார்களுக்கும் பெரும் வசதியாக ஆனது.
Image hosted by Photobucket.com
சந்தையை உருவாக்குவதோ, வகைமாதிரிகளைப் புனைவுசெய்து முன்னிறுத்துவதோ ஆழ்ந்த அறிவுப்புலம் தோய்ந்த ஆய்வுக்கட்டுரைகளை பல்கலைக் கழகங்களின் துறை சார்ந்து கற்பிக்க இயலுவதோ போன்ற முழுவதும் நிறுவனமாக்கப் பட்ட அமைப்புகளின் கோழிப் பண்ணைப் படைப்புலகம் விரிந்து உலகமயமாக்கப்பட்டுள்ளது. வியாபாரக் கண்டெடுப்புகளின் கிளர்ச்சிக் கூறுகள் என்ன விதமான சமுதாய நிலக்குலுக்கல்களை ஏற்படுத்தி விடமுடியும்? ஓவியம் மக்களிடமிருந்து அகன்று கண்ணாடிச் சட்டங்களின் பின்னால் பதுங்கும் துயரச் சாகசத்தின் கதை இது. விலைமதிப்பில்லாதது என்பதற்கு இன்றைய சொல்சிதைவுப் பரிணாம வழக்கில் நீங்கள் எளிதில் காணமுடியாத குளிர் அறைகளில் உறைந்தது என்றே பாடம். நடுச் சந்தியின் நிழலற்ற பரப்பில் ...



( 'மொழியின் அடுக்குகளும் அர்த்தப் பாழியும்' தொகுப்பிலிருந்து - ஞானாதித்தன் )

வெறும் தள உயரம்

வெறும் தள உயரம் மட்டும் எந்த ஒரு பார்வை வீரியத்தையும் படைப்பாளிக்கு அளித்துவிடுவதில்லை. Image hosted by Photobucket.com வெகுநேர்த்தியான சொல்திறனும், வரைதிறனும், குரல் பயிற்சியும் கலையை வெளிக்காட்டும் ஒரு திறனாளியின் மயக்கும் 'சிருஷ்டி' யுக்திகள் மட்டும் தான் என்பதை எளிதில் கண்டுகொள்ளலாம். எதையும் தாமே படைத்தோம் என்றே இவர்கள் தாமும் மயங்கி வாசகன் போன்ற பயனுறுபவர்களையும் திகைப்பூட்டுகிறார்கள். கலை ஒரு கண்டுபிடிக்கும் சாதனம் மட்டும் தான் என்று அறியும் ஒரு நிலை வருமானால் படைப்பாளியின் ஆணிவேர் செலுத்தி ஆண்டாண்டுகாலமாய் நட்டு வளர்ந்த மாபெரும் புனித விருட்சம் வீழ்ந்த்துவிடும். அதை தடுக்க ஆயிரம் சித்தாந்தச் சரடுகளை செயற்கை விழுதுகளாய்த் தொங்க விட்டிருப்பது படைப்போன் - விமரிசகன் - ரசனை மிக்க நுகர்வோன் என்ற ஒரு அடையாள ஆதிக்க மைய்யம். இதிலிருந்து பெறும் விடுதலை ...



( 'மொழியின் அடுக்குகளும் அர்த்தப் பாழியும்' தொகுப்பிலிருந்து - ஞானாதித்தன் )

Wednesday, July 13, 2005

பாயிண்டலிஸத்தின் எதிர்காலம் பற்றி

பாயிண்டலிஸத்தின் எதிர்காலம் பற்றி ஓவியர்களிடையே தோன்றிய பயம் ஒரு காரணமுமின்றி எழுந்தது என்று உணரத்தொடங்கி அரை நூற்றாண்டு ஆகிவிட்டது. Image hosted by Photobucket.com
ஆனாலும் தமிழக ஓவியச்சூழல் இதை பொதுமக்களுக்கு அறியத்தரத் தக்கதாக அமையவில்லை. பல காரணிகளை இதற்குக் காட்டலாமென்றாலும் நாட்டின் பெருவாரியான மக்களுக்கு கணினிப் பயன்பாடு எட்டாக்கனியாகவே இன்னும் இருக்கிறது என்பதும் இதனின் முதன்மையானதாகக் கருத இடமுண்டு. புகைப்படக் கலையிலேயே பாயிண்டலிஸத்தின் உள்நாடியான பொருகுத்தனமை உணரப்பட்டது. ஆனால் ஒரு சித்தாந்தரீதியாக இதை விமரிசகர்கள் கட்டமைக்காததால் ஓவியத்திற்கு ஒரு மாற்றுக் குறைவானதாகவே புகைப்படக்கலை அறியப்பட்டது. இதை நிவர்த்திக்கும் முனைப்பாக புகைப்படக் கலையினரும் தம் படங்களைச்`சிதைத்தும் கலைத்தும் நவ ஓவியத்தின் மருண்மையை அவற்றில் சிருஷ்டிகளாகக் காட்ட முற்பட்டனர். ஓவியமே இயல்வடிவத்தை மறுத்து எதைக்காண முயன்றது எனக் .....





( 'மொழியின் அடுக்குகளும் அர்த்தப் பாழியும்' தொகுப்பிலிருந்து - ஞானாதித்தன் )

எழுதும் போது சொற்களைத்

எழுதும் போது சொற்களைத் தவிர்க்க முடிவதில்லை. சொற்களின் கூட்டம்தான் எழுத்து என்று நம்மை பலகாலம் நம்பவைத்து விட்டார்கள். சொல்லுக்கும் எழுத்துக்கும் சம்பந்தமே கிடையாது என்பதே தற்கால கணியறிஞர்களின் தீர்வு.
Image hosted by Photobucket.com சொற்கள் இன்றி எப்படி எழுதுதல் சாத்தியமில்லை என்று நம்பப்படுகிறதோ அதேபோல் உடல் இன்றி உயிர் தரிக்காது என்றும் பின்னால் வந்தவர்கள் புனைந்து விட்டார்கள். ஒரு விதத்தில் பார்த்தால் எழுத்து உயிர் போன்றது என்பதன் அர்த்தம் இதன் மூலம் தெளிவாகிறது.

படைத்தல் என்பது எழுத்தின் மூலம் சாத்தியப்படும்போது, எழுத்து என்பது மொழியின்றி இருப்பதில்லை என்பதையும் நாம் அறியலாம். மொழி-சொற்கள்-எழுத்து என்று இவை ஒரு சிக்கலான வலைப்பின்னலாக உருக்கொண்டு நம் உயிரின் இருப்பைத் தக்க வைக்கின்றன. இப்பின்னலின் மூலம் கண்டு தெளிவதே அநுபூதி நிலை எனும் அர்த்தமற்ற பெருவெளி உணர்வதாகும். மொழியின், எழுத்தின், சொற்களின் வலிமை உணர்ந்தவர் இதனை அறிவார்கள். முன்பே சொன்னதுபோல் உயிருக்கு நிகர் இவை. அதை வாங்கவும் கூடும் என்றும் உணரவேண்டும். இந்த நூற்றாண்டின் முதல் ஐந்து தமிழ் நாவல்களை பட்டியலிட்டால் அவற்றில் ஒன்றுகூட கவிதையாக இருக்காது என்பதிலிருந்த்து கவிதைக்கும் உரைநடைக்கும் இருக்கும் தூரத்தை வரும் காலத்திலும் கடப்பது என்பது சாத்தியமில்லை என்றே கருதலாம்.

( 'மொழியின் அடுக்குகளும் அர்த்தப் பாழியும்' தொகுப்பிலிருந்து - ஞானாதித்தன் )

Tuesday, July 12, 2005

87

மர்மக்கதை எழுத்தாளர் எட் மக்பெயின் (Ed McBain) சென்ற வாரம் தம் 78ம் வயதில் காலமானார். சுமார் ஐம்பதாண்டு காலம் மர்மக்கதைகள், திரைக்கதைகள், நாடகங்கள் என எழுதியவர். ஆனால் 87 வது காவல் சரக (87 Precinct ) கதைகள்தான் அவருக்கு பெரும் புகழ் வாங்கிக் கொடுத்தன.
Image hosted by Photobucket.com கொலைத்துப்பறியும் கதைகளில் காவலர் பணியில் எதிர்கொள்ளும் நீள்கால நடவடிக்கைகள், அலுக்கும் விதிகள் காட்டும் செயல்பாடுகள், எரிச்சல், கோபம் என அன்றாட வாழ்வை உள்ளடக்கிய "காவலர் வழிமுறை" (police procedural ) கதைகளை வகைமாதிரியாக எழுதியவர் அவர். ஒரு புனைவு நகரத்தில் நடப்பதாக (நியூயார்க் என ஊகிக்கமுடிந்தாலும்) ஒரு காவல் நிலையத்தைச் சுற்றிய அக்கதைகள் படிக்க படு சுவாரசியமானவை. மர்மக்கதைகளை முதலில் இலக்கியம் என ஏற்றுக்கொள்ளப் படாவிட்டாலும் (யார் இப்படி ஏற்றுக்கொள்ளவேடும்?) பின்னர் விமரிசனம் 'வளர்ந்து' , ஐயா, மாடர்னிஸ்ட் உலக நோக்கின் எபிஸ்டமோலஜியைக் சிருஷ்டிப்பதே இவர்கள்தான் என்று ஒரேபோடாகப் போட, ஒரு வ்ழியாக கல்விக்கூடங்களில் கொலைக்கதைகளையும் 'கற்பிக்க' ஆரம்பித்தார்கள். எனக்கு மிகவும் பிடித்த எழுத்தாளர்களில் மர்மக்கதை எழுதுபவர்கள் எனப்பார்த்தால், ரேமண்ட் சாண்ட்லர், எட் மெக்பெயின், ஜான் லெகார்ரே, ஜான் மெக்டோனால்ட் (இவரின் படகுநாயகனை கணேஷ் ஆக்கிய .....கிர்ர்ர்) எனப் பலரும் உள்ளனர்.
ஹிட்ச்காக்கின் பேர்ட்ஸ் படத்துக்கு இவர்தான் திரைக்கதை எழுதியவர் என்பது இன்னொரு செய்தி. அமெரிக்க எழுத்தாளராக புகழ் பெற வேண்டுமானால் ஆங்கிலோ சாக்ஸன் பெயர் வேண்டும் எனத் தன் இத்தாலியப் பெயரான சால்வதோர் லோம்பினோவை மாற்றி எட் மக்பெயின் உட்பட ஆறு விதமான புனைப்பெயர்களில் எழுதினார். ஐம்பதாண்டுக்கு முன்கூட காணப்பட்ட, அமெரிக்க உருக்கும் வாணலியின் கரிபடர்ந்த முகம் அது.

Monday, July 11, 2005

ஒரு ரெட்ரோ காதல் கவிதை 2

(தமிழ்மணம் தமிழ் இல்லை என்று ஒதுக்கி விட்டதால் இந்த வரி....)

Image hosted by Photobucket.com

(03/1985)

Friday, July 08, 2005

கருத்துக் கணிப்பு

கருத்துக் கணிப்பு - பதில்கள். (07 ஜூலை, 2005)
--------------------------------------------------------------------------------------------------------------


1.
" நிச்சயமா சொல்ல முடியாதுங்க. டி.வீ.ல அப்பிடித்தான் சொல்றாங்க"
- குடும்பத்தலைவி

"அவனுகளேதான். எந்த நாட்டை விட்டு வச்சாங்க" - துணிக்கடை சேட்டு முதலாளி

" அது பிறப்பிலேயே கர்மாப்படி தீர்மானமாயிடுதே. நாம மாத்தறதுக்கு ஒண்ணும் இல்லை " - கோயில் ஜோசியர்

2.
" என்ன பண்றது. வீட்டுக்குளேயே உக்காந்து பேப்பர் படிக்க வேண்டியதுதான் "
- வங்கி ஊழியர்

" இதுக்கெல்லாம் பயந்தா முடியுங்களா. நேரில வந்தா இந்த திருப்புளியிலேயே வகுந்து போடுவேன்" - பைப் ரிப்பேர்க் காரர்

" எப்பிடியோ கணக்கு மிஸ்ஸை மூணு நாளைக்கு பாக்க வேண்டியதில்லை. போகோ சேனல் பாக்கலாம் " - ஐந்தாம் வகுப்பு மாணவி

3.

" ஏம்பா தாயா புள்ளயா பழகிட்டு, இன்னிக்கி எங்கெ போறது சொல்லுங்க"
- கோலப்பொடி விற்கும் கிழவி

" இது ஒத்து வராது சார். நாமளும் இனிமே அனுசரிக்க முடியாதுன்னு சொல்லிடணும். அவங்கவங்க பொழக்கற வழியப் பாக்குறதுதான் நல்லது " - அகில இந்திய ரசிகர் மன்ற நகரச் செயலாளர்

" புறநகர்ப் பகுதியில் அனைத்து வசதிகளும் செய்யப் பட்டுள்ளன " - அரசு சார்ப்பில் அறிக்கை தரவல்ல அலுவலர்

4.
" கிடையாது" - உள்ளூர் எம் எல் ஏ
" அப்படியெல்லாம் எங்களுக்குத் தெரிஞ்சு ஒண்ணும் இல்லை" - போலீஸ் அதிகாரி
" எல்லா நாட்டிலேயும் நடக்கிறதுதான் சார். நம்ம ஊர்ல ஒருமாதிரி. இன்னோரெடத்தில ஒரு மாதிரி. ஆயிரங்காலத்து பிரச்சினை" - கல்லூரி பேராசிரியர்

5.
" 2020" - பொறியியல் மாணவர்
" 3000 " - சினிமா நகைச்சுவை ட்ராக் எழுத்தாளர்
" 2040 " - பலூன் விற்பவர்

Friday, July 01, 2005

இதி. 44

Image hosted by Photobucket.com



(http://www.expressindia.com/)

" ஹென்றி, நீ இன்னான்றே. உண்டிவில்லால அடிக்கலையின்னா இந்த சூனியக்காரி வளிக்கு வரமாட்டா போலிருக்கே ..."

" நீ போடு ரிச்சர்ட், இந்த **%$@#* பசங்கெல்லாம் நாம எறியற கோதுமைத் துன்னூட்டு நம்மையே எதுக்குறாங்க,,,"

Wednesday, June 29, 2005

அ.தி.

மனேகா காந்தி அமைச்சராகும் முன்புவரை ஒரு பச்சை மனிதனாகத்தான் நான் என்னைக் கருதிக்கொண்டிருந்தேன். அப்போது எழுதிய சில விபரீத வரிகள் கீழே. அவர் அமைச்சரானவுடன் இனிமேலும் இத்தகைய லுட்டைட்டுகளை நாடு தாங்க முடியாது என எண்ணி, முழுவதும் அணுசக்தி மூலம் மின்சாரம், கிரைப் வாட்டரைக் கூட முயல்குட்டி கண்ணில் ஊற்றி செய்யும் சோதனைகள், சைலண்ட் வேலியில் சரக்கு ரயில் பாதை என கண்டதையும் ஆதரிக்க முடிவு செய்துவிட்டேன்.

green rhymes for the grown ups
-----------------------------------------------

1. poultry hen
-----------------------
cute round bird
with two holes and feathers
feeds thro' one
lays thro' the other
works quite fine
why you guys bother

2.
dont cut the rain forest
it gives us oxygen you know
if you care, for economy's sake
take some opium to sow


3.
green house green house
co2 is here
yes sir yes sir
how to start a fire

4.
ants are ancient
'roaches came soon after
man arrived just in time
to drain the underground water

இன்னும் இருப்பதை இங்கே போடமாட்டேன். ரீசைக்கிளி ஜோசியம் பலித்துவிடும்.

Wednesday, June 15, 2005

ஒவ்வொண்ணும் போன பாதை

தாம் செல்ல சுகத்தோடே
வண்டி குலுங்கா ராஜபாட்டை
காளை நுரையணைக்க
வீசும் நிழல் ரெண்டுபக்கம்
போகப் போக தினம்
போகப் போக சுகம்

கார்போகும் தேர்போகும்
கனம் கனமாய் லாரிபோகும்
நீர் ஊறும் அக்கம்பக்கம்
நீங்கள் பசியணைக்க
ஊர்போகும் பண்டிகைக்கு
உரிமைக்குரல் பக்கத்தூரில்

உல்லாசமேஏஏ டட்டட்டா
எல்லோர்க்குமே சச்சச்சா

வெள்ளைக்காரன்
போட்ட ரோடு தாத்தாவுக்கு
அப்பாவுக்கோ
பெருஞ்சேரலாதன்
நண்பர்க்கும் நமக்கும்
H^|D கல்லு நாலு

முடிவென்பது புகையாய்ப்போச்சு
பாதைகிடக்குது காலடியில்


(அக்டோபர்,83)

Wednesday, June 08, 2005

சி.வி. ராமன், மஹாத்மா காந்தி, டாக்டர். ரம்: ஒரு உரையாடல்

மே, 1936ஆம் ஆண்டு, பெங்களூர் அருகிலிருந்த நந்தி குன்றுகளுக்கு வந்திருந்த காந்தியைச் சந்திக்க சுவிட்சர்லாந்தைச் சேர்ந்த உயிரியலாளரும் ஒரு மதகுருவுமான டாக்டர்.ரம்மை (Dr.Rahm) ராமன் அழைத்துச் சென்றிருந்தார். அப்போது நடந்த உரையாடலின் ஒரு பகுதி:

ரம்:" உலகில் இத்தனை மதச் சண்டைகள் நடப்பது எனக்கு பெரும் குழப்பத்தையே அளிக்கிறது. இப்பூசல்களை முடிவுக்குக் கொண்டுவரவே இயலாதா".

காந்தி: "அது கிருத்துவர்களின் செயல்களைப் பொருத்தது. அவர்கள் மட்டும் மற்றவர்களுடன் சேர்ந்து வாழ மனம் வைத்தால்..! ஆனால் அவர்களுடைய தீர்வோ, கிருத்துவ மததை உலகில் அனைவரும் ஏற்றுக்கொள்ள வேண்டும் என்பதுதான்."

டாக்டர் ரம் இந்த பதிலை காந்தியிடம் இருந்து எதிர்பார்க்கவில்லை. இதற்கு அவர் பதிலுரைக்கவில்லை. இன்னொரு கேள்வியை ரம் பதிலாகக் கேட்டார்:
"சரி நாம் ஒன்று சேரத்தான் முடியாது. இப்போது வளர்ந்துவரும் நாத்திகத்தையாவது ஒன்றாகச் சேர்ந்து எதிர்த்துப் போராடலாம் இல்லையா? "

அப்போது சி.வி.ராமன் இடையில் புகுந்தார்: உங்கள் கேள்விக்கு நான் விடை அளிக்கிறேன்.
"கடவுள் என்று இருந்தால் நாம் நிச்சயமாக இவ்வண்டத்தில் அவரைத்தேட வேண்டும். கடவுள் இல்லை என்றால் தேடுவது வெறும் வீண்வேலை. பலரும் என்னை நாத்திகன் என்றே நினைக்கிறார்கள். நான் அப்படி இல்லை. வானவியலிலும், இயல்பியலிலும் இப்போது தொடர்ந்து வரும் கண்டுபிடிப்புகள் கடவுளைப்பற்றிய தோற்றங்களாகவே எனக்குப் படுகின்றன. மஹாத்மாஜி, மதம் மனிதர்களை ஒன்று சேர்க்காது. அறிவியல் அப்படி அனைவரையும் முழுமையாக ஒன்று சேர்க்க ஒரு வாய்ப்பை அளிக்கிறது. அறிவியலாளர்கள் அனைவரும் சகோதரர்கள்."

காந்தி: "அப்போது அதற்கு எதிர்மறை என்ன? அறிவியலாளர் அல்லாதோர் அனைவரும் சகோதரர்கள் அல்லர் என்பதா?"

ராமனுக்கு இந்த நகைச்சுவை புரிந்துவிட்டது. அவர் சொன்னார்:

" அனைத்து மனிதர்களும் அறிவியலாளர் ஆகலாம், மகாத்மாஜி".

(மஹாத்மா காந்தியின் தொகுப்பிலிருந்து)

Monday, May 30, 2005

கண்ணில் கண்டதெல்லாம் காட்சியா ...

---------------------------------------------------

"கண்ணில் கண்டதெல்லாம் காட்சியா
உன்கண்ணே உண்மைசொல்லும் சாட்சியா..."
- பட்டினத்தில் பூதம் படப் பாடல்

நமது புலன்கள் மிகவும் நுட்பமானவை. உலகை உணர, அறிய நமக்கு இருக்கும் வழிமுறை நமது ஐம்புலன்கள்தான். அதனால் புலன்களால் அறியக்கூடிய உணர்சிகளைக்கொண்டே அவற்றால் தூண்டப்பட்டே குழந்தைகளாக இருக்கும் நாம் மெதுவாக உலகைப்பற்றிய பிம்பங்களை உருவாக்குகிறோம். பின் 'உண்மைகள்' அறிமுகமாகின்றன. தாய் எனும் உண்மை, பசி,வலி, சிரிப்பு எனும் உண்மைகள் சேர்ந்து உலகம் உருவாகிறது. சுற்றியுள்ளோரால் சொற்கள் மொழியப்படுகிறன. சொற்களால் ஆன மொழி அமைந்து உலகம் மொழிவழி அறியப் படுகிறது. மூன்று வயதுக் குழந்தையை நம்மால் கணமேனும் பேச்சடக்க முடிவதில்லை. பொறிவழி உணர்தல்-பேச்சு- மொழியின் சிக்கலாக உலகமும் இருப்பும் நிறுவப்படுகின்றன. இதுவே புலனறி வாதம் என அழைக்கப் படுகிறது.

மேலே சொன்னபடி மட்டுமே நமது 'அறிவு' அனைத்தும் பெறப்படுமானால், அப்படி மட்டுமே நமது எல்லா 'அறிவும்' பெறப்படுவதாக நாம் நம்பினால், நம்மை நாம் ஒரு 'புலனறிவு வாதி' என அழைத்துக்கொள்ளலாம். ஆங்கிலத்தில் 'empiricism' என அறியப்படும் தத்துவச் சொல் தமிழில் புலனறிவாதம் என பயிலப்படுகிறது. அறிவு என்பதை ஆங்கில knowledge என்னும் சொல்லுக்கு இணையாக இங்கே பயன்படுத்தி இருக்கிறேன். வடமொழியில் ப்ரமாண என வழங்கப்படும், அறிவை அடையும் முறைகளில், புலன்கள் மட்டும் தரும் அறிவு ப்ரத்யக்ஷ என அழைக்கப் படுகிறது. (இந்திய ஏரண, தத்துவ இயல் செறிவானது. எனக்கு வடமொழி தெரியாது. ஆங்கிலத்தில் படித்ததை இயன்றவரை தருகிறேன்).

தொல்காப்பியர்:

"
ஒன்றறி வதுவே உற்றறி வதுவே
இரண்டறி வதுவே அதனொடு நாவே
மூன்றறி வதுவே அவற்றொடு மூக்கே
நான்கறி வதுவே அவற்றொடு கண்ணே
ஐந்தறி வதுவே அவற்றொடு செவியே
ஆறறி வதுவே அவற்றொடு மனனே
நேரிதின் உணர்ந்தோர் நெறிப்படுத்தினரே
"
என்று ஐந்து புலனறிவுகளையும் ஆறாவதாக மனதையும் கூறுகிறார்.
எளிதாக புரிகிறது என நினைக்கிறேன்.

புலன்கள் வழங்கும் வெறும் உணர்ச்சிகளை மட்டும் வைத்து நமது மனது உலகத்தை முழுவதுமாக அறிந்து கொள்ள முடியாது என கருதலாம். அது சரிதான். கையை வெந்நீரில் வைத்தால் விரல்கள் எரிகின்றன. இது உணர்ச்சி. கடும் கோடையில் இப்போது சென்னையில் வெளியே சாலையில் நடந்தால் உடம்பே முழுவதும் எரிகிறது. இதுவும் அதே போன்ற ஒத்த உணர்ச்சிதான். ஆனால் இரண்டும் ஒன்றா? உணர்ச்சியை அரூப சிந்தனையாக்கி 'சூடு' என நினைக்கிறோம். 'அப்பா என்ன சூடு' என்று சொல்லும் போது நீங்கள் உணர்ச்சியில் மட்டும் 'அறிய' வில்லை. அதற்கு அடுத்த படியான 'சூடு' எனும் மொழிவழி கற்பித்த ஒரு சிந்தனை அலகுக்கு சென்றுவிட்டீர்கள். சூடு என்று இதை நாம் 'அறிய'த் துவங்கிவிட்டால், வெந்நீர், நெருப்பு, சூரியன் என்று எரிச்சலைத் தரும் வழங்கியிலிருந்து நம் சிந்தனை அகன்று அடுத்த நிலையில் அந்த உணர்ச்சியை பொதுமைப்படுத்தி (இதற்கு மேலும் பொதுமைப்படுத்தி பெண்ணின் கண்களையும் ஒரு வழங்கியாகக் கொண்டால், கோபப் பார்வைகூட கவிஞர்களால் அபத்தமாக சூடு என்று சொல்லப்படும்). இப்போது நமது மனமும் இந்த 'அறிவை' உண்டாக்கும் செயலில் உணர்ச்சியோடு ஏதோ செயல்படுகிறது என்று தெரிந்து கொள்கிறோம்.

மேலே சொன்ன பாடலில் இப்படித்தான் வெறும் கண்கள் கொடுத்த செய்தியை மட்டும் வைத்துக்கொண்டு கோபப்படாதே என்று ஜெய்சங்கர் கேயார் விஜயாவிடம் கெஞ்சிக்கொண்டு இருக்கிறார். போகட்டும். அடுத்த பாடல்: " உனது விழியில் எனது பார்வை உலகைக் காண்பது ..."
ரெடியாக இருங்கள்.

(அறிவியலைப் பற்றி விவாதிக்க பல தத்துவக் கலைச் சொற்களை பயில வேண்டி இருக்கிறது. வெங்கட்டின் சென்ற பதிவில் இதை உணர்ந்திருப்போம். அத்தகைய சொற்களை முடிந்த அளவு சிறு விளக்கங்களுடன் அறிமுகம் செய்து கொள்ளத்தான் இது)

Thursday, May 26, 2005

இ.தி. 43

இ.தி. 43



Image hosted by Photobucket.com


ஐயா, பப்ளிக் எடத்திலெ கிராமம் மாதிரி நினச்சதெல்லாம் செய்ய முடியாது. இது டவுனுங்க. இங்கெல்லாம் சிங்க முகமூடி போட்டுத்தான் நம்மையே சுத்தப்படுத்த நக்கணும். ஹூம். எப்பத்தான் திருந்துவீங்களோ...

Tuesday, May 17, 2005

**/**/87 (2)

என்றென்றும்
-------------------

எவரும் வருக
உறைந்த கள்ளி நிழல்
அலையும் காற்றின் மினுப்பு
விரைத்த சாம்பல் வானம்
திக்குகளின் வேட்டொலி
சூழ்ந்ததென் குகை

புல்நுனி கல்முனை
சிறுநீர் மணமாய்
மிருகத்தின் எல்லைகள்
மார்பெலும்பின் மிச்சக்
கூர்நுனி கிழித்த
பாதங்களின் பதிவு தாண்டி
சிதறிய இறைச்சியில் உயிர்த்த
பூக்களின் பரப்பு தாண்டி

நாற்புறமும் என்
கடவுளரை எரித்த
சிதை புகைய
பற்களைத்தீட்டி
காத்திருக்கிறேன். வருக.

Sunday, May 15, 2005

**/**/87

பிரிந்து போனவர்களின் கதி எனக்கும் தெரியும்
தோல் ஆடைகளை முதுகில் சுமத்தவர்கள்
சுழல் வாகனங்களின் விஷயம் தெரிந்தவர்கள்
மின்கற்றை துப்பும் வெடிப்பிகள் பதுக்கியவர்கள்
அனைவரும் சென்ற வழிகளைத் தவிர்த்து
கல் கவண்களைச் சுழற்சி
மயிற்பீலிகளைத் தலையில் தரித்து
அகன்று சென்றவர்கள் இடையில் பிறந்த
என்தோழன் சொல்கிறான்:
"இன்று பிரிந்தவர்களின் குழந்தைநான்
அவர்களின் பாறை எண்ணையை தடவிவளர்ந்த
மினுக்கும் என்கூந்தலின் இடையில்
வைத்துள்ளேன் என் குழுவின் ரகசியங்கள்
ஒவ்வொரு நரை முடிக்கும் ஒன்றாக
நான் மறக்கும் எம்குழுவின் வார்த்தைகளை
என்தலையை கத்தரிக்கும்முன் உம்மிடம் சொல்கிறேன்
உமக்கோ எம் வார்த்தைகள் புரியாது
உமக்கோ எம் பழங்கள் செரிக்காதவை
எம் சிறுத்தைகளின் நகக் கூர்மையில்
செதுக்கிய என் முதுகில் பாருங்கள்
எம் குழுவின் வரலாற்றை
எம் மக்களின் விருப்பம் மறந்த
கடவுளைப் பதித்துள்ளேன்
என் ஒவ்வொரு பொய்ப்பல்லின் கீழும்
தாடைகளை உடைத்து என் பற்களைத்துப்ப நீங்கள்
உதைத்த உதையின் இறுமாப்பு போன்றவை
எமது கழுதைகளின் பிளிரல்கள்
ஈக்களின் சுவாசம் போன்று
இலக்கே இல்லாத உம் கேள்விகள்
எம் முன்னோரின் வாடைகலந்த
காற்று அலையும் சமவெளிகளில்
மூக்கு துடிக்க வரும் நாய்களின் நரம்புகளை
உலர்த்தி அணிகிறோம் அரஞாண் கயிறுகளாக ..."
சகோதரனின் வாளிலிருந்து வீழும்
எரிகற்களை சேகரிக்கும் நண்ப அறிந்துகொள்

Friday, May 13, 2005

இ. தி - 42

Image hosted by Photobucket.com


" உலகம் தெரியாம வீட்டுக்குள்ளேயே பொத்தி வச்சு வளத்த பொண்ணு. கண்கலங்காம நல்லாப் பாத்துக்கங்க மாப்பிள்ளை."

Thursday, May 12, 2005

இ.தி - 41

Image hosted by Photobucket.com


" கிக்கீகுக்கீகுக்கீகூ கக்கீகூகக்க்காகுயீ ..."

" இந்த லூசுப்பய லூகாஸுக்குத் தெரிஞ்சா என்னாகுமா?
தெரிஞ்சா தெரிஞ்சுட்டுப் போகுது. முப்பது வருசமா மனுசுக்குள்ள பூட்டி வச்சிருக்கிறத சொல்லிடறேன் கேளு. நான் தான் திரைக்கதையில எல்லா அத்தியாயத்தையும் மாத்தி மாத்தி வச்சு தைச்சிட்டேன்... "

Wednesday, May 11, 2005

தூக்கம் உன் கண்களைத் தழுவட்டுமே ...

'குமுதம்' கூற்றுப் பொருந்துமா? அது திருந்துமா?
----------------------------------------------------------------------

அமுதம் அனைய தமிழ்மொழி ஆட்சிமொழியாதல் வேண்டுமென்பது உண்மைத் தமிழர் உள்ளக்கிடக்கை. தமிழ் ஆட்சி மொழியானால்தான் தமிழர் வாழ்வு பெறுவர்-தமிழ் நாடு அதன் உண்மைச் சிறப்பைப் பெறும். இது தமிழரின் ஒன்றுபட்ட உணர்ச்சி. இவ்வுணர்ச்சியின் விளைவாகவே தமிழ் ஆட்சி மொழியாகவேண்டும் என்னும் எண்ணம் எழுச்சியாக ஆங்காங்கே தலைதூக்கக் காண்கிறோம்.

எனவே ஆட்சி மொழி பற்றிய முயற்சியில் இனி தமிழர் எத்துணை விரைவாக முன்னேற வேண்டுமோ அத்துணை விரைவாக முன்னேற வேண்டும். ஒரு சிலர் உண்டெனினும் அவர்களும் வெளிப்படையாக எதிர்க்கத் துணிந்திலர். இதழ்கள் யாவும் தமிழ் ஆட்சி மொழியாவதை வரவேற்கின்றன.

எனினும் ஒரு சிலர் இயல்பாக தமக்குள்ள பிற்போக்குத் தன்மையை விட்ட பாடில்லை. தமிழ் ஆட்சிமொழியாக வேண்டும் என்பதை ஏற்றுக்கொள்வதுபோற் காட்டி 'அவசரப் படக்கூடாது' என்று அறிவுரை கூற முன்வருகின்றனர். இதற்கோர் எடுத்துக்காட்டாகத் திகழ்கிறது 'குமுதம்' என்னும் கிழமை இதழ். 1-6-54-ல் வெளிவந்த அவ்விதழ் கூறுவதைச் சற்றே கூர்ந்து நோக்குமின்.

"பஞ்சாயத்து நிர்வாகிகள் வரிப்பாக்கி அறிவிப்புமுதல், சட்டசபை உறுப்பினர் ஒழுங்குப் பிரச்சினைவரை சகல நடவடிக்கைகளும் இன்று முதலே இந்த வினாடி முதலே தமிழில் நடத்த வேண்டும் என்று கிளர்ச்சி செய்வது அவசரப் புத்திக்கு அடையாளமாக இருக்கிறதே தவிர அறிவு முதிர்ச்சியின் சின்னமாக இருக்காது" என்று எழுதுகின்றது.

'குமுத'த்தின் இக்கூற்று மிகமிக இரங்கத்தக்கது. இந்நாட்டில் ஆங்கில ஆட்சி நிலவிய காலையில் இக்கூற்றினை குமுதம் வெளியிட்டிருக்குமாயின் அதில் சற்றேனும் பொருள் இருக்கமுடியும். நாடு விடுதலை பெற்று ஆண்டு ஏழாகின்றன. இந்நாள் காறும் தமிழுக்கு ஏற்றமில்லையானால்- தமிழ் ஆட்சி பீடம் ஏறவில்லையானால் விடுதலை என்ற சொல்லுக்கே பொருளில்லை. நாட்டுப்பற்றுக்கு அடிப்படை மொழிப்பற்று. நாட்டு விடுதலைக்கு அடிப்படை மொழி விடுதலை. ஏழாண்டுக் காலத்தில் இதனை நாம் காணமுடியவில்லையானால் தமிழரின் குரல் ஆட்சியாளர் செவிப் புகவில்லை, அல்லது தமிழை ஆட்சிமொழியாக்கத் தமிழர் தகுதியற்றவர் என்பதாக முடியும். எனவே, தமிழை ஆட்சி மொழியாக்க மடிதற்று நிற்கின்றதென்பதை இருண்டபோது மலரும் குமுதம் உணர்க. இனிக் குமுதம் போன்ற பிற்போக்கு இதழ்கள் நாட்டில் நெடுநாள் உலவ முடியாது. அது உலவ வேண்டுமானால் இத்தகைய போலிக் கொள்கைகளை விட்டு விட்டு உடனடியாகத் திருந்த வேண்டும்.

- செந்தமிழ்ச் செல்வி, வள்ளுவர் ஆண்டு, வைகாசி. (ஜுன், '54)


குமுதம் விகடன் இவற்றிற்கெல்லாம் இன்று தமிழே தேவையில்லை. தமிழும் இன்னும் இருக்கிறதே என்பதுதான் எனக்கு வியப்பு.

Sunday, May 08, 2005

மரை பொருள்

மரை என்றால் 'ஒரு வகை மான்' என்றே அகராதிகள் கூறுகின்றன. அப்பொழுது மானில் பல வகை உண்டென்பது தெரிகிறது. பழந்தமிழ் இலக்கியங்களில் நவ்வி, மரை, கடமா, உழா, இரலை என்று ஐந்து வகை மான்கள் அறியப்படுகின்றன. தற்போதைய தமிழக எல்லைக்காடுகளில் எனக்குத் தெரிந்து புள்ளிமான், மிளா, கலை மான் என்று மூன்று வகை மான்கள் உள்ளன. கலைமானை இயற்கை சூழலில் கண்டதில்லை. மற்ற இரண்டையும் காட்டில் பார்த்திருக்கிறேன். ஓரிரு நூற்றாண்டுகளுக்கு முன் வரை இவை தமிழகமெங்கும் பரந்து காணப்பட்டிருக்கும். புள்ளிமான் எல்லோருக்கும் தெரியும். மிளா என்பது சற்றே பெரியது. சம்பர் என ஹிந்தியில் அழைக்கப்படுகிறது. கலைமான் நீண்ட கொம்புகளை உடையது. அருகி வரும் இனம்.
இவற்றில் மரை என்பது எது? சாதாரணமாக புள்ளிமானே உணவுக்காக சமவெளி மனிதர்களால் வேட்டையாடப்பட்டது. கோவைக்கருகிலுள்ள சிறு குன்றுகளை அடுத்த பகுதிகளில் இம்மான்கள் முப்பது வருடங்களுக்கு முன் வரை காணப்பட்டன. இப்போது பந்திப்பூர், முதுமலை சென்றால் புள்ளி மானையும் மிளாவையும் காணலாம்.
மரை என்பது புள்ளிமானா அல்லது மிளாவா இல்லை இரண்டுமேவா என்று ஐயமாக இருக்கிறது.
பழந்தமிழர் தாமே வேட்டையாடி பிடித்து உண்பதல்லாமல், புலி அடித்துச் சென்ற மானின் எச்சம், செந்நாய்கள் விட்டுச்சென்ற மானின் எச்சம் இவற்றையும் உண்டனர். அதுசரி, சங்ககாலத் தமிழர் வேறு என்ன விலங்குகளை உண்டனர்? ஆடு, காட்டுப்பசு (ஆமான்), பன்றி, முள்ளம்பன்றி, யானை, மான், முயல், குரங்கு, எலி, பசு ... இந்த மெனு போதுமா, இன்னும் கொஞ்சம் வேணுமா?
அரிதாகிவரும் வன விலங்குகளைக் காக்க இறுதித் தீர்வு ஒன்று உண்டு. மனிதன் அதை உடனடியாக சாப்பிடத் துவங்குவதுதான் அது. மனிதன் உண்ணும் எந்த விலங்கும், பறவையும் (ஆடு, மாடு, குதிரை, கோழி, வான்கோழி) பல்கிப் பெருமே தவிர அழிந்துவிடாது. அதற்கான தேவைகளை அவன் பார்த்துக்கொள்ளுவான். உதாரணமாக, இப்போது ஜப்பான் காடைக் கறி எல்லா செட்டிநாட்டு உணவகங்களிலும் கிடைக்கிறது. ஆனால் நம்ம ஊர்க் காடை அழிந்த்து கொண்டிருக்கிறது. அரசாங்கம் உடனடியாக திட்டங்கள் தீட்டினால், பல மிருகங்களைக் காப்பாற்றலாம். என்னே ஒரு உயர்ந்த மானுடப் பண்பு என்று என்னைத் திட்டத் துவங்கும் முன் தென்னாப்பிரிக்காவின் இத்தகைய முயற்சிகளைப் பற்றி அறிந்து கொள்ளுங்கள். எண்பதுகளிலேயே ஆரம்பித்தார்கள்.

Saturday, May 07, 2005

இ.தி-40

Image hosted by Photobucket.com



" உங்கள் விழுமியங்கள் உங்களுக்கு. என் விழுமியம் எனக்கு.
நான் இனி மரக்கறிதான் சாப்பிடுவேன்."

"என்னத்த வேணும்னாலும் சாப்பிடு. விழுமியம் கிழுமியம்ன்னு உளர்ரத நிறுத்தலேன்னா இனிமே வீட்டுக்கு வெளியிலேதான் சாப்பாடு. "

BBC :
Killer dino 'turned vegetarian'

தெய்வங்கள் எல்லாம் உனக்காகப் பாடும்

"தெய்வங்கள் எல்லாம் உனக்காகப் பாடும்
பாடாமல் போனால் எது தெய்வமாகும் ..."

திரும்பத் திரும்ப எத்தனை முறை 'மறு வாசிப்பு' செய்தாலும் அனைத்து இந்து மதப் புராணங்களின் பெருங்கதையாடல் இதுதான்:
1. வைதீக மார்க்கமே உண்மை. எல்லாவற்றிலும் உயர்ந்தது. புனிதமானது.
2. வேதங்கள் முதன்மையானவை. அவற்றை சக்தியிருந்தால் மீள்வாசிப்பு செய்யலாம். ஆனால் மறுக்க இயலாது.
3. சனாதன 'தர்மம்' காக்கப் படவேண்டும். அதற்கான அனைத்து யுக்திகளும் நியாயத்தின் பாற்பட்டவை. அதற்கு மாற்றான அனைத்தும் அநியாயத்தின் பாற்பட்டவை. அழித்தொழிக்கப் பட வேண்டுபவை.
இவற்றைத்தவிர வேறு என்னதான் இந்தப் புராணங்கள் கூறுகின்றன? ஏதாவது ஒரு புராணத்திலிருந்து யாராவது ஒரு உதாரணம் காட்டினால் நம்புவேன். மீதி கதைசொல்லும் யுத்திகள் அந்த அந்த படைப்பாளியின் தொழில் திறமை. கம்பன் ஒரு மகத்தான கவிஞன். அவனுடைய ராமகாதை படிக்கப் படிக்க உள்ளே இழுத்து கிறங்க அடிப்பது. அதுவும் மேற்சொன்ன விதிகளைத் தாண்டி புறமாக ஏதாவது சொல்லியிருக்கிறதா என்பதுதான் கேள்வி. வைதீக மார்க்கம் வரலாற்றில் எவ்வளவோ ஏற்றத்தாழ்வுகளைக் கண்டது. நல்லவை என்று பரப்புரைக்கப் படுபவை இம்மார்க்கத்தைப் பேணும் செயல்பாடுகள். பாவம், கெட்டவை என்று பயமுறுத்தப் படுபவை இதை எதிர்த்த செயல் பாடுகள். அவ்வளவுதான்.
இதில் பிராமணர்கள் மட்டுமே வைதீகத்தைப் போற்றுபவர்கள் அல்ல. அகில இந்தியாவிலும் பார்த்தால் பிராமணர்கள், சத்திரியர்கள், வைசியர்கள் இவர்கள் மூவரின் கூட்டாட்சி முறையே வைதீகக் கட்டமைப்பு. இவர்களின் தன்னல விழுமியங்களே இந்து மதத்தின், இப்போது இந்த நாட்டின் பொது விழுமியங்களாக புனைவு செய்யப் படுகின்றன. அது வால்மீகியிலிருந்து இன்றைய இயக்குனர் ஷங்கர் வரை அனைத்து படைப்பாளிகளுக்கும் பொருந்தும்.
தமிழகத்தில் ஒரு அசாதாரண அறிவுலகச் சூழல் இருக்கிறது. அண்டை மானிலங்களில் கூட வைதீகத்தை எதிர்த்து தீவிரமாக எழுதிய சமகால படைப்பாளிகள் பெரும்பாலும் பிராமணர்களே. தமிழகத்தில் பிராமணமல்லாதோர் வைதீக எதிர்ப்பை பிராமண எதிர்ப்பாக மாற்றி இயக்கமாக்கியதில் தமிழக பிராமணர்கள் நாங்கள் யூதர்களாக்கும் என்று குண்டுபோட வசதியாகப் போய்விட்டது. கருத்து முறையில் வைதீகத்தை எதிர்த்தாலும் இது பிராமண எதிர்ப்பு ஆகவே இந்துமத எதிர்ப்பு என்றெல்லாம் மேலோட்டமாக வாதிடுவதற்கும் வசதியாக இச்சூழல் இருப்பதால் அதே குழப்பத்தை வலைப்பதிவுகளிலும் பார்க்கிறேன்.

Saturday, April 23, 2005

ஈமெயில் போதை

சில வாரங்களாக சென்னைக்கும் பெங்களூருக்கும் இடையில் டீலோகலைஸ்ட் எலக்ட்ரான் போல உடலும் மனமும் பரவிக்கிடப்பதால் வலைப்பதிவுகள் போதையிலிருந்து மீண்டு பொருண்மைஉலகில் வாழ்ந்துகொண்டிருந்தேன். ப்ளாக்கர்ஸ் அனானிமஸ் என்றொரு மீள்வாழ்வுச்சங்கம் அமைக்கலாம் என்றும் பார்த்துக்கொண்டிருக்கிறேன். மரியுவானாவை விட ஈமெயில் போதையில் மக்கள் முட்டாள்க்ளாக ஆகிறார்கள் என்றொரு ஆராய்ச்சி முடிவு தெரிவிக்கிறது. (http://www.theregister.co.uk/2005/04/22/email_destroys_iq/) நம் யாருக்கும் இதில் எந்த சந்தேகமும் இல்லை (என்று நினைக்கிறேன்). குடி, கஞ்சா, புகையிலை போன்ற எந்த ஒரு பழக்கஅடிமை நுகர்பொருளும் ஒருவரின் இயல்பான மன விழிப்பு நிலையையும், புலனுணரு சக்தியினையும் பாதிக்கும் என்பது பலகாலம் ஆராய்ச்சிகளில் அளந்து நிரூபித்த ஒன்று தான். இதேபோல் இப்போது ஈமெயில் ஆராய்ச்சி! ஒரு கருத்துத் தளத்திலிருந்து மற்றொன்றிற்கு MTV சுய விளம்பர காட்சிசுழற்சி வேகத்தில் நொடிக்கு முப்பதுதரம் மாற்றிக்கொண்டிருந்தால் மூளை முட்டைபரோட்டா மாதிரி குதறி எடுக்கப்படும் என்பதும் நமக்கு வெட்ட வெளிச்சமாக இருக்கிறது. எடுத்த காரியத்தில் ஊன்றிச் செய்வது, பிற கவன ஈர்ப்புகளுக்கு ஆளாகாமல் சிரத்தையுடன் முடிப்பது போன்ற வழக்கங்களை சிறு வயதிலேயே கல்லாவிட்டால் பிறகு படிவது கடினம் என்றும் நாம் உணர்ந்திருக்கிறோம். குழந்தைகளின் கவன இயல்பும் திறமையும் கணி உபயோகத்தினால் பாதிக்கப் படுவதாகவும் சமீபத்திய ஆய்வுகள் எச்சரிக்கின்றன. மூன்றுவயதிலேயே ஒரு பையன் மைக்ரோசாப்டின் பல மென்பொருள்களையும் பயன்படுத்துவான் என்று சில மாதங்கள் முன்பு பெருமிதச் செய்தி பத்திரிக்கைகளில் வந்தது. குழந்தைகள் விளையாடாமல், அதையும் இதையும் இழுத்துப் போட்டு குறும்பு செய்யாமல் இப்படி கணியிலும் டிவி யிலும் பொழுதைக் கழித்தால் அவர்களுடைய மூளை, மன வளர்ச்சிகள் எந்த அளவு பாதிக்கப்படும் என்பது இன்னும் சரிவர விளங்க சில ஆண்டுகள் ஆகலாம். வீட்டில் 7 வயது பையன் இருக்கிறான். எங்கள் வீட்டில் TV க்கு கேபிள் கிடையாது. ஆண்டனாவும் கிடையாது. வேண்டுமானால் நிறைய கார்ட்டூன் குறுவட்டுகள் இருக்கின்றன. தமிழ், இந்தி பாடல் காட்சிவட்டுகள் இருக்கின்றன. (ஆணும் பெண்ணும் சேர்ந்து குதிக்கும் காட்சிகளை அவன் பார்க்கிறானே என்று நான் கவலைப் படுவதில்லை. சினிமாக்களில் வரும் வன்முறைகளும், சீரியல்களில் வரும் அபத்த மனித உறவுச் சிக்கல் வெட்டிப் பேச்சுகளையும் விட நாயகனும் நாயகியும் கூட ஒரு ஐனூறு தோழியரும் 'அன்பு' செய்து கொள்வது எவ்வளவோ மேல் என்றே நினைக்கிறேன்). இவைகளை அனுமதியுடன் அவன் பார்க்கலாம். கணியில் விடுமுறை நாட்களில் விளையாடலாம். என்ன அப்பா எனக்கு வாங்கறேன்னு அம்மாகிட்ட சொல்லித்தானே இந்த ஆப்பிள் கம்பூட்டர் வாங்கினே. இப்ப நீயே வச்சுக்கிறயே என்று அவன் அடம் பிடித்தாலும் விடுமுறை நாட்களில் தான் கணி என்று உறுதியாக சொல்லிவிட்டேன். இது சரியா தவறா என்று பின்னால் தான் தெரியும். ஆனால் ஒன்று மட்டும் தெளிவாகத் தெரிகிறது. ஊரும் வயலும் என்று கிராமத்தில் வளர்ந்த எனக்கு வீட்டுக்குள்ளேயே ஒளிர்பெட்டிகளுக்கு முன்னால் உட்கார்ந்து கொண்டு சதா 'அறிவை' வளர்த்துக் கொண்டிருப்பது சகிக்கமுடியாததாக இருக்கிறது. ஆனால் இங்கெ தமிழகத்தில் இப்போது எல்லோருக்கும் குழந்தைகளுக்கு சரியாக ஒண்ணுக்கு போக கற்றுக் கொடுக்கிறார்களோ இல்லையோ, மைக்ரோசாப்ட் வேர்ட் இல் பாபா பிளாக் ஷீப் அடிக்க கற்றுக்கொடுத்து பூரிப்பு அடைகிறார்கள். எதிர்கால கணிஉலக சூப்பர் பவர் நாட்டின் குடிமகன் என்றால் சும்மாவா.

Tuesday, April 12, 2005

இ.தி. 39

Image hosted by Photobucket.com



கலைத்திருடர்களிடம் என்னவெல்லாம் இழந்தோம்...

Thursday, April 07, 2005

மொசைக் தரையில் திணறும் சிலந்தி

மொசைக் தரையில் திணறும் சிலந்தி




Image hosted by Photobucket.com



எட்டுக்கால்கள் கொண்டும் நடத்தலின் இன்பம் அறியேன்
எத்தனை யுகங்கள் வாழ்ந்தும் அயலவர் சுகிப்பு தெரியேன்
கட்டிய வலைகள்கோடி கவர்ந்தபல உயிர்கள் நினைப்பும்
தெற்றென தெரிந்தபின்பும் சூழலை இகழ்ந்து திரிவேன்









Tuesday, April 05, 2005

91187

பல்லாயிரம் ஆண்டுகள்
வாழ்ந்தனர் மனிதர்
புதர்களில் விலங்குகளை உண்டபடி
பின்னர் அறிவித்தனர்
"கீழ்க்கண்ட முறைகளில்
வாழ்க்கையை அழைக்கலாம்:
நாடகம், தண்டனை, விளையாட்டு
கனவு, பயணம்
தான் ஒரு புண்ணாக்கு என அறிதல்"
ஆகவே மனிதர் சாயம் தரித்தனர்
முகங்களில்
தாழ்ந்த விட்டங்களில்
தொங்கினர் கழுத்தில் சுருக்கிட்டு
மிஞ்சினவர் நடந்தனர்
தார் உருகும் சாலைகள் வழியே
மைதானங்களின் சப்தம் கேட்கும் வரை
மரங்கள் வீட்டுக் கூரைமீது
கும்பலாய் கையசைத்து கதறி
வென்ற அணியின் செருப்புகள் வாங்க
கடைகளில் நுழைந்தனர்
வெய்யிலின் புழுதியை வாளிநீர்
தெளித்தடக்கி வாசல்தோறும் கோலமிட்டு
திண்ணைக்குக்கீழே சாக்கடையில்
கொசுமருந்து பீச்சினர்
இலக்கமிட்ட வீடுகளில்
மின்சாரம் நீர்வர குழாய்களை
கூரையில் பதித்தனர்
சிலர்பேச பலர்பேச அனைவரும்பேச
கருவிகள் நாற்றிசையும்
செயல்வழி இருத்தலைக் காண்பிப்போம்
எனவே உலகம் சுற்ற
சூரியனை முந்திச் செல்ல விமானங்கள்
பூமியை உதறி இருட்டு அண்டம்புக
கணம்தான் தேவை
நட்சத்திரங்களை அடைந்து உயிரினம் தேடுவோம்
பிறகும் நீளுது எல்லைகள்
அலைமிதக்கும் சிற்றெறும்பின்
கரைத்தொலைவு போல

(91187)

Sunday, April 03, 2005

தானே சிதறும் பிம்பங்கள்

இவ்வார அசோகமித்திரனின் அவுட்லுக் பேட்டி சுவாரஸ்யமானது. தமிழ்நாட்டுப் பிராமணர்கள் யூதர்கள் போல அடக்குமுறைக்காளானார்கள் என்றும் அவர்கள் இயல்பாக தமிழகத்தில் இருக்க இயலவில்லை எனவும் இன்னும் பலவும் பேசியிருக்கிறார். தவறாது அதைப் படியுங்கள். அசோகமித்திரன் நான் மிகவும் மதிக்கும் எழுத்தாளர். பிடித்த எழுத்தாளர் கூட. அவர் இப்போது சொன்ன கருத்துகள் அவரைப்பற்றிய என் இலக்கியம் சார்ந்த மதிப்பை மாற்றிவிடப் போவதில்லை. தனிப்பட்ட வாழ்க்கையில் பச்சை பிராமணீய விழுமியங்களைக் கொண்டவராக அறியப்படும் மௌனி இன்னொரு பிடித்த எழுத்தாளர். இவர்கள் கதைகளையெல்லாம் படிக்கும்போது எனக்கு அவர்கள் பிராமணீய வாழ்க்கையைப்பற்றியே எழுதினாலும் அது ஜாதி சார்ந்த்த எழுத்து என்று என்றும் பட்டதில்லை. இலக்கியத்துக்கு ஒரு தன்மை
உண்டு. ஒரு சிறு இனக்குழுவினைப் பற்றிய பிரச்சனைகள், வாழ்வியல் துக்கங்கள் இவற்றைப்பற்றி மிகநுணுக்கமான விவரணைகளுடன் எழுதப்படும் புனைவுகள் மானுடத்தின் பொதுமைகளை தம்முள்ளே வியக்கத்தக்க வகையில் கொண்டிருக்கும். The more particular you get, the more general it becomes. இவ்வகையில் ஜாதிசார்ந்து, வட்டாரம் சார்ந்து எழுதப்படுபவை மிகுந்த வலிமையான ஆக்கங்களாக முழு மானுடத்தைக் காட்டுபவைகளாக மாறுகின்றன. தி.ஜானகிராமனின் எழுத்துகளைப் படிக்கும் எவருக்கும் அவர் ஐயர்கதை எழுதுகிறார் என்று தோன்றாதற்கு காரணம் இதுதான். ஆனால் அசோகமித்திரன் இவ்வாறு எழுதுபவர் அல்ல. அவர் முக்காலும் பொது மானிட சிக்கல்களை ஒரு சிறு கால, வாழ்நிகழ்வு அலகுகளில் எழுதிச் செல்பவர். அவருடைய வாழ்நாள் முழுவதும் கூட இருந்த (சென்னையிலேயே ஏறக்குறைய முழுவதும் கழித்திருக்கிறார் என பார்க்கும்போது) இத்தகைய பிராமண அடையாளம் வெளிகாட்டாமல் இலக்கிய சிருஷ்டி படைப்பதற்கு மகத்தான சுயக்கட்டுப்பாடும் மனப்பயிற்சியும் வேண்டும். அது அவருக்கு சாத்தியமாகியிருக்கிறது.
நான் எழுதுவது ஒரு குழந்தைக்குக்கூட மன அதிர்ச்சியையோ வருத்தத்தையோ தராமல் இருக்க முயற்சித்தேன் என்று சமீபத்தில் நடந்த பாராட்டு விழாவில் கூறினார்.
அதனாலேயே அவர் ஒரு மென்மையான மனம் வாய்க்கப் பெற்றும், ஜெயகாந்தனைப் போல உணர்ச்சிப் பிழம்பாய் ஏழைபாளைகளைப் பற்றியோ சமூகத்தின் எல்லைக்கோட்டு மக்களைப்பற்றியோ எழுத அவருக்கு வாய்க்கவில்லை எனப் புரிந்து கொண்டேன். நான் எத்தனை பெரிய முட்டாள் என்பது இப்போது புரிகிறது.

"The Brahmins gave up on government jobs, and in whatever they did have had to work harder to prove themselves. Natural discipline and thrift are brahminic qualities that have survived. If a nonbrahmin has a windfall he just spends it on meat and drink. The Brahmin always saves for the rainy day".

என்று சொன்ன அவரது பரந்த உள்ளத்தைப் பாராட்டுவது தவிர வேறொன்றும் செய்ய ஆகாது. சிலசமயம் இத்தகைய பேட்டிகளில் தொகுத்து எழுதும் போது சொல்லாத விடயங்களோ சொல்லியவை context மாறியோ மோசமான உச்சரிப்புகளாக தோன்றும் அபாயம் உண்டு. அப்படி நடந்திருக்கலாம் என்ற நம்பிக்கையில்தான் எனக்கு மேலே உள்ளதை அதிர்ச்சியில்லாமல் ஏற்க வேண்டியிருக்கிறது. உண்மையாகவே அதுதான் அவர் சொன்னது என்றால், what a jerk என்று கடந்து போகவேண்டியதுதான்.
அவருக்கு சொல்ல ஒன்றே ஒன்றுதான் தான் எனக்கு இருக்கிறது. அவரது நண்பர் எழுதிய கவிதையின் ஒரு பகுதி:

"
அவர்கள் அவர்கள்
பங்குக்கு
உதைகள் வாங்கும்
காலத்தில்
உனக்கு மட்டும்
கிடைத்தாற் போல்
சின்னக் கண்ணா
அலட்டாதே. "

(உதை வாங்கி அழும் குழந்தைக்கு, ஞானக்கூத்தன்)

அவுட்லுக் சுட்டி: அ.மி. பேட்டி

இந்தியாவில் அரசுமுறை துக்கம்!

போப் இறந்ததற்கு, இந்திய அரசு அரசுமுறை மூன்று நாட்கள் துக்கம் காக்கிறது.



புதிரான செய்தி இது. எதற்காக நமது நாடு அரசுமுறையில் துக்கம் காக்க வேண்டும்? அவர் ஒரு மதத்தலைவர் மற்றும் ஒரு நாட்டின் தலைவர் என்பது இருந்தாலும் அதற்கும் நமது இந்திய அரசுக்கும் என்ன சம்பந்தம். இது தேவையில்லாத ஒன்று என்பதே என் கருத்து. எந்த மதத் தலைவரும் ஜனநாயக முறைப்படி தெரிவு செய்யப் படுவதில்லை. அவரகள் இறந்தால் ஜனநாயக, மதச்சார்பற்ற அரசுகள் ஏன் துக்கம் காக்கவேண்டும்? அவர் நம் நாட்டைச் சேர்ந்தவர் என்ற ஒரு சாக்கு கூட இல்லை.

Saturday, April 02, 2005

இ.தி- 38A

(காசியின் மொழிஉணர் நிரல்துண்டு இதை ஒரு அங்கிலப்பதிவென்று கண்டு விரட்டிவிட்டது. எனவே இந்தத் தமிழ்ப் புலம்பலோடு திரும்பப் பதிக்கிறேன்)

Image hosted by Photobucket.com

Moral of the story:

Never debate with an incessant white noise generator set to max on all dials

இ. தி - 38

Image hosted by Photobucket.com

Moral of the story:

Never debate with an incessant white noise generator set to max on all dials

கணிதமும் அண்டமும்: ஏப்பிரல் 2005

அமெரிக்க கணிதக் கழகமும் (american mathematical society) பிற அமெரிக்க கணிதம் தொடர்புடைய நிறுவனங்களும் சேர்ந்து ஏப்பிரல்2005 மாதத்தை 'கணிதமும் அண்டமும்' பற்றிய சிறப்புப் பார்வைக்குரியதாக தேர்ந்த்தெடுத்த்கு உள்ளனர்.
இது தொடர்பான சுட்டி:

http://www.mathaware.org/announcement.html

தளத்தில் கீழ்க்கண்ட கட்டுரைகள் கிடைக்கின்றன.

1. கணிதமும் அண்டமும் (mathematics and cosmos)
2. அண்டத்தின் வடிவம் ( shape of the universe )
3. விண்ணக இயங்கியல் (celestial mechanics)
4. வெளி ஆராய்ச்சி (space exploration)
5. கருந்துளைகளிலிருந்து இருள்சக்திவரை (from blackholes to dark energy)

தளத்தில் இந்தச்சுட்டியில் இன்னும் பல்வேறு கட்டுரைகள் தளங்களுக்கான சுட்டிகளும் கிடைக்கின்றன.

http://www.mathaware.org/related.html



வரும் வாரங்களில் சிலவற்றை ஒட்டி தமிழில் எழுதலாம் என்று நினைக்கிறேன்

Friday, April 01, 2005

ஆத்மாநாம் நடத்திய 'ழ' கவிதை இதழைப்பற்றி நண்பர்கள் கேட்டிருக்கலாம். என்னிடம் பழைய இதழ்கள் சில தப்பித்து மீதமிருக்கின்றன.
அதிலிருந்த்து ஒரு கவிதை:


உடன்பாட்டின் நிதரிசனம்
-------------------------------------------

பேச்சின் உக்கிரத்தினால் உருகும்
பனியை கையைமடக்கிக் குவித்து
ஏந்த முயன்றாலும்
மாடிப்படியிலும் வரப்பிலும்
காட்டும் ஜாக்கிரதை
மறையும் சூரியனைக்கண்டு
தூரத்து இருட்டில் ஒளிந்து கொள்ளும்
மணிக்கட்டிற்க்குப் பயப்படும் கோழையாய்
வேகமாக ஸைக்கிளை மிதிக்கும்
கெஞ்சும் கால்களை மறுத்து
அனாதையாய் ஒதுங்கி
முன்நீளும் நிழலை
மனதிற் குறியாய்க் கொண்டு
புகையாய் மறையும் நேரத்தை
சபித்துக் கொண்டேன்
பாறையின் இடுக்குகளில்
ஒளிசிந்தும் மின்மினிகளுக்கும்
எதிரியின் கொண்டாட்டம்
ஒரு சோகமே


-- சத்யன்.
(ழ, செப்-நவம், 1979)

Wednesday, March 30, 2005

ஓ.வி.விஜயன்

மலையாளத்தின் பிரபல எழுத்தாளரும், கார்ட்டூனிஸ்டுமான ஓ.வி. விஜயன் இன்று காலமானார். அவருடைய சிறுகதைகள் சில தமிழில் மொழிமாற்றம் செய்யப்பட்டிருக்கின்றன. சுமார் இருபதுவருடங்களுக்கு முன் வந்த 'தற்கால மலையாளச்சிறுகதைகள்' ஒரு நல்ல தொகுப்பு. அவர் ஆங்கிலத்திலும் தொடர்ந்து கட்டுரைகள் எழுதினார். ஆங்கிலக்கட்டுரைகளின் நடை பொருள் அடர்த்தியாக, சுழிப்புகளுடன் செறிவுடன் இருக்கும். அவருடைய மலையாள நடையும் அப்படித்தான் என நண்பர்கள் சொல்வார்கள். அவருக்குப் பின் ரவிஷங்கர், பிரசன்னராஜன் போன்றோர் அதே தோரணையில் ஆங்கிலக்கட்டுரைகள் எழுதினாலும் அவரளவு இயற்கையாக செய்ய முடியவில்லை என்று எனக்குப் படுகிறது. இவர்களின் எழுத்தில் வலிந்து பெறப்பட்ட நடையே மிஞ்சுவதாக எனக்குப் படுகிறது. ரவிஷங்கர் ஒரு கார்ட்டூனிஸ்டும் கூட என்பதும் ஒரு இணச்செய்தி. கேரளம் தயாரித்து நாட்டில் பரவவிட்ட சங்கர் , அபு அப்ரஹாம், ஒவி விஜயன், ரவிஷங்கர், மஞ்சுளா என ஒருபாடு கார்ட்டூனிஸ்ட்கள் கவனிக்கப் படக்கூடியவர்கள்.

Thursday, March 24, 2005

ஹள்ளி திண்டி

(காசியின் நம் உணவுகள் பற்றிய பதிவை ஒட்டி இது. சென்ற வருடம் ராகாகியில் எழுதியது. நண்பர்களுக்காக மறு பிரசுரம்)

பெங்களூர் அதிவேகமாக நவயுகத்தின் அடுத்த தளத்திற்கு சென்றுகொண்டிருக்கிறது என்பதற்கு பல புறச்சாட்சிகள் தென்படுகின்றன.
அவற்றுள் ஒன்று தன் பின்நில குழுக் கலாச்சாரத்தை சந்தைப் படுத்துவது. ஒரு உதாரணமாக அதன் பொது உணவுக்கூடங்களைச் சொல்லலாம். Bull Temple என அழைக்கப்படும் பசவனகுடியில் இருக்கும் நந்தி கோயிலுக்கு முன்னால் ஹள்ளி திண்டி (சிற்றூர் சிற்றுண்டி) என்று ஒரு அருமையான கையேந்தி உணவகம் ஒன்று திறந்திருக்கிறார்கள். உடனே குடும்பத்துடன் நுழைந்து விட்டோம்.
என்ன உண்ண கிடைக்கிறது?

அக்கி ரொட்டி (அரிசிமா அடை)
ராகி ரொட்டி (ராகி அடை)
காய் ஹோளிகே
ஒப்பட்டு
கஜ்ஜாயா
அவரெகாய் உப்பிட்டு

என்று வரிசையாக நாட்டுப்புற உணவுப்பண்டங்கள். இதற்கு முன்னும் இவற்றை சாப்பிட மாணவர்களாயிருந்தபோது எங்கள் நண்பர்குழு கண்டுபிடித்த சிறு உணவகங்கள் மல்லேசுவரம், பளேபெட் போன்ற இடங்களில் இன்னும் இருந்தாலும் இப்படி நட்டநடு சந்தியில் பளபளப்பாக பார்த்ததில்லை. நிலக்கடலை சட்டினி இவற்றோடு சுவையாகவே கொடுக்கிறார்கள். ஏன் சென்னையில் இதுபோல் இல்லை?

'சக்கரப் பொங்கல்' இருக்கிறது. ஆனால் அங்கே எல்லாமே அரிசி, அரிசி, அரிசி தான். தமிழன் வேறு தானியங்களையே மறந்து விட்டானா என்ன? (இப்போது அந்த சக்கரப் பொங்கலையும் மூடிவிட்டு அந்த இடத்தில் மதுரை முருகன் இட்டிலிக் கடை திறந்திருக்கிறார்கள். இதுவும் ஒரு அரிசி அடிப்படைவாதக் கடைதான்.)

சிறு வயது நினைவுகளிலிருந்து இதோ ஒரு மெனு:

1. சோள தோசை (அரிசிக்கு பதில் சோளத்தை =மக்காச்சோளமல்ல, நல்ல நாட்டுச் சோளம்- ஊறவைத்து, மற்றபடி உளுந்து எல்லாம் எப்போதும்போல்).
2. மக்காசோள உப்புமா
3. தினை முறுக்கு (ஐயா, இதை சாப்பிட்டு இருக்கிறீர்களா?. அரிசி முறுக்கை அப்புறம் திரும்பியும் பார்க்க மாட்டீர்)
4. ராகி பக்கோடா
5. சாமைச் சோறும் பருப்புக் கீரையும் (ஹும். )
6. பாசிப்பருப்பு உருண்டை (வெல்லம் சேர்த்த இனிப்பு)

இப்படி எத்தனையோ.

இந்த கௌரவப் ப்ரசாதம் ... எப்போ கிடைக்குமோ.


(ஏறக்குரைய ஒரு வருடம் முன்பு மல்லேச்வரத்திலும் ஹள்ளி மனெ என்று ஒன்று திறந்து உள்ளார்கள். சென்றால் விடாதீர்கள்)

Monday, March 21, 2005

ஜெயகாந்தனும் ஒரு சிறுவனும்:

முதலில் ஜெயகாந்தனுக்கு வாழ்த்துக்கள். முப்பது வருடம் தாமதமாக கொடுக்கப்பட்ட விருது என்றால் அது இதுதான். ஒரு உன்னத கலை இலக்கியவாதி இதை ஏற்றுக்கொண்டு ஏதோ சம்பந்தமில்லாமல் முணுமுணுப்பதைத்தான் இனி கேட்க முடியும் என நினைக்கிறேன். ஒரு மனிதன் ஒரு வீடு ஒரு உலகம், உன்னைப்போல் ஒருவன், இவற்றுடன் என்னைப் பொருத்தவரை ஜெகே யின் வளர்ச்சியும் சாதனையும் முடிந்து விட்டது. அதுவரை அவர் சாதித்ததற்கு நாட்டின் மிகப் பெரிய எந்த விருதானாலும் அப்போதே அவருக்கு கொடுக்கப் பட்டிருக்கலாம். அவ்வளவுதான். பல்வேறு தாக்கங்களில் நான் எல்லாத்திசைகளிலும் இழுக்கப்பட்டபோது ஜெகே எங்கே இருந்தார் எனப்பார்க்கிறேன். கண்டதையும் படிக்கும் பழக்கம் கிராமத்து லைப்ரரியிலே பள்ளிப்பருவத்தில் ஆரம்பித்துவிட்டதால் அப்போதே ஜெகேயின் சிறுகதைகள் படித்துக்கொண்டிருந்தேன். தீவிர பக்திமானாக இருந்த எனக்கு அவர் 60களில் எழுதி நூலகத்தில் கிடைத்த கதைகளும் முன்னுரைகளும் பெரும் அதிர்ச்சியையும் கொஞ்சம் பயமும் கொஞ்சம் தைரியமும் அளித்தன. கிராமத்தில் நேரடியாகப் பார்க்க முடிந்த ஏழ்மை ஜேகே எழுதிய மனிதர்களை எங்களூர் மக்களாகவே நினைக்க வைத்தது. ஒன்பதாம் வகுப்பு கோடைவிடுமுறையில் அப்பா நல்லா இருக்கும் படிடா என்று ஒருமனிதன் ஒருவீடு ஒரு உலகம் புத்தகத்தைக் கொடுத்தார். தொடர்ந்து அவருடைய பிற நாவல்களை நூலகத்திலிருந்து படித்து தீர்த்தேன். அப்போது திமுக ஆட்சியிலிருந்தாலும், நாத்திகத்துக்காக யாரும் எங்களூர்ப்பக்கம் ஓட்டுப்போடவில்லை. சும்மா காங்கிரஸுக்கு மாற்றம் வேண்டும் என்றுதான் திமுகவிற்கு ஓட்டுப்போட்டார்கள். ஊரில் இருந்த ஒரே அந்தணகக் குடும்பத்தை நாங்கள் அந்தணர்களாகவே உணராததால் லைப்ரரியில் 'உண்மை' படிக்கும்போது எதை எதிர்கிறார்கள் என்றே புரியாமல் தவித்ததுண்டு. ஜெகே அப்போது ஒரு கம்யூனிஸ்டாக கூடவே(!) காங்கிரஸ்காரராக தன்னைக் காட்டிக்கொண்டார். அவருடைய திராவிட எதிர்ப்பு எதற்காக என்றே திராவிட ஆதரவாளர்களாக இல்லாமலிருந்த எங்களுக்குப் புரியவில்லை. இப்போது நினைத்துப் பார்த்தால் கிருபானந்தவாரியார் போன்றவர்கள் ஜெகேயை விட இன்னும் பெரிய 'திராவிட' எதிர்ப்பை இத்தனை ஆர்ப்பாட்டமில்லாமல் செய்திருக்கிறார்கள் என்பது தெரிகிறது. தமிழகம் முழுவதும் அலைவீசினாலும் திராவிட இயக்கம் என்பதன் தேவையோ தாக்கமோ எதுவுமில்லாமல் ஊரில் இருந்தோம். புதுமைப்பித்தனும், ஜெகேயும், தி.ஜானகிராமனும் பள்ளி வயதில் எனக்கு மிகப்பிடித்த எழுத்தாளர்களாக இருந்தார்கள். பிறகு கிளம்பியது ஒரு தலைமுறையையே உலுக்கி நாற்றிசையும் வீசிய அரசியல் நிகழ்வு. இந்திய ஜனநாயகத்தின் கழுத்து நெறிபட்ட எமர்ஜென்ஸி காலத்தில்
"...................
உலகப் பாறாங்கல்லில் நசுங்கினவன் முனகலின்
தொலைதூர எதிரொலிகூடக் கேட்கவில்லை
வார்த்தைகளின் சப்தங்கள்
அதற்குள்ளேயே மடிந்துவிடுகின்றன
எழுதுங்கள்
பேனா முனையின் உரசலாவது கேட்கட்டும்"
என்று இளைஞர்கள் அரற்றிக்கொண்டிருந்தபோது அற வியாக்கியானங்கள் கொடுத்து ஜேகே அடக்குமுறையை ஆதரித்துக்கொண்டிருந்தார். நண்பர்கள் என்ன நடக்கிறது என்று நம்பமுடியாமல் இருந்தோம். பின்னர் கல்லூரி சென்றபோது மண்டையில் அறிவியல் புகுந்து மதத்தைத் துறந்து கடவுளை மறுத்து இளமையின் உந்தத்தில் நாங்கள் விரைந்தோடிக்கொண்டிருந்த போது தரையில் இருந்து ஒரு அடி உயரத்தில் ஒரு பறக்கும் கம்பளத்தில் அமர்ந்து ஜயஜய சங்கர என்று ஜபித்தபடி எதிர்த்திசையில் இவர் பறந்து கொண்டிருந்தார். அப்போது அவரைப்பார்க்க வியப்பாகவும் பரிதாபமாகவும் இருந்தது. ஒரு புரட்சியாளராக கருதப்பட்டவர் போலீஸ் இளைஞர்களை வேட்டையாடியபோது சோவியத் பயணங்களும் கலைத்துவ மொளனமுமாக உருமாற்றம் பெற்றுவிட்டார்.
தமிழ் இலக்கியமோ
" சட்டம் தீட்டும் அவன் கையைக்
கட்ட எத்தனை நாள் ஆகும்
சங்கிலிகள் சிறைச்சாலைகள் எவற்...
செருப்புச் சத்தம் கூச்சல் குழப்பம்
சின்னாபின்னம் மீண்டும் காலியாய்"
என்று சிதைமாற்றம் அடைந்து பாதை திரும்பிக்கொண்டிருந்தது. அப்போது எழுதுவதற்கு ஒன்றுமில்லை என ஓய்வு பெற்றுவிட்டார். இவ்வளவு வருடங்கள் கழித்து இப்போது 'ஹரஹர..' எழுதியிருக்கிறார். படிக்க ஏதும் இருக்கும் இருக்காது என்று கருதி நூலையே வாங்கவில்லை.
அவ்வளவு பெரும் எழுத்தாளராக சிறுவயதில் தோன்றியவரின் ஆளுமை இப்போது இருக்கும் நிலை அவரது வயதினால் வந்த அயற்சியினால் மட்டும் தோன்றுவதல்ல.
(கவிதைகள்: ஆத்மாநாம்)


http://ntmani.blogspot.com/2005/03/blog-post_19.html

http://ntmani.blogspot.com/2005/03/blog-post_111131300969195999.html

தங்கமணியின் இவ்விரு பதிவுகளையும், நண்பர்களின் பின்னூட்டத்தயும் இத்துடன் சேர்த்து வாசிக்க சரியாக இருக்கும்

Friday, March 18, 2005

சொல்லாதே யாரும் கேட்டால் ...

தமிழக அரசியலில் இப்போது ராமதாஸ் திருமா கூட்டணி பலருக்கும் ஒருவித படபடப்பை ஏற்றியிருக்கிறது போலத் தெரிகிறது. நம் மேல்தட்டு பத்திரிக்கை அறிதிரிபுக் கூட்டணிகளோ, சொல்லவே வேண்டாம். மரம்வெட்டி என்று இன்னும் எத்தனை நாட்களுக்குத்தான் பேசமுடியும். இல்லை, சில ஆண்டுகளுக்கு முன் கூட நிஜமான இனப்படுகொலைகள் செய்த தேசியக் கட்சிகளின் தலைமைகளை தைரியமாக ஆள்வெட்டிக் கட்சியின் முகமூடி மாயாத்மா என்று சொல்ல மனம்தான் வருமா? ஜனநாயகம் எப்பொழுதும் சமூகத்தின் ஒரு மட்டத்திற்குக் கீழே கசியவிடாமல் பார்த்துக் கொள்வதில் படு ஜாக்கிரதையாக இருப்பார்கள் போலும். 67 ல் திமுக ஆட்சியைப் பிடித்தவுடன் ஆரம்பித்தது . எப்படியாவது இந்த மாநில நீரோட்டங்களைக் கலைத்து தேசீயப் பெரும்சாக்கடையில் தமிழகத்தை ஐக்கியப் படுத்திவிடவேண்டுமென்ற திட்டம். தமிழகத்தின் வடக்கு, கிழக்கு மாவட்டகளில் நன்கு பரவியிருந்த திமுகவின் நிலஉடைமை ஆளும் சாதிகள் பதவியைப் பிடித்தவுடன் சமுதாய மாற்றத்திற்கான பொறியை அணைத்துவிட்டு 'ஆட்சி' செய்ய ஆரம்பித்ததால் நிலஉடைமையற்ற கீழ்சாதி, தலித்துகளுக்கு ஏதும் போக்கிடம் இருக்கவில்லை. கம்யூனிஸ்டுகளோ தொழிற்சங்கமே வர்க்கப் புரட்சியை முன்னெடுக்கும் புல்டோசர் என்று சித்தாந்தம் பேசியதால் இயக்கமே வழக்கழிந்துபோக, அன்றைய நடுவண் அரசின் செயல்பொறிகள் எம்ஜியாருக்கு அரசியல் கட்சி அமைத்து அரவணைத்து அடைகாத்து தமிழர்களின் 'திராவிட' இயக்கங்களைப் பிரித்து சரிக்க முயற்சித்தனர். எம்ஜியாரின் ஓட்டுவங்கி, ஞானக்கூத்தனின் சொற்களில் சொல்லவேண்டுமானால், மேலே சொன்ன நரி-பரி மாற்றத்தில் விட்டுப்போன கீழ்சாதி மற்றும் தலித்துகள்தாம். எம்ஜியார் உயிரிருக்கும்வரை திமுகவினால் ஒன்றும் செய்ய இயலவில்லை. ஆனால் தேசியக் கட்சிகளும் காலூன்றமுடியாமல் தமிழக அரசியல் ஒரு 'திராவிட' இரட்டையர் ஆட்டம் ஆகிவிட்டது. இது கொடுத்த துயரில் எப்படியாவது மாநில அரசின் அதிகார வரையைக்குறைக்க ராஜீவின் டூன் உயிரிகள் கண்டுபிடித்த 'பஞ்சாயத்துகளுக்கு மத்திய அரசு நேரடி பண வினியோகம்' போன்ற நவகாந்தீயத் திட்டங்கள் முழுதுமாக தேசியக் கட்சிகளுக்கு பயன் தருமுன் வந்தது ஜனதா தள கூட்டாட்சி. அன்றைக்கு ஆரம்பித்து இன்றுவரை நாட்டின் பலமானிலப் பிரதிநிதியாக செயல்படவேண்டிய தலைவிதி நடுவண் அரசுக்கு வாய்த்துவிட்டதால் என்ன செய்தால் இல்லாத இந்த 'திராவிட' மாயையைப் போக்கலாம் என்று தேசியங்கள் திட்டம் போடுகின்றன. திமுக, அதிமுக இரண்டுமே இப்போது முழு பூர்ஷுவாக்கட்சிகள் ஆகிவிட்டதால் கீழ்த்தட்டு மக்கள் தமக்குள்ளே 'ஜாதிக்' கட்சி அமைக்காமல் அகில இந்திய ஜோதிக்கட்சிகளா அமைக்கமுடியும். ராமதாஸின், திருமா, கிருஷ்ணசாமி இவர்களின் பிரபலத்துக்கு காரணம் அவர்கள் சமுதாயத்தின் ஒரு மறக்கப்பட்ட தளத்தை முன்னிறுத்துவதால் தான். மற்றபடி பிற மாநில, தேசியக் கட்சிகள் ஏதோ ஜாதியில்லாமல் கொள்கைப் பிடிப்பில் உடும்புச் சக்கரவர்த்திகள் போலவும் அவர்களுக்கு மட்டுமே தேசபக்திக் கனல் உள்ளில் உறைவது போலவும் கட்டப்படும் பிம்பங்கள் சும்மா மாயாவாதம்தான். மாற்றங்கள் நிறைய அடிதடியில்லாமல் வந்துகொண்டிருக்கின்றன. இதில் ஆதிக்க ஜாதிகளின் கடைசிப் புகலிடம் கீழ்சாதி ஓட்டுகள் ஒரு திரட்சியாகமல் பார்த்துக்கொள்ளுதல். இதற்கு தயக்கம் எனது தாயகம் புகழ் ரஜினியோ இல்லை இன்னும் அமையாத பட்டாளத்தின் கேப்டனோ ஒரு கருவியாகச் செயல் பட்டால் எப்படியாவது இரு கழகங்களிடமும் தாம் கெஞ்ச வேண்டியதில்லை என தேசியக்கட்சிகள் நினைக்கின்றன. விதி வலியது. அதை யாரும் வெல்ல முடியாது.

மோடிக்கு விசா மறுப்பு

இன்றைய முக்கிய செய்தியாக:

அமெரிக்க அரசாங்கம் குஜராத் முதலமைச்சர் நரேந்திர மோடிக்கு டிப்ளொமாட்டிக் விசா மறுத்திருக்கிறது. முன்பே அளித்திருந்த சுற்றுலா, வணிக விசாவையும் திரும்பப் பெற்றிருக்கிறது.
"மத சுதந்திரத்திற்கு எதிரான செயல்களுக்காக" இந்த நிலை எடுக்கப்பட்டிருக்கிறது.

Saturday, March 05, 2005

0503

0503
-----------
முடிவு எடுப்பதும், மறுப்பதும்
மேசையில் கோளமாய் உறங்கும்
காலத்தை எழுப்பின பின்.
ஒன்றொன்றாய்த் தொங்கும் சட்டைகளைக்
கலைத்துத் தேடி அடைந்தேன் வாக்குறுதியை.
மின்சரடுகளூடே அலையும் சிலந்தியைத் தவிர்த்து
அமிழ்த்த, அறையைப் பொய்யால் நிரப்புகிறது
வெளிச்சம். மற்றவர் நிர்ணயித்த வடிவங்களில்
சதுர ரொட்டிகளைச் சாப்பிடுவது போதாதா.
புகைதான் எரிகிறது போல் காட்டும் சூரியனை
அறைந்து மூடினேன். திருப்பத் திருப்ப எதிர்க்காமல்
சுழலும் நீர்க்குழாயின் இணக்கக் குமிழ்.
கடமையைச் செய்கிறதா அது. இல்லை
சவரக் கத்திபோல் தன்முழு பலமறியாது
முடி கொய்கிறதா. எவர் கொடுக்கும் தைரியத்தில்
நிற்கிறது இந்த வாசற் கதவு. வியந்துகொண்டே
நடந்தேன். சுண்ட மறுத்த நாணயங்களால்
படர்ந்திருக்கிறது நான் வந்த வழி.

Saturday, February 26, 2005

இ.தி. 37




தலைக்கு மேலே மேகம் இருந்தா மீன் மாட்டாதூன்னு என் ராசி. பசி வேளையிலே இது வேறே.

Friday, February 25, 2005

குடிமக்களும் தம் கொடியும்

நாராயண் கார்திகேயன் F1 கார்ப் பந்தயத்தின் போது அணியும் ஹெல்மெட்டில் இந்தியக் கொடியை வரையக்கூடாது என்று நமது அரசாங்கம் அறிவித்து விட்டது. இப்படி ஒரு அபத்தமான நிலைபாட்டை இந்தியா தவிர வேறேதாவது நாடு எடுத்திருக்கும் என்று நினைக்கவே முடியவில்லை.

எத்தனை மில்லியன் மக்கள் அகில உலகத்திலும் பார்க்கும் போட்டி இது. நாட்டின் பெயருக்கும் ஒரு சின்னத்திற்கும் எத்தனை இலவச விளம்பரம். இந்திய அரசு எத்தனை வர்த்தக கண்காட்சிகளையும் (Trade Fair) வேறு விளம்பரப் படையெடுப்புகளையும் நடத்தி இந்த அளவு 'இந்தியா' என்ர பிராண்டை பிரபல்யம் ஆக்க முடியும். யாராவது Brand Building ஆட்கள் இந்த மட இந்திய அரசுக்கு காதில் உரக்க கூவுவார்களா என்று தெரியவில்லை. வர்த்தக அமைச்சு இந்திய ஏற்றுமதிக்கு மாடாய் உழைப்பது இருக்க இப்படி இலவசமாய் வருவதையும் வேண்டாம் என்பதை என்னவென்று சொல்வது?
தன் தேசியக்கொடியை ஒரு குடிமகன் பெருமையுடன் ஹெல்மெட்டில் போட்டால் அதற்கு அவமதிப்பா? வெள்ளைக்காரன் ஆட்சிபோல இருக்கிறது. ஆமாம் ஜிம்மி ஹெண்றிக்ஸ், வுட் ஸ்டாக்கில் ஸ்டார் ஸ்பாங்கிள்ட் பேனர் வாசித்த மாதிரி இங்கே யாராவது செய்தால் அரசு என்ன செய்யும்? போடா அல்லது வாடா என்று சட்டம் சொல்லி ஜெயிலில் பிடித்து போட்டு விடுவார்களா?

(நாராயண் புகைப்படம் : நன்றி: (http://www.narainracing.com))

Wednesday, February 23, 2005

இ.தி. 36




" இப்பிடி குறுக்க ஓடி ஓடி இவனுங்களுக்கு சகுனம் சொல்றதுதான் வேலையா, மாட்டேன் போ. "

" இத பாருடா. அவனவனுக்கு விதிச்ச தர்மத்தை செஞ்சுதான் ஆகணும். இப்ப கேள்விகேக்காம ஓடு. "

Friday, February 18, 2005

இ.தி. 35

தமிழருக்கு ஜனநாயகம் புதிதல்ல

சோழர்காலத்து குடவோலை முறை தேர்தல் சாவடி

Wednesday, February 16, 2005

Tuesday, February 15, 2005

இந்தியாவின் அண்டையர் கொள்கை

இன்று இந்தியா தனது "neighbourhood policy" என கருதத்தக்க அண்டையர் கொள்கையை அறிவித்துள்ளது. வெளியுறவுச்செயலாளர் ஷியாம் சரண் இதை உரைநிகழ்த்தினார்.
" உலகிலேயே மிக வளர்ச்சிவேகமும் முன்னெடுப்பும் உள்ள நாட்டுப் பொருளாதாரங்களில் ஒன்றாக இந்தியாவினுடையது இருக்கிறது. இந்தியாவின் அண்டை நாடுகளான பாகிஸ்தான், நேபாளம், வங்கதேசம், பூடான், இலங்கை போன்றவை இந்தியா வழங்கக் கூடிய இந்த வளர்சந்தையில் பங்கெடுத்து தாமும் பொருளாதார வளர்ச்சி காண வேண்டாமா? "
தெற்காசியப் பிரதேசத்தின் 1.3 பில்லியன் மக்கள் அடங்கிய முழு திறந்த சந்தையின் சாத்தியக்கூறை அவர் வெளிப்படுத்தி இருக்கிறார். இந்தியாவின் பெரும் சந்தையை வரிவிதிப்புகள் ஏதுமின்றி திறந்து விடவும் இந்நாடு தயாராக உள்ளதாகவும் தெரிவித்துள்ளார். வெறும் சந்தையாக மட்டுமல்லாமல் இந்தியாவின் பொருள் வளர்ச்சியில் பங்குதாரராகவும் தாம் ஆகவேண்டும் என்று இந்நாடுகள் முன்வரவேண்டும் என்றும் கூறியுள்ளார்.
இதற்கு பதிலியாக இந்தியா தன் அண்டை நாடுகளிடம் என்ன கோருகிறது?
1. இந்தியாவின் மீது ஆயுதம்தாங்கிகள் தாக்குதல் நடத்தி பின் ஓடி ஒளிய தம் நிலப்பகுதிகளை பயன்படுத்த அவை அநுமதிக்கக் கூடாது.
2. இந்தியாவைப்பற்றி எதிர்பரப்புரைகளையோ வன்சொற்பிரயோகங்களையோ அவை உலக அரங்கில் வெளிப்படுத்தக்கூடாது.

இந்தியாவுக்கும் பாகிஸ்தானுக்கும் காஷ்மீர் பிரச்சனை, வங்கதேசத்துடன் வடகிழக்கு மாநிலங்களின் ஆயுந்தம்தாங்கிகளுக்கு புகலிடம் அளிப்பது பற்றிய பிரச்சினை, நேபாளத்துடனும் கிளர்ச்சிக்காரர்களுடனான பிரச்சனைகள் என பலவும் உள்ளன. ஈழப்பிரச்சனை பற்றி எப்போதும் போல் கருத்து இல்லை.

இந்தியா இப்போது இத்தகைய நிலைபாட்டை எடுப்பதற்கு சில காரணிகள் உள்ளன.
முக்கியமானவையாக:
1. இந்தியாவின் வேகமாக வளர்ந்து வரும் பொருளாதார பலம். இதை பலம் என்று தற்போது ஏற்றுக்கொள்ள இயலுமா என்று சொல்வது கடினம். குவிந்து வரும் அன்னியச்செலாவணி கையிருப்பு, பங்குச் சந்தையில் உள் வரும் அன்னிய முதலீடு, பொதுவான தொழில் வளர்ச்சி விகிதங்கள், விவசாய உற்பத்தி இவற்றைப் பார்க்க இந்தியா ஒரு முக்கிய வளர்ச்சிப் பாதையில் திரும்பியிருப்பதாகத் தோன்றுகிறது. இதை அடுத்த ஐந்தாண்டுகளுக்கான ஒரு வளர்ச்சியாக நிபுணர்கள் காணத்தொடங்கியுள்ளனர். அமெரிக்க வட்டிவிகித மாற்றங்கள், அது பன்னாட்டு முதலீட்டுச் சந்தையில் கொணரும் விளைவுகள், எரி எண்ணெய் விலையளவு போன்றவை இப்பார்வையை பாதிக்கும் எனக்கொள்ளலாம்.
2. இந்தியாவின் பொருளாதார முன்னெடுப்போடு அதன் பெரிய ராணுவ கட்டுமானம். இந்திய ராணுவ பலம் ஒரு சிறு வல்லரசின் அண்டைப் பகுதியை 'கவனித்துக் கொள்ள' ஏதுவான அளவில் இருப்பதாகவே பாதுகாப்புத் துறை நிபுணர்கள் கருதுகின்றனர். பாகிஸ்தான் தவிர்த்து (இதை அமெரிக்கா கண்டுகொள்ளும்) பிற குட்டி நாடுகளை இந்தியாவே சமாளிக்கும் என்பதும் இந்தக் கருத்தின் உள்வாசிப்பாகக் கொள்ளலாம்.

இதெல்லாம் இந்தியா தனக்குள்ளேயே இருக்கும் வேறுபாடுகளைச் சமன் செய்தால்தான் என்பது வெளிப்படை.
கடந்த இருபது ஆண்டுகளில் நடந்த திறந்த பொருளாதாரக் கொள்கையில் போட்டியின் முதற்சுற்றில் 'வென்றதாக' கருதப்படும் மாநிலங்கள் 'திராவிட' மாநிலங்களான நான்கு தென் மானிலங்கள் தான். இவற்றுடன் பழங்காலத்தில் 'திராவிட தேசங்களாக' அறியப்பட்ட மராட்டியமும், குஜராத்தையும் சேர்த்து, கூட பஞ்சாப் அரியானா - அவ்வளவுதான் நாட்டின் முன்னேறிய நிலப்பகுதிகள். திறந்த பொருளாதாரத்தின் மூலம் பயன்பெற்று நாட்டின் பொருளாதார என்ஜின்களாக இருப்பவை இவைதான்.
இவை இந்நிலையை எப்படி அடைந்தன என்று பார்த்தால் கொஞ்சம் பழைய சோஷலிசம் பேசுபவர்கள் சொல்வதைக் கேட்க வேண்டியது இக்கால தாராளமயவாத அறிஞர்களின் தலைவிதி என்பது நல்ல நகைமுரண்.
1. விவசாய நிலச் சீர்திருத்தம்
2. இலவச அடிப்படை, இடைநிலைக் கல்வி
3. பரந்துபட்ட இலவச மருத்துவ மனைகளின் மூலம் பொதுச் சுகாதார கட்டமைப்பு
4. அரசுமயப் படுத்தப்பட்ட அனைத்து கிராமங்களையும் அடையும் போக்குவரத்து, மின்சாரம்
5. மகளிர் சிறார்களை முன்னிருத்திய உணவுத்திட்டம்
6. மகளிர் கல்வி, சுகாதாரம் பற்றிய பரப்புரை.
கவனித்துப் பார்த்தால் மேற்கூறிய மாநிலங்கள் இவற்றையெல்லாம் ஏதோஒரு அளவில் இருபது வருடங்களுக்கு முன்பே ஏறக்குறைய செய்து முடித்திருப்பதைக் காணலாம். அதன் அடித்தளத்தில் அவை மிகச்சுலபமாக மேலே வந்து விட்டன. அறிவுஜீவிகளான நாம் அனைவரும் நகையாடி வெறுக்கும் நம் அரசியல்வாதிகளுக்கும் இதில் பெரும்பங்கு இருந்திருக்கிறது என்பதை மறக்கக் கூடாது.

இந்த மாநிலங்களைத் தவிர மீதமிருக்கும் பெரும்பான்மை மக்கள் நிறைந்த மாநிலங்களின் கதி என்ன? அண்டை நாடுகள் திறந்த சந்தையில் பங்கு பெருவது இருக்கட்டும். இந்திய மானிலங்கள் சமச்சீராக சற்றேனும் வளரவேண்டாமா? அதுவே பெரும் பணியாக முன்னிற்கும் போது இந்தக் குட்டி வல்லரசு மயக்கங்கள் சற்றே சீரணிக்க முடியாதவையாக இருக்கின்றன.

Saturday, February 12, 2005

இ.தி. 33




" மேல் லோகத்திலே தானே, ஏதோ கொஞ்சம் பரவாயில்ல. இப்பிடி சம்சார சாகர பாரத்தையும் தாங்க வேண்டியதில்ல. மத்தபடி சோத்துக்கு கஷ்டம்தான் ..."

Thursday, February 10, 2005

இ. தி - 32




" நாளைக்கி வடக்குத் தோட்டத்திலே கிணத்து வெட்டு முடிஞ்சுடும். நம்ம சின்னைய்யனும் கெளம்பி வந்துடுவான். அப்புறம் பாரு ஆட்டத்தை. "

Wednesday, February 09, 2005

இ.தி. 31





" சே. என்னடா இது., வலையிலயாவது இலக்கியம் படைக்கலாம்னா சூழல் விடமாட்டேங்குதே ...."

Monday, February 07, 2005

ஐன்ஸ்டைன், அறிவியல் ...

(இதைப்பற்றி விரிவாக எழுத ஆரம்பித்தேன். ஆனால் இப்போதைக்கு நேரம் காரணமாக இதுதான். மன்னிக்கவும். பின்னால் தொடர்கிறேன்)


பத்ரி, வெங்கட் இவர்களின் பதிவுகளின் தொடராக:


பத்திரிக்கைக் கட்டுரைகளைப் பற்றி சில பொதுவான குறிப்புகள்:
----------------------------------------------------------------------------------
பொதுவாக பத்திரிக்கைக் கட்டுரைகள் எடுக்கும் நிலைகள் பற்றி.

1, 'ஐன்ஸ்டைனுக்கு சரியாக கணிதம் தெரியாது'. இதைவிட மகத்தான ஒரு நகைச்சுவை இருக்கமுடியாது. அந்தக் காலத்தில் தேவைக்குப் போதுமான அளவுக்கு மேலேயே அவருக்கு கணிதம் தெரிந்தே இருந்தது. கணிதம் தெரிவது வேறு, கணிதவியலாளராக இருப்பது வேறு. அந்த வித்தியாசத்தை பத்திரிக்கைக் கட்டுரைகள் சரியாக வெளிக்கொணர்வதில்லை.

2.' ஐன்ஸ்டைன் ஒருவரே தனிச்சார்நிலைக் கோட்பாட்டையும், பொதுச் சார்நிலைக்கோட்பாட்டையும் கண்டுபிடித்தார்'.
முக்கியமான ஒன்று அறிவியல் ஒரு ஊர்கூடித் தேர் இழுக்கும் கூட்டு முயற்சிதான் என்பதை மறவாமல் இருப்பது. ஆனால் உரியவர்களுக்கு சரியான அளவில் புகழ் என்பதும் அறிவியலின் எழுதாத விதி.
அறிவியல் அதிலும் முக்கியமாக தனிவேட்டைக்காரன் அல்லது மரத்தடி ஞானம்காணும் ரிஷி போன்ற பிம்பம் கொடுக்கும் இயல்பியல், கணிதம் போன்ற துறைகளைப் பற்றிய பொதுஜன பத்திரிக்கைக் கட்டுரைகளில் தென்படும் தொனி மிகவும் ஏமாற்றமளிப்பது. இதுபோன்ற மனைவியின் அறிவைத் திருடினார், நண்பனின் மூளையை தனதாக்கினார் எனும் நிலைகளை உண்மை என கருதும் முன் சம அறிவு, ஒரே துறை சார்ந்த இருவரிடையே கருத்துப் பரிமாற்றம் 'கொடுத்து எடுக்கும்' முறையில் தான் பெரிதும் நடைபெறுகிறது. இதை பத்திரிக்கையாளர்கள் சரியாக உணர்ந்ததாகத் தெரியவில்லை.

பொதுசார்நிலைக்கோட்பாடு
------------------------------------------
1. ஹில்பர்ட், ஐன்ஸ்டைனுக்கு "ஐந்து நாட்கள்" முன்பாகவே பொதுசார்நிலைக் கோட்பாட்டை முடித்ததாக நம்பப் படுகிறது
2. ஹில்பர்ட் அந்த கட்டுரையை கோட்டிங்கன் அகடமிக்கு அனுப்புவதற்கு முன்னரே ஐன்ஸ்டைன்னுக்கு அதை அனுப்பியதாக நம்பப்படுகிறது.
(என் கார்ட்டூனில் இருக்கும் வேரியேஷனல் டெரிவேட்டிவ் இதுசம்பந்தமானதுதான். ஆனால் அதை 1901 ல் அந்தப் பெண்கள் பையில் வைத்திருப்பதாக காட்டியிருக்கிறேன். அந்த anachronism மும் ஜோக்கின் ஒரு பகுதி என்பதைத் தாழ்மையுடன் தெரிவித்துக் கொள்கிறேன். )
3. இந்த பொதுசார்னிலைக்கோட்பாட்டிந் கடைசிச் சட்டக அமைப்பில் ஐன்ஸ்டைன், க்ரோஸ்மான், ஹில்பர்ட் என மூன்று பெரும் அறிஞர்களின் பங்களிப்பும் இருப்பதாக பொதுவாக அனைவரும் கருதுகின்றனர்.

இந்த சர்ச்சையில் இம்மூவரில் எவருடைய புகழையோ, திறமையையோ எந்த அறிவியலாளரும் குறைத்து மதிப்பதாக தெரியவில்லை. முன்னர் கண்டுபிடித்தவருக்கு புகழ் சேரவேண்டும் என்பது அறிவியலின் எழுதாத செந்நெறிகளில் ஒன்றாக இருந்தாலும் பத்திரிக்கையாளர்கள் இதை ஏதோ சதிப் புலனாய்வு போல பார்க்கவும் எழுதவும் செய்கிறார்கள். சிலருக்கு வேலை வாய்ப்பாக இத்தகைய சதிகள் அமைந்தால் சரிதான்.

Saturday, February 05, 2005

"அன்றும் அன்றும்"

நீர்மழை பெய்தோய்ந்த நெடுங்காலை
நகரா முனையருகே
காத்திருக்கும் இரண்டில் ஒன்று
பதுங்கிக் கொண்டிருந்தது
எச்சரிக்கு முன்
எரிந்து போனான் இணைப் பயணி
மற்றொன்றின் உடல் சிதற
அழல் குழல் உமிழ்ந்து அகன்றேன்
உணர்பொறிகள் தெருவெங்கும் ஓலமிட

தொடர் அசைவைக் கண்டிறங்கும் சுழல்கோளம்
கால்சரவில் தொடுமுனைகள் உயிர்பறிக்க
கூர்சரங்கள் பெய்தோடும் நிழல்திரட்டு
பட்டும் வெடித்தும்
தொட்டும் துடித்தும்
மெய்தீண்டிப் படரும்
கரும்பச்சைத் தொடரரவங்கள்
மூச்சில் முகம் அழியும்
பேச்சில் வளை அதிரும்
ஊர் சூழ்ந்து மேல்விரியும்
ஒளிதுளையா மென்போர்வை

ஒன்றொன்றாய் அடுத்து அடங்கும்
ஆயிரமாயிரம் முனைப்பின் குறுஉருக்கள்

Thursday, February 03, 2005

இ.தி. 30

ஜூரிக் நகர கடைத்தெருவில், 1901 ஜூலை ஒரு நண்பகல் வேளையில்....





" பாத்து பத்திரமா வச்சுக்கோடி. அந்த ஐன்ஸ்டைன் பையனுக்கு கொஞ்சம் கை நீளம்..."

Tuesday, February 01, 2005

இ.தி-29



இயற்கையின் ஃபிராக்டல் எரிச்சல்கள்

புழு: என்ன இலையோ. கவ்வ சவுகரியமா ஒரு இடம் கிடைக்கமாட்டேங்குது ...

பூச்சி: புழுவா இது. தோல்ல ரத்தம்குடிக்க வசதியா வழுவழூன்னு ஒரு இடத்தையும் காணோம் ...

Friday, January 28, 2005

இ.தி -28





"Oh. no., The more you think about it the more freaky it gets ...."

[http://news.bbc.co.uk/2/hi/europe/4216431.stm]

Thursday, January 27, 2005

இ.தி-27



"உமணன் முன்னிரவில் பொதியுடன் புறப்படு என்கிறான். நீ சேற்றில் இனிதுழன்று என்னை ஆம்பல் மலர் கொணரப் பணிக்கிறாய். இப்படியாயிற்று போத்தின் வாழ்வு"

Wednesday, January 26, 2005

இ.தி. -26




Lisp is the red pill. -- John Fraser, comp.lang.lisp



" Choose wisely buddy. You are on your own"

" mumble...mumble...mumble... no seehash I presume..."

Monday, January 24, 2005

இ.தி- 25





"Look, I fought Tusken Raiders on Tatooine. You are from around here and how does one fight in these darned grasslands ..."
" Like it helps. I was drilling down subs filled with simbodies and these are commies in flesh..."

Sunday, January 23, 2005

பின்னால் வருபவர்கள்

நீண்ட வராண்டா
சுழலும் மாடிப்படி
தனித்த நெடும்பாதை
எங்கும் எப்பொழுதும்
பின்னால் வருபவர்கள்

முதுகின் பரப்பில்
உறுத்தும் பார்வைகள்
புறங்கழுத்தில்
காது மடல்படிப்பில்
சூழும் வார்த்தைகள்
உதிர்த்தபடி
என்றும் தொடர்ந்து
பின்னால் வருபவர்
ஒற்றைப்பனை
தொத்தி ஏற
பிருஷ்டத்தில் தலைஉரசி
உந்தி வருபவர்கள்
நீரில் பாய்ந்தால்
சுறாப்போல் முகர்ந்து
தடம்பற்றி வருவர்
பின்நெருங்கி

சிறகுவிரித்து புகைபீச்சி
உயரே விரைந்தால்
கண்ணெதிரில் திரையில்
புள்ளியாய்த்தோன்றி
பின்னர் விரிந்து
சிறகடியில் வெடிப்பவர்கள்
ஒவ்வொரு இலையிலும் நூறாய்த் தொங்கி
சாறு உறிஞ்சி சக்கை உதிர்ப்பர்
கூழாங்கல்லடியில் பதுங்கிக்காத்து
கால்பற்றி ஏறி தொடையைக் குத்றுவர்
விட்டுவரும் காலடிகளை
வெட்டி டப்பியில் அடைத்து
கண்ணாடி அறைபதுக்குவர்

ஓடத் துரத்தி
நிற்கக் காத்து
வீழ்கையில் சூழ்வர்
பின்னால் வருபவர்கள்


-ஜூலை, 84

Saturday, January 22, 2005

காமகுரா, ஜப்பான்

பதினைந்தாம் நூற்றாண்டில் வந்த ட்சுனாமியில் அடித்துச் செல்லப்பட்ட கோயிலில் இருந்த பெரும்புத்தர் (தைபுட்ஸு) சிலை -12ம் நூற்றாண்டில் வார்க்கப்பட்டது- இப்பொழுது வெளியில். காமகுரா, ஜப்பான்.





மற்றொரு கோணம்...

Friday, January 21, 2005

காட்சியும் சொல்லும்

சென்ற கார்ட்டூன் பதிவுக்குக்கான ஜெயஸ்ரீயின் பின்னூட்டம் சற்றே மனக்கசப்புடன் பதிக்கப்பட்டது தெரிகிறது. எழுத்துக்கள் ஆயிரம் வகை வந்தாலும் ஏதேனும் ஒரு காரணத்திற்காக அதே பொருளைப் பற்றிய ஒரு படம் ஒருவரை அதிகம் பாதிக்க வாய்ப்புள்ளது. இது ஏன் என்பது புதிர்தான். நடப்பு நிகழ்ச்சிகளைக் கொண்டு கார்ட்டூன் போடுவது இன்னும் அதிக மன வாட்டுதல்களை அளிக்கவும் கூடும். குறிப்பாக இறப்பு போன்ற மாற்றோரின் துயர்தோய்ந்த நிகழ்வுகளை அதிகவனமாகவே கையாளவேண்டியுள்ளது. நேரடியாக பிறர் துயரத்தை, செய்தியாகக் கையாள்வது எந்த நடப்பு ஊடகச் செயல்பாட்டிலும் பலகேள்விகளை எழுப்பக்கூடியதுதான். பிற மனிதனின் துக்கத்தை வார்த்தைக் கூட்டங்களிலோ, படவரைவுகளிலோ, புகைப்பட எழில்கோணங்களிலோ உடன் மாற்றிக்கொடுப்பது என்பது இன்றைய செய்தி ஊடகங்களின் தினசரிச் செயல்பாடுதான் என்றபோதிலும், ஒரு கொலையை எந்த வார்த்தைகளில் சொல்வது, எந்த கோணத்தில் படம் பிடிப்பது, எந்தக் கீற்றில் கார்ட்டூன் போடுவது? இதில் துறைச் செயல்திறமை ஒருபக்கம் இருந்தாலும் சகமானுடன் ஒருவனின் தகைமை பற்றிய மதிப்பின் செயலாகவும் இது உள்ளது. இதில் எனக்கென்று முழுமையான விடைகள் இல்லாவிட்டாலும் I would rather decontextualise than dehumanise. எடுத்துக்காட்டாக முந்தைய பதிவு. காஞ்சியில் இன்னொரு வைணவ மட அதிகாரி படுகொலை என்ற செய்தியைப் படித்தவுடன் ஏதாவது எழுதலாம் என்றே நினைத்தேன். ஆனால் எழுத்து இயல்பாக வருவதில்லை .தமிழ் தட்டச்சும் அறியாதது. அரைப்பக்க விடயம் எழுத அரை அல்லது முக்கால் மணிநேரம் ஆகிவிடும். அதே பெயின்ட் பிரஷ்ஷில் ஐந்து நிமிடத்தில் கார்ட்டூன், இரண்டு நிமிடத்தில் வலையேற்றம் என சடுதியில் வேறுவேலை பார்க்கப் போய்விடலாம். கார்ட்டூன் போட ஆரம்பித்தால் முதலில் தோன்றியது நான்கைந்து வைணவர்கள் ஊரைவிட்டு வெளியே ஓடுவது போன்ற ஒரு படிமம். தோன்றின உடனே அது சரியல்ல இன்னும் விலக வேண்டும் என எண்ணி, இரண்டொரு மிருகங்கள் திருமண்ணோடு ஓடுவது போலவும் பிற மிருகங்கள் நகைப்பது போலவும் தோன்றிற்று. அதுவும் மிக தாழ் உணர்சியானதாய்ப்பட்டதால் சரி, இயல்பிலும் புராணத்திலும் நாமதாரியான அணில் நினைவுக்கு வந்தது. அதையே வரைந்தேன். ஆனால் இந்த நிகழ்வுக்கான சுட்டியையோ, இணைச்செய்திகளையோ கூறத்தேவையில்லை என்றே நான் நினைத்தேன். அப்படியே இதற்கு முன்னும் பலமுறை செய்துள்ளேன். அதற்கு முக்கிய காரணம் decontexualisation தான். ஆனால் இதுவே ஒரு தேவையில்லாத மருண்மைக்கும் இட்டுச்சொல்கிறதோ என சந்தேகமாக இருக்கிறது. கார்ட்டூன்களின் subversive செயல்திறம் பற்றிச் சொல்லவேண்டியதில்லை. பேட் ஓலிபாந்த், கேரி த்ரூதோ போன்றோர் இந்த புஷ் மந்தியின் பாட்டனான ரீகனைக் காய்ச்சிய காய்ச்சை மறக்க முடியுமா. எமர்ஜென்ஸியின் போது தணிக்கை செய்யப்பட்ட அபு அபிரகாமின் பல வெள்ளைச் செவ்வகங்களை எவ்வளவு முறை கண்டோம். எண்பதுகளில், பம்பாயிலிருந்து வந்த ஸண்டே அப்சர்வரில் அன்றைய மஞ்சுளா பத்மனாபனும், ரவிகுமாரும் இளமையின் துடிப்பில் எவ்வளவு வரைந்து குவித்தார்கள். ஆனால் இன்றைக்கு கார்ட்டூன்கள் இந்தியாவில் சொல்லுந்தரமாக இல்லை. ஒரு பத்து ஆண்டுகள் ஸண்டே அப்சர்வர்-இல்லஸ்ட்ற்றேட்டட் வீக்லி-டெபொனேர் கொடுத்த படிப்பவனின் அறிவைக்குறைத்து மதிப்பிடாமல் எழுதிய எழுத்துக்களை பின்வந்த எப்பத்திரிக்கைகளிலும் காணமுடிவதில்லை. இப்படி அணில் ஆனை போடுவதற்கே இன்றைக்கு இணையத்தில் இந்தப்பாடு. கார்ட்டூன்களைப் பற்றிப் பேசினால் நேரம் போதாது. ஆனால் அந்தோனியோ போஹியாஸை காப்பியடித்து விகடனில் வரும் வேட்டி கரை வேட்டியை எனக்கு சுத்தமாகப் பிடிக்கவில்ல என்பதை மீண்டும் சொல்லியே ஆகவேண்டும் (முதலிலேயே சொல்லவில்லையா. பரவாயில்லை). எங்கோ துவங்கியது இங்கே வந்துவிட்டது.

Thursday, January 20, 2005

இ.தி.-24




" ஊருக்குள்ளே நாமதாரிங்க இருக்க முடியாத நிலைமை ஆயிருச்சே. அதுதான் கொஞ்ச நாள் இப்பிடி வெளியே இருந்துட்டுப் போலாம்னு வந்தேன் ..."