Sunday, January 23, 2005

பின்னால் வருபவர்கள்

நீண்ட வராண்டா
சுழலும் மாடிப்படி
தனித்த நெடும்பாதை
எங்கும் எப்பொழுதும்
பின்னால் வருபவர்கள்

முதுகின் பரப்பில்
உறுத்தும் பார்வைகள்
புறங்கழுத்தில்
காது மடல்படிப்பில்
சூழும் வார்த்தைகள்
உதிர்த்தபடி
என்றும் தொடர்ந்து
பின்னால் வருபவர்
ஒற்றைப்பனை
தொத்தி ஏற
பிருஷ்டத்தில் தலைஉரசி
உந்தி வருபவர்கள்
நீரில் பாய்ந்தால்
சுறாப்போல் முகர்ந்து
தடம்பற்றி வருவர்
பின்நெருங்கி

சிறகுவிரித்து புகைபீச்சி
உயரே விரைந்தால்
கண்ணெதிரில் திரையில்
புள்ளியாய்த்தோன்றி
பின்னர் விரிந்து
சிறகடியில் வெடிப்பவர்கள்
ஒவ்வொரு இலையிலும் நூறாய்த் தொங்கி
சாறு உறிஞ்சி சக்கை உதிர்ப்பர்
கூழாங்கல்லடியில் பதுங்கிக்காத்து
கால்பற்றி ஏறி தொடையைக் குத்றுவர்
விட்டுவரும் காலடிகளை
வெட்டி டப்பியில் அடைத்து
கண்ணாடி அறைபதுக்குவர்

ஓடத் துரத்தி
நிற்கக் காத்து
வீழ்கையில் சூழ்வர்
பின்னால் வருபவர்கள்


-ஜூலை, 84

3 comments:

Kangs(கங்கா) said...

//ஓடத் துரத்தி
நிற்கக் காத்து
வீழ்கையில் சூழ்வர்
பின்னால் வருபவர்கள்//

கவிதை அருமை.. பின்னால் வருபவர்களைப் பற்றி முன்னாள் போகிறவரின் சிந்தனை..

-/பெயரிலி. said...

நன்றாகவிருக்கிறது. மாடிக்கு பஸ்ஸ¤க்கும் சேர்த்து எழுதினாற்போல இருக்கிறது. எழுதிய ஆண்டை எண்ணத்திலே வைத்தால், நீங்கள் மிகவும் முன்னால் போயிருக்கின்றீர்கள் (கவிதை குறித்து ;-)) என்று தெரிகின்றது.

அருள் செல்வன் கந்தசுவாமி said...

ரமணி,
என் பழைய குறிப்புப் புத்தகங்களும் சில விடுதாள்களும் கிடைத்தன. எல்லாம் 87/88 வரை தோன்றியதை எழுதியவை. அதற்குப் பிறகு ஏதும் எழுதியதாக நினைவில்லை. இப்போது படித்தால் வெட்கப்படவேண்டியவைகளை கவனமாக தவிர்த்துக் கொண்டும் இருக்கிறேன்.:-)
அருள்