Monday, December 16, 2013

நமது நூலகம் - 3

நமது நூலகம் - 3

---------------------------
 7. ஆத்மாநாம் படைப்புகள்
பதிப்பாசிரியர்: பிரம்மராஜன்
காலச்சுவடு பதிப்பகம்
விலை ரூ 145

 'புதுக்கவிதை' என்று குறிப்பிடப்படாமல் கவிதை என்றாலே 'புதுக்'தான் என்றாகிவிட்ட காலத்தில் வந்த பல கவிஞர்களுக்கும் கவிதை சரியாக எழுத வாய்க்கவில்லை. ஆத்மாநாம் கவிதையை கவிதையாக எழுதிய சிலருள் ஒருவர். அநேகமாக அவருடைய அனைத்துக் கவிதைகளும் சில கட்டுரைகளும் ஒரு பேட்டியும் கூட இருக்கும் ஒரு நல்ல தொகுப்பு இது. இவரையெல்லாம் படிக்காமல் தமிழில் யாரும் தயவு செய்து இனி கவிதை எழுதாதீர்கள்.








8. எம் தமிழர் செய்த படம்
சு. தியடோர் பாஸ்கரன்
உயிர்மை பதிப்பகம்
விலை ரூ. 100

திரைப்படம்தானே தமிழரின் இப்போதைய ஒரே திரள்கலை ஊடகம், ஒரே கலைப்படைப்புச் செய்பொருள், ஒரே அறிவுசேர் மொழி, ஒரே இனக்குழு அடையாளம்? ஆனால் திரைப்படங்களைப் பற்றிய முறையான வரலாறோ, அடிப்படைக்கருதுகோள்களோ, கோட்பாட்டுச் செழுமைகளோ, சமூகவியல் கூராய்வுகளோ இன்னும் சரியாக தமிழில் வரவே இல்லை. அங்கொன்றும் இங்கொன்றுமான சில முயற்சிகளைத் தவிர. அவற்றுள் ஒன்று இது. தமிழ்த் திரை பற்றி ஒரு பறவைப் பார்வைக்கு ஏதுவான நூல். ஆரம்பநூல் எனும் வகையில் முக்கியமானதும் கூட.





9. சோழர்கால நிலவுடைமைப் பின்புலத்தில் கோயில் பொருளியல்
மே. து. ராசுகுமார்
மக்கள் வெளியீடு

தமிழக வரலாற்றில் மிக முக்கியமாக பேரரசு அமைத்தல், பெரும் சமயம் வளர்த்தல், உன்னதக் கலை வடித்தல் என பாரிய கூறுகள் கொண்ட காலம் சோழர்கள் காலம். அக்கால நிலவுடமை நிலை, அரசர், பிராமணர்கள், வேளாளர், பிற சாதியினர் என பலரிடையே இருந்த உறவு, அதிகார வலைப் பின்னல்களை அறிய தமிழும் நன்கு அறிந்தவரே நுணுக்கி அணுகமுடியும். அந்நோக்கில் பல தரவுகளைக் கொண்டு தொகுக்கப்பட்ட நீண்ட கட்டுரையின் நூல்வடிவம் என ஆசிரியரே ஒப்புக்கொள்ளும் நூல் இது.
நம் முன் யூகங்கள் பலவற்றை கேள்விகேட்கவும் செய்யும் நூல். இதைப்போன்ற ஆய்வுகள் இன்னும் நிறைய தமிழர் வரலாற்றை முன்னிட்டுச் செய்யவேண்டி உள்ளது.

Saturday, December 14, 2013

நமது நூலகம்-2


நமது நூலகம் - 2
------------------------------------------

4. காட்டில் ஒரு மான்.

அம்பை
காலச்சுவடு பதிப்பகம்
விலை ரூ 75

 எழுபதுகளிலும் எண்பதுகளிலும் தமிழிலக்கிய, சிறுபத்திரிக்கைகள் அறிமுகம் உள்ளவர்கள் அம்பையின் எழுத்துகளைத் தவராமல் எதிர்கொண்டிருப்பார்கள். பெண்ணியக்கூறுகள் பொதுவாகவே இந்தியமொழி எழுத்துகளில் மேலைநாட்டு இலக்கியம் போல் வெளிப்படையாக, எதிர்மறையாக, போராட்டமாக அன்றி உள்முகமாகவே வெளிப்பட்டிருக்கின்றன. தமிழில் அம்பையின் குரல் அப்படி முதலில் வந்தவற்றுள் ஒன்று.

பெண்ணியம் என்பது ஒரு குறுக்கும் சிந்தனைக்கட்டு அல்ல,  ஒரு உள்ளடக்கும் விரிசிந்தனைதான் என்ற தெளிவுடன் இவர் கதைகளை அப்படி வகைப்படுத்தலாம். தொண்ணூறுகளில் அவர் எழுதிய கதைகளின் தொகுப்பு இது.
'சிறகுகள் முறியும்' அம்பைக்கும் இதற்கும்தான் எத்தனை வித்தியாசம்.
------------------------------------------------------
5. தமிழர் உணவு

சே. நமசிவாயம்
உலகத் தமிழாராய்ச்சி நிறுவனம்
சென்னை
விலை ரூ. 70

 பத்து வருடங்களுக்கு முன்புகூட இல்லாத பலபுது உணவுகள், உணவுப் பொருட்கள் நம் அன்றாட
சமையலில் நுழைந்து விட்டன. பனீர், சீஸ் போன்ற பாலாடைக்கட்டிகள், ஸ்பாகட்டி, பாஸ்தா போன்ற
ஆதார உணவுகள் கசூரி மேதி போன்ற வாசனைப் பொருட்கள் என. மற்றொருபக்கம் உயர்விலைப்
பேரங்காடிகளில் சாமை, வரகு, தினை போன்ற கிராமங்களில் சங்ககாலத்திலிருந்து பயன்படும்
தானியங்கள் அதிகவிலையில் கிடைக்கின்றன.

வேகமாக மாறிவரும் நம் உணவுக் கலப்பில் பழங்காலத் தமிழர்கள் என்னதான் உண்டார்கள் என்பது சுவாரசியமான கேள்வி. அவர்கள் உண்ட தானியங்கள், இறைச்சிகள், பழங்கள் எனப் பார்க்கும் போது மலைப்பாகத்தான் இருக்கிறது.

மிக உபயோகமான அகரவரிசைப் பட்டியலுடன் கூடிய இலக்கிய மேற்கோள்களுடன் கூறும் நூல்.

-----------------------------------------------------------------------------------------------------
6. மழைக்காலமும் குயிலோசையும்           

மா. கிருஷ்ணன்
காலச்சுவடு பதிப்பகம்
விலை ரூ. 90

நம்மைச் சுற்றிலும் விலங்குகள் பறவைகளோடுதான் இன்னமும் வாழ்ந்துகொண்டிருக்கிறோம். இன்னுமொரு ஐம்பதாண்டுகள் கடந்தால் எப்படி நகரங்கள் மாறும் என்பது நம்மை சிந்திக்கவைக்கும் நல்ல கேள்வி.  அறுபது எழுபது ஆண்டுகளுக்கு முன் காட்டு,நாட்டு விலங்குகள்,பறவைகள் பற்றி அழகான தமிழில் எழுதப்பட்ட குறுங்கட்டுரைகளின் தொகுப்பு நூல். அழகான வரைபடங்களும் உண்டு. அனுபவித்துப் படித்தேன்.

 பள்ளி மாணவனாக இருக்கும்போது வாசிக்கக் கிடைத்திருந்தால் இன்னும் மகிழ்ந்திருப்பேன். ஆனாலும் அக்காலத்தில் தி.ஜ.ர மொழிபெயர்ப்பில் படித்த "குமாவுன் புலிகள்" இன்றும் மறக்கவில்லை. வீட்டில் பள்ளிசெல்லும் குழந்தைகள் இருந்தால் தவறாது வாங்கித் தாருங்கள். 

Friday, December 13, 2013

நமது நூலகம்-1


நமது நூலகம்-1
-----------------------------

  சென்னைப் புத்தகக் கண்காட்சி விரைவில் துவங்கப்போகிறது. என்னதான் மடிக்கணினி, கையடக்க அட்டைக்கணினி என வந்துவிட்டாலும் புத்தகம் வாங்கிப் படிப்பதுபோல எதுவும் வராது. புதிதாக புத்தகம் வாங்கத் துவங்கும் இளையோர் கண்களில் பல பழைய புத்தகங்கள் படாமலே போய்விடுகின்றன. அவற்றைப்பற்றிப் பேசவோ எழுதவோ கூட நிறையப்பேர் இல்லை. பல காலமாக நான் சேகரித்த சில புத்தகங்களை மிகமிகச் சுருக்கமான அறிமுகத்துடன் (நான்கைந்து வரிகள் மட்டுமே) இனி வரும் நாட்களில் தொடர்ந்து சுட்டிக்காட்ட முயல்கிறேன். சில பழையபதிப்புகள் இப்போது கிடைக்காமல் இருக்கலாம். நூலகத்தில் கிடைக்கலாம். இவை எல்லா இயல்களிலும் இருக்கலாம். ஆனால் தமிழ்ப் புத்தகங்கள் மட்டும்தான். பரந்துபட்டு வாசிக்கும் ஆர்வத்தைக் கூட்டவே இதைப் பயன்படுத்தப்போகிறேன். அபிப்பிராயங்கள் என்னுடையவை. இப்புத்தகங்களைப் படிக்கும் போது யான் பெற்ற இன்பம் பெருக பிறரும் என்பது மட்டுமே குறிக்கோள்.
(விலைகள், பதிப்பகங்கள் இப்போது மாறி இருக்கலாம்.)

------------------------------------
1. கைப்பிடியளவு கடல்
பிர்மீள் தருமு: ஔரூப் சீவராம்
மணி பதிப்பகம், சென்னை
விலை. ரூ. 8



தமிழின் தலைமைக் கவிஞர் என நான் நினைப்பவர். இவரின் முழுக்கவிதைத் திரட்டும் ஒரே நூலாகவும் கிடைக்கிறது. ஆனாலும் ஒரு நினைவூட்டலுக்காக இதைப் பதிக்கிறேன். இவருடைய கட்டுரைகள் பல்நோக்குக் கொண்டவையாயிருந்தாலும் தம்மில் மிக வித்தியாசமான நிலைபாடுகளாலும் அக்காலத்தில் நிலவிய இலக்கியஉலக அரசியலாலும் பெரிதும் சாய்மானமானவை. தமிழிலக்கிய ஆர்வமுடையர் எனத் தம்மைக் கருதும் எவரும் தவறாது படித்திருக்கவேண்டிய கவிஞர்.




-----------------------------------------
2. தொலைக்காட்சி: ஒரு கண்ணோட்டம்
  பியர் பூர்தியு
  (பிரெஞ்சு மொழியிலிருந்து நேரடித் தமிழாக்கம்: வெ. ஶ்ரீராம் )
   க்ரியா பதிப்பகம். சென்னை.
   விலை ரூ. 100



 இருபதாம் நூற்றாண்டு பல மானுட அறிவுத்துறைகளிலும் பெரும் பாய்ச்சல் நடந்த ஒரு நூற்றாண்டு. அதேபோல் பெரும் வாணிகம் கட்டியெழுப்பிய நாடுகடந்த திரள்சமுதாயக் கலை நுகர்வும் வளர்ந்த காலம். இப்பெரும் மாற்றங்களை ஆய்ந்து அறியத் தேவையான கோட்பாட்டுக் கட்டமைப்புகளை பெரிதும் ஐரோப்பிய அறிஞர்களே செய்துள்ளார்கள். இதில் பிரெஞ்சு அறிஞர்களுக்கென தனி இடம் உண்டு. இவர்களுள் மெய்யியலாளர், சமூகவியலாளர், விமரிசகர்- பியர் பூர்தியு ஒருவர்.

  தற்காலத் தமிழ் நாட்டில் அனைவரும் தொலைகாட்சி ஊடகத்தில் குடும்பம் குடும்பமாக அமுங்கி சுகித்துக்கொண்டிருக்கும் போது தொலைக்காட்சி ஓயாமல் கொட்டும் பிம்பங்களின் சமிக்ஞைகள் தாம் எவை? அவை எத்தகைய அழகியலையும் அதிகாரக் கட்டமைப்பையும் வளர்த்தெடுக்கின்றன? இக்கேள்விகளை அணுக நவீன அணுகுமுறைகளை, சிந்தனை வழிகளை நாம் கைக்கொள்ளவேண்டியுள்ளது.
தொலைக்காட்சி ஊடகத்தைப் பற்றிய புரிதலில், அதைப்பற்றிய நமது விமரிசனத்தைக் கூராக்குவதில் மிகத் துணையிருக்கும் ஒரு நூல்.
--------------------------------------------------

3. கட்டுரைக்கனிகள்
கிருபானந்த வாரியார்
குகஶ்ரீ வாரியார் பதிப்பகம், சென்னை.
விலை. ரூ.45



கிருபானந்த வாரியாரின் உரைகளும் கட்டுரைகளும் சுவையானவை. நம் கடவுள்கள், நம் சிந்தனையை ஆண்டுகொண்டிருக்கும் புராணங்கள், இடைக்காலச் சமயப் பேரெழுச்சி படைத்த தமிழிலக்கியங்களின் உள்ளுறை அழகுகள் இவற்றை சில பத்தாண்டுகளுக்கு முன்கூட தமிழகம் இயல்பாக நூல்கள் வழியாக கற்க முடிந்தது. இப்போது அது இயலாது. இவருடைய எளிமையான ஆனால் ஆழமான விளக்கங்களை என்னால் இப்போதும் ரசித்துப் படிக்க முடிகிறது - என் தனிப்பட்ட நம்பிக்கைகளை ஒருபுறம் தள்ளிவைத்து விட்டு.

Monday, October 28, 2013

நவீன அறிவியல் எனும் சப்பை மேட்டர்




 நவீன அறிவியல் எனும் சப்பை மேட்டர்

 இன்று இந்து ஆங்கில இதழில் ஒரு செய்தி வந்திருந்தது. கிண்டி பொறியியல்
கல்லூரியில் இலந்திரனியல்-தகவல்தொடர்புத்துறையில்  இளநிலைப் பொறியியல் பயிலும் ஒரு மாணவரைப் பற்றி. அவர் தன்னுடைய செமஸ்டர் தேர்வுகள் சிலவற்றில் தேறாமல் நிலுவையில் வைத்திருந்த போதிலும் இயல்பியலில் ஆராய்ச்சிக் கட்டுரைகள் எழுதியிருக்கிறார்; அவற்றை பன்னாட்டு ஆய்வு இதழ்களில் பிரசுரம் செய்திருக்கிறார், அவருடைய ஆய்வுக்கட்டுரைகளை முன்னிட்டு கலிபோர்னியா-பெர்க்கிலி பல்கலைகழகம் அவருக்கு முனைவர் பட்டம் கொடுத்துள்ளது. இவ்வாறெல்லாம் அந்த செய்தியில் (  சுட்டி  ) படிக்கும் போது வியப்பாகத்தான் இருந்தது.

       எனக்கு இயல்பியலில் ஆர்வம் உள்ளதால் சரி இவர் என்னதான் ஆய்வு செய்திருக்கிறார் என்று பார்க்க அடங்கா வேட்கையில் கூகுளில் சிறிது தேடினேன். அவர் எழுதி பிரசுரமான  இரண்டு கட்டுரைகளின் பிரதிகள் கிடைத்தன. கட்டுரைகளைப் பார்த்தவுடன் ஒரே நிமிடத்தில் இதுதொன்றும் சரியில்லையே என்று தெரிந்து விட்டது.
1. ஒரு கட்டுரையின் தலைப்பு:
பொருண்மையீர்ப்பு விசையின் வினை மூலம் ஒடு இலந்திரனின் உட்கட்டமைப்பு ( சுட்டி )
2.  இன்னொன்று:
ஒரு கருந்துளையின் உள்ளே ஒரு இலந்திரனின் செயல்பாடு ( சுட்டி )

 இதில் முதலாவது கட்டுரையின் தலைப்பே திகைப்புதான். ஏனென்றால் இப்போதுள்ள அறிவின் படி ஒரு எலக்ட்ரானுக்கு உட்கட்டமைப்பு என்று ஒன்றும் இல்லை. இன்னும் கொஞ்சம் பணிவாகச் சொல்லவேண்டுமானால் ஒரு எலக்ட்ரானின் உட்கட்டமைப்பு பற்றியெல்லாம் பேசுமளவு கோட்பாட்டளவிலோ அல்லது செய்முறை ஆய்வளவிலோ நவீன இயல்பியல் இன்னும்  முன்னேறவில்லை. இதைப்பார்த்தவுடனே இது அறிவியல்
அல்ல வேறே ஏதோ என்று தெரிந்து விட்டது.

 இரண்டாவது கட்டுரை தலைப்பு எதுவும் சொல்லவில்லை. எனவே  முதலில்
வழக்கமாகக் கொடுக்கும்  ஆய்வுக்கட்டுரையின் கதைச் சுருக்கத்தைப் படித்தால் அதைவிடக் குழப்பம். ஆற்றல் அழியாக் கோட்பாடெல்லாம் மீறப்படுகிறது என்பது போல சொற்றொடர்கள். 'இது ஆவுறதில்லை' என்றே தெரிந்து விடுகிறது.

      இரண்டு கட்டுரைகளையும் முழுதாகப் படித்தேன். இதில் 'புரிந்து கொள்ள' ஏதுமில்லை.. -முழு உளரலில் புரிய ஏதுமில்லை என்பதுபோன்ற பொருளில். ஆய்வுக்கட்டுரைகள் எழுத ஒரு முறை இருக்கிறது. ஒரு மொழி இருக்கிறது. இலக்கணப் பிழைகளையோ, சொற்பிழைகளையோ சொல்லவில்லை. நவீன அறிவியல் எல்லாப் புலங்களிலும் சில பரிமாற்ற உள் ஒழுங்குகளைக் கொண்டுள்ளது. கோட்பாடுகளைப் பேசவும் அவற்றை ஒட்டியும் வெட்டியும் விவாதிக்கவும் வழிமுறைகள் உள்ளன. இவை யாரும் படிக்கவியலாத மொழியில் செயப்பாட்டு வினைகளோடு இருக்கவேண்டும் என்றெல்லாம் நினக்க வேண்டாம். சரளமாக பேச்சுமொழிபோலவே எழுதப் பட்ட ஆய்வுக்கட்டுரைகளே இப்போது இயல்பியலில் அதிகம். ஆனால் அடிப்படைக் கோட்பாடுகளில் அலட்சியமிருந்தால் அபத்தம் இருந்தால் அவை ஒரே வீச்சில் குப்பைக் கூடைக்குத்தான் போகும்.

     தற்கால நவீன அறிவியல் விளையாட்டல்ல. அதை பற்றி கருத்துகளையும் போகிற போக்கில் வசைகளையும் நம் தமிழ்ச் சிந்தனையாளர்கள் அள்ளி வீசுவது நாளும் நடக்கிறது. அதற்கெல்லாம் எதிர்வினை செய்து நமது நகைச்சுவை உணர்வைக் குறைத்துக்கொள்ளக்கூடாது. ஆனால் இது போல அறிவியல்,பொறியியல் துறைகளில் உள்ளிருந்தே அதுவும் மாணவப்பருவத்திலேயே தவறுகள் நடந்தால் அதைக் கண்டிப்பதும் விவாதிப்பதும் மிகவும் முக்கியம்.



Saturday, August 03, 2013

வி. தட்சிணாமூர்த்தி


 வி. தட்சிணாமூர்த்தி
-----------------------------------------




    நான் மலையாளப்பாடல்கள் கேட்கத் துவங்கியதே ஒரு குட்டிக்கதை. ஆறாம் வகுப்பு படிக்கும்போது ஒரு காய்ச்சல் வந்துவிட்டது. காய்ச்சல் என்றால் அப்படியொரு காய்ச்சல். வருவதும் போவதுமாக இருந்ததால் இரண்டுமாதங்கள் பள்ளிக்கே போகவில்லை. அப்பா,அம்மா,தம்பிகள் எல்லோரும் பள்ளிகளுக்குச் சென்றுவிட வீட்டில் தாத்தாவும் நானும் மட்டும்தான். கதைப்புத்தகம் படிப்பது, ரேடியோ கேட்பது இந்த இரண்டும்தான் எனக்கு முழுநேர பொழுதுபோக்கு. ரேடியோவில் மதியநேரம் இலங்கை வானொலியில்தான் பாட்டு வரும். அதில் ஆசியசேவையில் 3:45-4:15 அரைமணிநேரம் மலையாளப் பாட்டுகள் மட்டும். ஒருநாள் நோண்டிக்கொண்டிருக்கும்போது கண்டுபிடித்து ஏனோ பிடித்துப்போய் தினமும் மலையாளப்பாட்டு கேட்பது வழக்கமாகிவிட்டது. அப்போது கேட்ட பல பாடல்களும் மனதில் அடியாழத்தில் இன்றும் ஆழ்ந்து கிடக்கின்றன. மலையாள பழைய பாடல்கள் அனைத்தும் இப்படித்தான் எனக்கு அறிமுகமாயின. இளையராஜாவெல்லாம் வராதகாலம். தமிழ்ப் பாடல்களைவிட அப்போதைய மலையாளப் பாடல்கள் ஜேசுதாசின் குரலில் நீரொழுக்குப் போல விரிந்து படர்ந்து என்மதிய நேரங்களை நிறைத்து இருந்தன. அவற்றில் எனக்குப்பிடித்த பெரும்பாலான பாடல்களுக்கு இசை வி. தட்சிணாமூர்த்தி. திரை இசையின் மகோன்னதத்தின் ஒரு முக்கிய இழை- வெங்கடேஸ்வரன்ஐயர் தட்சிணாமூர்த்தி.



இன்று முழுவதும் அவருடைய நினைவாக அவர் பாடல்களையே கேட்டுக்கொண்டிருக்கிறேன்.
 என்றோ காணாமல்போன அந்த கிராமத்துச் சிறுவனின் நினவாகவும்தான்.

சரஸ்வதியுடன் தொடங்குவோம்
1. மனசிலுணரு உஷசந்த்யயாய்
மாயாமோஹினி சரஸ்வதே



http://www.youtube.com/watch?v=zw_UqBZH1wA

2. மலையாளப்பாட்டென்றாலே முதலில் நினைவுக்கு வரும் காட்டிலே



http://www.youtube.com/watch?v=gMaILGMTW80

3. ஆதிரராவிலே அம்பிலியோ



http://www.youtube.com/watch?v=nx9J0_2KelY

4. ராஜமல்லிகே ஹ்ருதயவனிகயில்


http://www.youtube.com/watch?v=dfwX7kAqtu4

5. ஸ்வப்னகள் ஸ்வப்னங்களே
http://www.youtube.com/watch?v=tC_AP11nEYg

6. மலையாளநாட்டின் தேசியகீதம்

http://www.youtube.com/watch?v=0DLaVEQgYiE

7. சந்த்யகெந்தினு சிந்தூரம்
http://www.youtube.com/watch?v=qYSO7Na1N9Y

8. தேவீ ஸ்ரீதேவீ தேடி வருந்நூ ஞான்
http://www.youtube.com/watch?v=esP-BWF8odA

9. என் மந்தஹாசம் சந்த்ரிகையாயெங்ஙில்
http://www.youtube.com/watch?v=dQG4FWIIiMA

10. நிண்டெ மிழியில்
http://www.youtube.com/watch?v=9xj3Ynjy33g

ஒரு கிராமத்தில் வாழ்ந்த சிறுவனின் மனதில் மொழி,மதம்,இனம், நாடு என்ற ஏராளமான வேறுபாடுகளும் குப்பைகளாக வந்து குடியேறுமுன் உட்புகுந்த இசை. அவ்விசைவாணர்களுள் முதன்மைநிலையிருந்த ஒருவரின் நினைவுகள் அலையும் இம்மாலை. வெளியில் ஓயாத மழை. சென்றுவாருங்கள் தட்சிணாமூர்த்தி ஐயா.

(அனைத்துப் பாடல்களையும் உட்கோர்த்து அளிக்கவில்லை. 5 ஆம் பாடலிலிருந்து சுட்டிகளை தோய்த்து ஒட்டி யூடியூப் விழியத்துக்குச் செல்லவும்)


Monday, July 01, 2013

பொறியியல் ப்ராஜக்ட் ரிப்போர்ட், அறிவியல் பயில்முறை




 
    "இப்போ ஐன்ஸ்டைன் ஸ்பெஷல் தியரி ஆஃப் ரிலேட்டிவிட்டி கண்டுபிடித்தாரே அது முழுக்க அவரே யோசிச்சதா" எதிரிலிருந்த மாணவி கேட்டாள்.
 இரண்டு மாணவிகள், ஒரு மாணவன். வேறுவேறு பொறியியல் கல்லூரிகளில் கடைசி வருடம் படிக்கிறார்கள். ஒரே ப்ராஜக்ட் செய்கிறார்கள்.
  கேள்விக்கு நான் பதில் சொல்லாமல் ம்ம் என்றேன்.
" அவர் அதை சிந்தித்துக்கொண்டிருக்கும் போது அவருக்கு என்னென்னவெல்லாம் தோன்றியிருக்கும். அவருக்கு முன்னால் இருந்த பலருடைய சிந்தனைகளும் வந்து போகும்தானே."
"கண்டிப்பா"
"அதேபோலத்தானே நியூட்டனுக்கும். டார்வினுக்கும்."
நான் 'ம்' கொட்டிக்கொண்டே கேட்டேன்
இன்னொரு பெண் இடை மறித்து, " நீங்கள் இதைப்பற்றி என்ன நினைக்கிறீர்கள். சொல்லவே இல்லை?"
என்று மடக்கினாள்.
"நீங்க முடியுங்க. சரியாத்தானே சொல்கிறீர்கள்" என்று பொதுவாக ஏதோ சொல்லிவைத்தேன்.

அவர்களுடைய ப்ராஜக்ட்டை விவரித்துக்கொண்டிருக்கிறார்கள். நம் அபிப்பிராயங்கள் இதில் இப்போது முக்கியமில்லை.அடுத்த அரை மணிநேரத்துக்கு மாற்றி மாற்றி மூன்று பேரும் அவர்களுடைய ப்ராஜக்டை விளக்கமாக எடுத்துச் சொன்னார்கள். நான் நடுவில் அவ்வப்போது உற்சாகப்படுத்தும் சொற்களை மட்டும் சொல்லிக்கொண்டு அவர்களுடைய சிந்தனை செல்லும் திசைகளையும் ஒழுங்கையும் கவனித்துக்கொண்டிருந்தேன்.
   
    அவர்கள் முக்கியமாக நிறுவமுயற்சிப்பது என்னவென்றால் நாம் நமது சிந்தனைகளை நமதே என நினைத்துக்கொண்டிருப்பது சரியல்ல. எப்படியும் மற்றவர்களுடைய சிந்தனைகளும் உள்ளடங்கியவையே நமது அனைத்துச் சிந்தனைகளும். அது பொதுவாக அனைத்துத் தளங்களுக்கும் உண்மை. கண்டுபிடிப்புகள், படைப்புகள் அனைத்தும் இவ்வகையே.
 
    சரி இப்படி ஒரு பொதுவான ஒரு கோட்பாடு (என்று வைத்துக்கொள்வோம்) ஒன்றை அவர்கள் வகுத்துவிட்டார்கள். இதையெல்லாம் வளவள என்று எழுதி இதாங்க ரிப்போர்ட் என்று கொடுக்கமுடியாது. இதை இன்னும் கோட்பாடு எனும் நிலையிலிருந்து ஒரு குறிப்பிட்ட திசையில் கோட்பாட்டின் எல்லைகளோடு நிறுவ வேண்டும். இதை எப்படி நிறுவுவது? இந்த இடத்தில் நீங்கள் தொடர்ந்து படிக்காமல் நிறுத்தி சில நிமிடங்கள் இதை சிந்தித்துப் பாருங்கள். நீங்களாக இருந்தால் என்ன செய்து இதை நிறுவுவீர்கள்? சில நிமிடங்கள் செலவிட்டால் உங்களுக்கே இந்த சிந்தனைப்போக்கின் ஆழம் புரியும்.

  அதற்குப்பிறகு அவர்கள் தாம் செய்யும் சில சோதனைகளை விளக்கத் தொடங்கினார்கள். ஒரே தலைப்பில் சிலர் தனித்தனியாக எழுதுதல், கலந்து பேசி எழுதுதல், இணை சேர்ந்து எழுதுதுதல் என்று பல படிவங்களைச் சேர்த்து அதை எப்படி தொகுத்து அலசலாம் என்று ஒரு திசை ஆய்வு.விக்கிபீடியா போன்ற தொகுப்புக் களஞ்சியங்களில் 'பொருள்' பொதிந்திருப்பதும் புலப்படுத்துவதும் போன்ற இன்னொரு திசைத் தரவுகள்.இப்படி செல்கிறது அவர்கள் பொறியியல் ப்ராஜக்ட் வேலை.
 பேசிமுடிந்ததும் எனது கேள்விகளைக்கேட்டேன். குழந்தைகளின் குறிப்பிட்ட சில கூட்டுச் செயல்களை வரைப்படுத்தி அணுகுவதன் மூலம் எப்படி அவர்களுடைய முதல் சோதனையை இன்னும் கூர்மையாக்க, எளிமையாக்கவும் கோட்பாட்டின் ஒரு பகுதியை விடுவிப்பதாகவும் அமைக்கலாம் என்றும் விளக்கினேன். பியாஜெ-யின் (jean piaget) சில ஆய்வுகளை இதற்கும் பயன்படுத்துவது எப்படி என்று விவாதம் சென்றுவிட்டது. இது அவர்கள் இன்னும் வேலைசெய்துகொண்டிருக்கும் ஒரு விஷயமாதலால் இத்துடன் நிறுத்திக்கொள்கிறேன்.
   
    இதுவரை சொன்னதை யார்வேண்டுமானாலும் உட்கார்ந்து ரூம் போடாமலே யோசித்து விடலாம். ஆனால் அறிவியல் 'செய்வது' என்பது இதற்குபிறகுதான் துவங்குகிறது. அது அறிவியல் முறை. அதை தொடர்ந்த பயிற்சியின் மூலமே செம்மையாக்க முடியும். அந்த வகையில் நம் பொறியியல் மாணவர்களின் ப்ராஜக்ட் ரிப்போர்ட் என்பது ஒரு முக்கியமான பயிற்சி. மீண்டும் கவனப்படுத்த:

பொறியியல் ப்ராஜக்ட் ரிப்போர்ட்டின் நோக்கமும் வரையறையும்:
----------------------------------------------------------------------------------------------------
1. சிறு வயதிலேயே தமக்கான கோட்பாடுகளை அமைத்துக் கொள்ள பயிற்சி எடுத்தல்
2. அதை சரியா தவறா என்று  நிறுவ குறிப்பான எடுத்துக்காட்டுகளைக் கண்டுபிடித்தல், தேர்ந்தெடுத்தல்
3. எடுத்துக்காட்டுகளை கூர்மையாகவும் ஆழமாகவும் கவனமாக்கி அவற்றின் எல்லைகளை நிறுவுதல்
4. எடுத்துக்காட்டுகள் பல வகையான புறத் தூண்டல்களுக்கும் எப்படி எதிர்வினை செய்கின்றன என நோக்கல், வகைப்படுத்துதல், கணித்தல்.
5. இவற்றையெல்லாம் தொகுத்து தாம் தொடங்கிய கோட்பாடு இவற்றுக்கு இயைந்து வருகிறதா இல்லையா என சீர்தூக்கல்.அதை ஆவணப்படுத்துதல்.
6. இவையனைத்தையும் சீராக ஒழுங்காக மற்றவர்க்கு கற்றுத்தர, விளக்க பயிலுதல்.

     மிக அருமையான மாணவர்கள். அப்படியே கண்கூசும் அறிவுச்சுடர் ஜொலிக்கிறது என்றெல்லாம் இல்லாமல் சாதாரணமான, நிறைய, விடாமல் தொடர்ந்து கடிஜோக் அடிக்கும், விளையாட்டுப் போக்கானவர்கள். ஆனால் புதிதாக சிந்திக்கவேண்டும் என்ற ஆர்வம் இருக்கிறது. ஐன்ஸ்டைன் டார்வின் போன்ற அறிவியலின் பெரும் 'கடவுளர்' களைப் பற்றியே அவர்களின் சிறப்பு என்ன, அப்படி ஒன்று இருக்கிறதா என்று குடைந்து நோக்கும் ஆர்வமும், பயமின்மையும் இருக்கிறது. தமக்குத் தெரிந்தவற்றை பிறருடன் பகிர்ந்து குற்றங்குறைகளை ஏற்று வாதித்து தம்மை மேன்மைப்படுத்தும் முனைப்பு இருக்கிறது. இதெல்லாம்தான் தேவை. 199.99/200 என்பதில் எந்த அர்த்தமும் இல்லை.  நானே கண்டுபிடித்தேன் நானே பெரும் படைப்பாளி என்பதிலும் ஒரு பொருளும் இல்லை.

Monday, May 20, 2013

இ.தி.-62. ; ஓசி பாட்டு கேப்பீங்க?





" அண்ணாச்சி, பாட்டு சீ.டி தானே வாங்கினேன். ஏன் ஒரு பட்டை மாத்திரையை கூட குடுக்கறீங்க?"
" ஒரு தரம் பாட்டுக் கேக்க ஒரு மாத்திரையைப் போட்டாத்தான் பாட்டு கேக்கும் தம்பி.  இனிமே காசு குடுத்தவந்தான் கேக்க முடியும். சூப்பர் ஐடியா இல்லை?"


Tuesday, April 23, 2013

மகாமீள் மற்றும் எதிர்வரும் வளைபாதைக்கான எச்சரிக்கை.



நண்பர்களுக்கு, இது ஒரு தனிப்பதிவல்ல. முன்பு நான் எழுதிய பதிவுகளில் சிலவற்றுக்கான சுட்டிகள் மட்டுமே. இவற்றை இங்கு தொகுக்க ஒரு தேவை இருக்கிறது.
என்னுடைய முக்கியமான ஆர்வம் மானுட அறிவியலும் அழகியலும். மேலும் இவற்றுக்கான மெய்யியலும். இந்தப்பார்வையிலேயே இதை வெளிப்படையாகச் சொல்லாமலே துண்டு துண்டாக எழுதியவற்றை இப்போது ஒரு தொடருக்காக தொகுத்துக் கொண்டுள்ளேன்.
எனக்காகவே தொகுத்தது. பிறருக்கு சுவாரசியமிருந்தால் மகிழ்ச்சி. ஓவியம் பற்றிய சென்ற பதிவை ஒரு துவக்கமாகக் கொண்டு தொடரலாம் என நினைக்கிறேன்.




1. கேசிஎஸ் பணிக்கரின் ஓவியக்காட்சி
http://www.arulselvank.com/2004/11/blog-post_17.html

2. எழுதும் போது சொற்களைத்
http://www.arulselvank.com/2005/07/blog-post_13.html

3. ஓ.வி.விஜயன்
http://www.arulselvank.com/2005/03/blog-post_30.html

4. சொல், காட்சி, பொருள் - 2
http://www.arulselvank.com/2006/10/2.html

5. சாம்பற் கோட்டை
http://www.arulselvank.com/2010/06/blog-post.html

6. அறிவின் உண்மை
http://www.arulselvank.com/2008/08/blog-post.html

7. அன்றாட மெய்யியல்
http://www.arulselvank.com/2008/07/blog-post_11.html

8. புன்னகையில் மின்சாரம் - கலையும் வடிவும்.
http://www.arulselvank.com/2008/07/blog-post_15.html

9. இமையாதிருக்கும் நெடும்பொழுது
http://www.arulselvank.com/2008/05/blog-post_10.html

10. Microsoft Paint - மைக்ரொசாப்ட் பெயின்ட் (குறிப்புகள்)
http://www.arulselvank.com/2007/07/microsoft-paint.html

11. கார்டூன்கள் - சில கருத்துகள்...
http://www.arulselvank.com/2007/07/blog-post_29.html

12. இத்தகைய கொள்கைப் பிரகடனங்க
http://www.arulselvank.com/2005/07/blog-post_112136416707236511.html

13. வெறும் தள உயரம்
http://www.arulselvank.com/2005/07/blog-post_14.html

14. பாயிண்டலிஸத்தின் எதிர்காலம் பற்றி
http://www.arulselvank.com/2005/07/blog-post_112127495742193693.html

15. வரி, எழுத்து, சேமித்தல்.
http://www.arulselvank.com/2007/03/blog-post.html

16. இரண்டு நிமிடத்தில் கார்ட்டூன் போடுவது எப்படி?
http://www.arulselvank.com/2007/07/blog-post_27.html




Sunday, April 21, 2013

பழைய விளம்பரம். என்றுமான அழகியல்.



(நண்பர் @mislexic வலைத்தளம் " நீரோட்டம்: அழகிய படங்களுடன் கூடியது" ( http://www.neerottam.com/artpost/  ) பல பழைய வணிக பொதுஜனக் கலைப் படங்களைக் கொண்டுள்ளது. சமீபத்தில் பார்த்த ஒரு படத்தைப் பற்றிய சிறு பார்வை)




  ஒரு சாதாராண விளம்பரம்தான். அதுவும் வேளாண்மை செய்ய உரம் செய்யும் நிறுவனம் செய்யும் விளம்பரம். தீபாவளி மலரில். தீபாவளிக்கும், வேளாண்மை மகசூலுக்கும் எந்தத் தொடர்பும் இல்லை.  அப்போதெல்லாம்  தீபாவளி மலர் படிப்பவர்கள் பெரும்பான்மை கிராமத்தவரோ விவசாயிகளோ இல்லை. இந்த மலரை வாங்குபவர்களில் முக்கால்வாசிப்பேர் இதை ஒரு நொடிக்கு மேல் பார்க்கமாட்டார்கள். ஆனாலும் இந்த விளம்பரத்தைச் சிறப்பாக செய்யவேண்டும் என அதை வனைவு செய்த குழு முயன்றிருக்கிறது. ஒரு ஓவியர், ஒரு காபி ரைட்டர், ஒரு க்ரியேட்டிவ் ஹெட் இருந்திருக்கலாம்.

  ஓவியர் என்ன செய்திருக்கிறார் என்று பார்ப்போம். மிக எளிமையான ஒரு பெண்ணின் முகமும் தலைமீது நெற்கதிர்க்கட்டும் மகிழ்வுடன் கன்னத்தில் வைத்திருக்கும் கையும்தான் படத்தில். படம் வரைந்த முறையை மட்டுமே இப்போது நாம் பார்க்கப்போவதால  இந்த விளம்பரம் முழுமையாக என்ன சொல்ல வருகிறது, சொல்வதை சரியாகச்சொல்லுகிறதா என்றெல்லாம் நாம் பேசப்போவதில்லை. படத்தை மட்டும் பார்க்கலாம்.

  படத்தில் வரைதல் (drawing)  தீற்றல் (painting)  இரண்டுமே உண்டு. நம்மில் பலரும் பொதுவாக ஓவியர் என்றால் வண்ணங்களைக்கொண்டு தீற்றுபவர் என்றே ஒரு யூகம் வைத்திருக்கிறோம். ஆனால் வெறுமனே பென்சிலைக்கொண்டோ க்ரேயான் போன்ற மெழுகுவண்ணங்களைக் கொண்டோ வரைபவரும் ஓவியர்கள் தாம்.  ஒரு தீற்றல் ஓவியரும் வரைதலை மிகச்சரியாகக் கற்கவேண்டும். சில புகழ்பெற்ற ஓவியர்களின் தீற்றல்களில்கூட வரைகலை சரியாக இல்லாததைப் பார்க்கலாம். இன்னொருமுறை காட்டுகளுடன் விளக்குகிறேன். வரைதல் ஒரு ஓவியத்தின் முதுகுஎலும்புபோன்றது. ஓவியத்தின் முழு வலுவுமே அதுதான் எனக்கூறலாம். முக்கியமாக பொருண்மையான உலகைக்காட்டும் உருவஓவியங்களில் (figurative painting) வரைதலின் கூறுகள் பயிற்சியின்றி வனையப்பட்டிருந்தால் காணவே உறுத்தலாக இருக்கும். அருவ ஓவியங்களும் (abstract painting)  இதற்கு விதிவிலக்கல்ல! அருவஓவியத்திற்கும் வரைதல் முக்கியம் - இது ஒரு விதத்தில் வியப்பாக/முரணாகத் தோன்றலாம். ஆனால் இதுவும் ஒரு ஓவியத்தின் சிறப்பை,அழகியலை கணிக்கையில் கருத்தில் கொள்ளத்தக்கதே. இதைப்பற்றியும் பின்னால் எழுதுகிறேன்.

 இந்தப்படத்தில் வரைதல் தீற்றல் இரண்டுமே உண்டு. பொதுவாக ஒரு தீற்றல் ஓவியத்தை வனையும் போது ஓவியத்தின் பொருண்மைப் பகுதிகளை (மனிதர்,விலங்கு,மலை,மரம்,மேசை,தெரு என்று பிற பொருண்மைகளைச்சுட்டக்கூடிய பகுதிகளை) முதலில் வெளிக்கோடுகளால் பென்சில் கொண்டு வரைந்து கொள்வர்.பின்பு அதன் உட்புற பரப்புகளை வண்ணங்களால் பிரஷ் கொண்டு தீட்டுவர். முடிவாக பொருண்மைகளின் வெளிக்கோடுகளை சில இடங்களில் சிறப்ப்பாக, எடுப்பாகத் தோன்றுமாறு மீண்டும் பிரஷ்ஷால் கோடுகளால் தீற்றுவர். இதுவே பொதுவாக தீற்றல் ஓவியங்களை வனையும் பாணி.
 
 சீன ஜப்பானிய மரபு ஓவியங்களில் முழுவதுமாகவே  பிரஷ்ஷைக் கொண்டே வரைதலையும் தீற்றலாகவே வனையும் பாணி உண்டு. இப்பாணி ஓவியங்கள் மிக அபாரமான இயங்குவிசை உள்ளமைந்த ஓவியங்களாகும். பிரஷ் தீற்றல்கள் அவற்றின் கனம்,அகலம்,நீளம்,முடியும்வகை எனப் பல கூறுகளிலும் ஒரு ஓவியனின் முழு ஆற்றலையும் வெளிப்படுத்தக்கூடியன. இக்கூறுகள் யாவும் மேலை நாட்டு இயற்கைப்பாணி நீர்வண்ண ஓவியங்களிலும் உண்டு. அவற்றினும் பார்க்க சீன/ஜப்பானிய பாணி ஓவியங்களில் சிறப்புத்தன்மையும் உண்டு.
 
     மீண்டும் இப்படத்திற்கே வருவோம். இவ்வோவியம் வெறும் பிரஷ்கொண்டே தீற்றல் முறையில் வனயப்பட்டுள்ளது. ஒரே வண்ணம்தான். கருப்பு.  அந்த நீலம்கலந்த பாசிவண்ணம் பெரும்பாலும் பின்னணியாகவே உள்ளது.(அப்பெண்ணின் பொட்டும் அதே வண்ணம்!). வெள்ளைத்தாளில் வெறும் கருப்பு வண்ணம்கொண்டே வனையப்பட்ட இவ்வோவியம் ஒரு முக்கியமான அம்சத்தில் ஜப்பானிய வகையில் சேர்ந்து விடுகிறது. அது கண்கள் வரையப்பட்ட விதம். மாங்கா எனப்படும் ஜப்பானிய வகைக் காமிக்ஸ்கள் தனித்தன்மையான ஓவிய வரைமுறையும்  அழகியலும் கொண்டவை.
   
மங்காவைப் பற்றி பேசினால் நாள் முழுக்கப் பேசலாம். விக்கிபீடியாவில் விவரமாக மங்காவின் வரலாறு வடிவம் பற்றியெல்லாம் படிக்கலாம்.
 மங்கா/மாங்கா என அழைக்கப்படும் காமிக்ஸ் வடிவம் ஜப்பானுக்கே உரியதாக இருந்தது. இப்போது உலகளவு ரசிகர்கள் இருப்பதால் ஒரு உலகளாவிய வரைகலை வடிவமாகவே காணப்படுகிறது.

 கண்களை மிகவும் கவனப்படுத்தி வரைவது மாங்காவின் அழகியலின் ஒரு முக்கிய கூறு. இப்படத்தில் ஏனோ பொதுவாக இந்திய ஓவியங்களில் காணப்படாத அளவு நுணுக்கமாக பெண்ணின் கண்கள் வரையப்பட்டுள்ளன. ஒரு விளம்பரப்படத்துக்கு இந்த நுணுக்கம் அதிகம்தான். ஓவியர் ரசித்து செய்திருக்கிறார் என்பதே இதன் மூலம் நாம் அறிவது. கை விரல்களில் இட்டிருக்கும் மருதாணியின் தீற்றலைக்கவனியுங்கள். சற்றே மேற்புரமாக வளைந்தபடி ஒரே தீற்றலில் வரையப்பட்டவை அவை. முப்பரிமாணம் காட்ட ஒரு கோடு போதும். அது எப்படி வரைவது என்பதே திறமை.
 
வெள்ளை வெளியைப் (white space)  பயன்படுத்துதல் சீன/ஜப்பானிய முறையின் இன்னொரு கூறு.இப்பெண்ணின் முகத்திலும் அதுவே அழகு. இசையில் நிசப்தங்களின் பங்கு ஓவியத்தில் வெள்ளைவெளி. கவிதையில் கூறாமல் விட்ட சொற்கள். அனைத்துக் கலைகளுக்கும்  அழகியல் வெளிப்பாடு வேறு. அழகியல் உட்கட்டமைப்பு ஒன்றே. இதைப்பற்றிப் பேசினால் ஒரு யுகம் ஆகும். பின்பு.

Thursday, April 11, 2013

ராபர்ட் கெராச்சி (Robert.M.Geraci ) உரையும் விவாதமும்





          இன்று (10-04) சொற்பொழிவு ஒன்றுக்குப் போயிருந்தேன். ராபர்ட்.எம்.கெராச்சி எனும் நியூயார்க் நகர பேராசிரியர் "அமெரிக்க, இந்திய தொழில்நுட்பத்தில் சமய வழக்குகள்: அடிப்படை, பயன்முறை" என்பதைப் பற்றிப் பேசினார்.
 (Robert.M.Geraci "Fundamental and applied: religious practices in U.S. and Indian technology")
   
 வாரம் ஒருமுறை நடக்கும் இதுபோன்ற கூட்டங்களில் இந்த வாரம் இவர். இது ஓர்ஆய்வு/அறிவியற் கூடத்தில் நடப்பதால் பொதுவாக மாணவர்கள் சுறுசுறுப்புடன் கேள்விகள் கேட்டுத் துளைத்துவிடுவார்கள். இன்றைக்கோ படுசுவாரசியம். இவரும் ஒரு பேராசிரியராக இருப்பதால் ஒரு ஆய்வுக்காகவே இந்தியா வந்திருந்தார்.
  கெராச்சி ஒரு சமயப்புலப் பேராசிரியர். அறிவியலின் வரலாறு மற்றும் சமூகவியல், மானுடவியல் போன்ற பிறதுறைகளிலும் வல்லுனர்.இவருடைய முந்தைய புத்தகமான "பேரழிவுச் செயற்கை அறிவு" எனும் பரவலாக வாசிக்கபட்டு பாராட்டைப் பெற்றது.
அவருடைய இன்றைய சொற்பொழிவின் சுருக்கமாக அழைப்பிதழில் இருந்தது:
   In the 20th and 21st centuries, debates have raged over the respective domains of religion and science, often resulting in misguided attempts to identify how religion and science interact with one another. Such attempts are misguided in that 1) they are generally too limited in their explanatory power and 2) they presume that the practices of religion and the practices of science are separate and thus able to come into contact with one another as independent entities. In fact, science, technology, and religion are far more like plies in a length of yarn than they are like (non?)overlapping circles; therefore, it is pointless to look for “pure science” or “pure religion.” Examples from apocalyptic dreams of immortality and resurrection in U.S. technology and the integration of cultural traditions in Indian technology reveal how religion, science, and technology are intertwined, pulling one another first one way, then another. These are not religious ideas appended onto science and technology, but are perfectly ordinary examples of human scientific practice.

   முக்கியமாக அறிவியல், சமயம் என்று இரண்டும் தனித்தனி அல்ல. அவை தனித்தனியாக பிரிந்திருப்பதைப்போலவும் அதனால் அவை இணையும் புள்ளிகள் எவை என்பதைக் கண்டறியும் முயற்சிகள் போலவும் சென்ற நூற்றாண்டுகால வாதங்கள் இருந்தன. ஆனால் அவை இரண்டும் தனித்தனியானவை அல்ல, சமய வழக்குகளில் அறிவியல்த்தன்மை உண்டு அதிலும் முக்கியமாக அறிவியல் வழக்குகளில் சமயத்தின் கூறுகளும் உண்டு. இதில் இரண்டாவதை நிறுவவே தன் தற்போதைய முயற்சிகள் என தெரிவித்தார். அமெரிக்காவில் ரோபோடிக்ஸ் ஆய்வகங்கள் சிலவற்றில் தான் நடத்திய ஆய்வைச் சொல்லும்போது அங்குள்ள அறிவியலாளர்கள் ஆய்வகங்களில் தானியங்கி செயற்கைப் பாம்பு கார்கள் என முற்றிலும் அறிவியல் செய்துகொண்டிருந்தாலும் வெளியே உரைகளிலும், புத்தகங்களிலும் மிகுந்த சமயக் கூறுகளைக்கொண்டபடியே பேசினார்கள் என குறிப்பிட்டார். இங்கு இவர் சொன்னதை பொதுவாக அறிவியலாலர்கள் உரையாடல்களில் நிறைய சமயக் கருத்துகளை சாதாரணமாக தெளித்துப் பேசுவதை குறிப்பிடுகிறார். எனவே சமயமும் அறிவியலும் தனித்தனி என்று சொல்ல இயலாது அறிவியல் 'செய்யும்' போதே சமயமும் உள்ளே இருக்கிறது என்று சொன்னார். (இதற்கு பின்னணியில் இவரது முந்தைய புத்தகத்தை வைத்தே பார்க்க இயலும் அதைப் பின்னால் செய்வோம்).
 
    இப்படி அவர் பேசிவந்தபோது முதலில் அறிவியல் என்றால் என்ன சமயம் என்றால் என்ன என்பதை இந்த உரைக்காக நீங்கள் வரையறுங்கள் இல்லாவிட்டால் நீங்கள் சொல்வது குழப்பம்தான் என்று அவையினர் இடைமறித்தார்கள். அதற்கு அவர் சரி அறிவியல் என்பதை "மீஇயற்கையைத் (supernatural) தவிர்த்த உலகை அறியும் முயற்சி எனக்கொள்ளலாம்" எனவும், சமயம் என்பதற்கு டேவிட் சிடெஸ்ட்டர் எனும் சமய வரலாற்றியலாளர் சொன்ன : "மீமானுடத்திற்கும் குறைமானுடத்திற்குமிடையே மானுடனாக இருப்பதற்கான ஒரு பேச்சுத்தீர்வு" என்பதையே சமயம் என தான் ஏற்றுக்கொள்வதாகவும் கூறினார்.
(David Chidester:religion: ‘The negotiation of what it means to be human with respect to the superhuman and subhuman"). இப்படி வரைமுறையாக அவர் அறிவித்தாலும் பின்வந்த உரையில் அவர் கூறியவை பெரும்பாலும் இதற்குள் அடங்கவில்லை. அதை பலரும் சுட்டிக்காட்டிக்கொண்டே வந்தோம். இதை இப்போதைக்கு விட்டுவிடுவோம்.
 
    அடுத்ததாக அறிவியலை அளவீடுசெய்ய என்னஎன்ன போல்மங்களை (models) தற்போதைய அறிவியல்மெய்யியல் பயன்படுத்துகிறது என்பதைக் குறிப்பிட்டார். உதாரணமாக சாரம்சவாதம்,வகைமைவாதம்,வாழ்வுக்குறிப்புவாதம்,வலைப்பின்னல்கள் (essentialist;typological,biographical,actor-network) என பல போல்மங்களின் மூலம் அறிவியல் வழமைகளை அணுகலாம் எனக்குறிப்பிட்டு 19 ஆம் நூற்றாண்டின் அறிவியல்xசமயம் எனும் எதிர்மறை வழக்கு எப்படி இருபதாம் நூற்றாண்டின் மெய்யியல் அணுகுமுறையில் தவிர்க்கப்படுகிறது என்று சுட்டினார். இந்த வழிப் பார்வைகளில் பல போதாமைகள் இருக்கின்றன. சிலவற்றை சுட்டிக்காட்டியும் மேலும் விவரிக்கச் சொல்லியும் அவையினர் நாங்கள் கேட்க விவாதம் வளர்ந்தது.
     
    பிறகு தான் அறிபுனைகளை மிக முக்கியமானவைகளைக் கருதுவதாகவும் அவைகளின் பின்புலத்தில் தாம் சமயம் அறிவியல் குறித்த முக்கிய இடையூடுகளைக் காண்பதாகவும் சொன்னார். இவ்விடத்தில் அவருடைய புத்தகமான Apocalyptic AI படித்தவர்களுக்கு அவர் சொல்லவந்தது எளிதாக விளங்கியது. அதில் அவர் குறிப்பிடும்  ஆர்த்தர் க்ளார்க், வெர்னர் விஞ்ச், வில்லியம் கிப்ஸன், சார்ல்ஸ் ஸ்ட்ரோஸ் ஆகியோரின் எழுத்துகளையே மீண்டும் நினைவு கூர்ந்தார். யூத/கிருத்துவ மதத்தின் சில முக்கிய கருத்துருக்களான மானுடத்தின் போதாமை, கீழ்மை, எதிர்வரும் பேரழிவு,மீட்பர் தோற்றம், பிறகான சொர்க்கமாகும் உலகு என பலவற்றையும் தான் குறிப்பிடும் அறிபுனைகள் முன்வைப்பதாகவும் அவற்றை உள்வாங்கிய ரோபாடிக்ஸ் போன்ற அறிவியல்ப்புலங்கள் மானுடநினைவுகளை,எண்ணங்களை,உணர்வுகளை முழுவதுமாக இயந்திர ஞாபகவட்டுக்களுக்கு மாற்றம் செய்வதை குறிக்கோளாகக் கொண்டுள்ளதாகவும் இவை மானுடத்தின் சாகாவரம் கோரும் ஒரு நிலைபாட்டின் செயல்பாடே என்றும் சொன்னார். இதுவும் அவருடைய முந்தைய புத்தகத்தின் ஒரு இழை என்பதாகவே இருந்தது. இவ்விடத்தில் அவர் இக்கருத்துருக்களை முன்வைக்க நான் அவர் தேர்ந்த கதைகளில் ஏன் ப்ரான்க் ஹெர்பர்ட்டின் ட்யூன் (dune) புத்தகங்கள், ஹார்லன் எலிசன், மெக்காப்ரே போன்றோரின்  சிறுகதைகள் இல்லை எனக் கேட்டேன். முக்கியமாக ட்யூன்னின் ஆறு புத்தகங்களும் இறையியல்,அறிவியல்,சமயம்,அறிவியங்கியல் என பல பரிமாணங்களில் அவருடைய கருத்துகளைப் பேசும் புனைவுதானே என்று கேட்டேன். ட்யூன் ஒரு அதிமுக்கியமான புத்தகம் என்று சொல்லி சமாளித்தார். கொஞ்சநேர விவாதத்துக்குப்பின் தான் முதல் 3 புத்தகங்களை மட்டும் படித்ததாகச் சொன்னார். சரி என்று அடுத்த விவாதத்துக்கு தாவிவிட்டோம்.
  மேலைச் சமுதாயத்தின் எந்திரம்x மானுடம், மனதுx மூளை, சைபருலகு xபொருண்மையுலகு எனும் இருமை நிலையும் அதன் பின் தொடர் கருத்து/செயல் முறைகளால் கட்டமைக்கப்படும் பொறிகளும் வாழ்முறையும் முன்குறிப்பிட்ட யூத/கிருத்துவச் சிந்தனைகளின் முன்னெடுப்பே என்பதை விளக்க முனைந்தார். இதில் ஹான்ஸ் மோரவெச், ரே குர்ஸ்வைல் போன்றோரின் கருத்துகள் எப்படி இச்சமய கருத்துருவங்களின் நடமாடும் நிழல்கள் என்றும் விளக்கினார். இவற்றில் ஏற்கவும் மறுக்கவும் இருந்தாலும் அடுத்த புள்ளிக்கு விவாதம் தொடர்ந்தது.
 
 இப்படி உரை என்பது ஒரு கலந்துரையாடல் போல மாறிவிட்டதால் அவரை தொடர்ந்து பேசச்சொன்னோம். பிறகுதான் தலைப்பின் முக்கிய இழையான இந்தியாவில் தொழில்நுட்பத்தில் சமயவழக்குகள் பற்றி பேசத்துவங்கினார். தான் இங்கே தங்கியிருந்த சில மாதங்களில் சுமார் 150 அறிவியலாளர்களுடன் பேசியதாகவும் அவர்களின் சமயநம்பிக்கைகள் வழக்குகள் அறிவியல் செய்முறைபற்றி விவாதித்ததாகவும் தம் சாரம்சம் இது என்றும் சில புள்ளிகளைக் கூறினார். அதற்காக எப்படி ஆயுத பூஜை தொழிற்கூடங்கள், கல்வி, ஆய்வு நிறுவனங்கள் என பல இடங்களிலும் கொண்டாடப்படுகிறது, அதை எப்படி மதநம்பிக்கையற்ற ஆய்வாளர்களும் ஏற்றுக்கொள்கிறார்கள் அதில் சிலர் கருவிகளை செப்பனிட அவகாசம் எனும் வகையில் கொண்டாட்டத்தை பயன்படு வகையில் பார்க்கிறார்கள் என விளக்கினார். இவ்விடத்தில் அவையில் இருந்த பல இளைய ஆய்வாளர்களும் காரசாரமாக விவாதத்தில் உள்ளே நுழைந்தனர். இப்படி பல சமூகக் காரணிகளை உள்கொண்ட சடங்கை எப்படி அறிவியல் செயல்பாட்டுக்குள் கொணர முடியும் என விவாதம் பொறிபறந்தது. பல இடங்களில் தன் கருத்துகளின் போதாமையை கெராச்சி ஒத்துக்கொண்டார்.
  பிறகு கேள்விநேரத்திலும் பலமுனைத் தாக்குதல்தான். ஏறக்குறைய grilling என்று சொல்லக்கூடிய அளவு. ஆனாலும் ஒரு நல்ல விவாதமாலை என்பதை மறுக்கமுடியாது.
இன்னும் இதைப்பற்றி எழுத ஏராளம் உண்டு. ஆனால் அவருடைய முந்தைய புத்தகத்தைப் படித்தால் அதிலுள்ளபலவற்றையும் விளக்கியே இந்த உரையும் பெரும்பாலும் இருந்தது என உணரலாம்.  நீளம் கருதி இத்தோடு நிறுத்திக்கொள்கிறேன்

இனி எனது கருத்துகள் சில
1. அறிவியல் தொழில் நுட்பம் இன்று நம் வாழ்வின் எல்லாக்கூறுகளிலும் யாராலும் தப்ப இயலாதவாறு நுழைந்துவிட்டதால் அறிவியல் வல்லுனர்களைத் தவிர சமுதாயத்தின் பிரதிநிதிகள் யாவரும் அறிவியல் பற்றிய விவாதங்களில் பங்குபெறுவது தவிர்க்க இயலாததாகிறது.
2. இன்றைய அறிவுப் புலங்களில் அறிவியல் மட்டுமே 'உண்மைக்கு' இன்று ஏகபோக பொறுப்பேற்றுக்கொண்டுள்ளதால் மெய்யியல் போன்றவை தம்மை நிலைநெகிழ்ந்து அறிவியலை அணுகவேண்டிய தேவை இருக்கிறது.
3. அறிவியலில் 'அறிவுத்தோற்ற செயல்பாடு' நடப்பது எப்படி என்பதை ஆராய சமூகவியல் மானுடவியல் வல்லுனர்கள் முனைந்ததில் கடந்த அரை நூற்றாண்டுகாலமாகவே ஏறக்குறைய பேட்டைச் சண்டையே நடந்து கொண்டிருக்கிறது. திரும்பத் திரும்ப கறாரான அறிவியல் /பொறியியல் கற்காதவர்களின் போதாமை இத்தகைய விவாதங்களின் போது தெளிவாகவே வெளிக்கிடுகிறது. இதை கெராச்சியே ஒப்புக்கொண்டார். தெளிவாகசொல்லக் கோரியபோது ஒரு முறை 'in our area we tolerate a lot of hot air' என்று சிரித்தார். இயல்பியல் விவாதங்களில் சிலர் எரிச்சலுடன்  'that is a lot of hand waving' என்று பழிக்கும் வாதங்கள் கூட பல சமூகவியல் வாதங்களை ஒப்பு நோக்க எவ்வளவு கறாரானவை என்று வெளிப்படையாகத் தெரிகிறது.
4. ஆக்டர்-நெட்வொர்க் தியரி எனும் வலைப்பின்னல் கோட்பாடு ஒரு போல்மமாக இப்போது நிறைய பயன்படுத்தப் படுகிறது. அறிவியல் செயல்பாட்டை ஆய்வுசெய்ய இதை சமூகவியலாளர் பயன்படுத்துவது அதிகரித்து வருகிறது. இதன் போதாமைகளை விரிவாக எழுதவும் நிறைய இருக்கிறது.
5. தன்னை ஒரு அக்னாஸ்டிக் என அழைத்துக்கொண்ட கெராச்சி யூதர்கள் எதையும் நம்பவேண்டியதில்லை என்றும் நம்பிக்கைவேறு பழக்கவழக்கங்கள் வேறு என்றெல்லாம் சொல்லி தனக்கு ஒருவர் மதநம்பிக்கையாளரா இல்லையா என்பது ஒரு பொருட்டில்லை என்றும் அவர்கள் என்ன செய்கிறார்கள் என்பதே முக்கியம் என்றும் கூறினார். அப்புறம் எப்படி இவர்போடும் நெட்வொர்க்கைவைத்து கருத்துச் சொல்லமுடியும் என்று கேட்க நேரமில்லை. நாத்திகன் என்றே இருந்தாலும் கோவிலில் நெடுஞ்சாண்கிடையாக விழத் தயங்காத நம்மையெல்லாம் மேலை நாட்டவர்களால் அணுகவே இயலாது என்றே தோன்றியது.
 6 கடைசியாக ஒரு ஜாலியான புள்ளி. சிவபெருமானின் நடனவிளக்கத்தைச் சுட்டிக்காட்டப்போய்  கிருபானந்த வாரியாருக்கு அடுத்தபடி அறுபத்தி ஐந்தாவது நாயன்மாராகவே ஆக்கப் பட்ட கார்ல் சாகனின் நிலைமை இந்த கெராச்சிக்கும் இந்துத்துவவர்கள் கொடுத்தே விடுவார்களோ என அச்சமாக இருக்கிறது. ஆயுத பூஜையின் ஆக்டர் நெட்வர்க் போட்டு அதன்படி (ஒரு யூகம்தான். நிஜமென்று நம்பிவிடாதீர்கள்) அடுத்த ஆய்வுக்கட்டுரையோ புத்தகமோ வரும் போது கொண்டாங்களை எதிர்கொள்ள நாமும் தயார்செய்துகொள்ளலாம்.

Saturday, January 05, 2013

சற்று முன்பு ... உன்னதங்களை உதறிய முழுமை (satru munbu, nepv)



  சற்று முன்பு ... உன்னதங்களை உதறிய முழுமை



  "சற்று முன்பு பார்த்த மேகம் மாறிப் போக..."  நா. முத்துக்குமார்


  உன்னதம் எனும் பெரும் மண்ணாங்கட்டிச் சுமையை முதுகில் சுமந்து ஏறக்குறைய செங்குத்தான அறமலையை வாயில் நுரைதள்ள கலை தன் உச்சத்தை அடைய  ஓயாமல் ஏறிக்கொண்டிருக்கிறது. இப்படி ஒரு பிம்பத்தை கட்டி எழுப்புவதில் கலை படைப்பவர்களுக்கு பெரும் ஆர்வம் இருக்கிறது. ஒரு வியாபாரத் தந்திரம் எனும் அளவில் நாமும் இதை ஏற்றுக்கொள்ளலாம். ஆனால் கலையின் முழுமை என்றுமே இத்தகைய பெரும் திட்டங்களில் சிக்குவதில்லை. கணத்தில் தெறித்து ஓடும் ஒரு காட்டருவியின் நிகழ்லயமே அதன் பேரழகாக இருந்திருக்கிறது. பார்க்கலாம்.

 எப்போதாவது அரிதாகப் பார்க்கும் ஒரு தமிழ்த் திரைப்படத்திலும் ஏதாவது பிடித்தது போல வந்து விட்டால் நண்பர்களிடம் பத்துப்பேரிடமாவது சொல்லிவிடுவேன். அதிலும் ஒரு முழு பாடல் காட்சியே இதுபோல் அபாரமாக அமைந்துவிட்டால் எழுதியே வைத்துவிடவேன்டும்

     நீதானே என் பொன் வசந்தம் படத்தின் இப்பாடல் காட்சியமைப்பு எனக்கு மிகவும் பிடித்திருந்தது. படத்தின் இறுதிக்கட்டத்தில் வரும் நீண்டதொரு காட்சியடுக்கு இது.  (காட்சியடுக்கு- சீக்வன்ஸ்). கதை எல்லோருக்கும் தெரிந்திருக்கும். வருண் தன் கல்யாணத்துக்கு முந்தையநாள் மாலை  (இப்போதைய வழக்கப்படி) வரவேற்பு நிகழ்சியில் மேடையில் நாளைய மனைவியாகும் மணப்பெண், அப்பா அம்மாக்களுடன் நின்று கொண்டிருக்கிறான். அனைவரும்  வாழ்த்திக்கொண்டு இருக்கின்றனர். அப்போது உள்ளே நுழைகிறாள் நித்யா. இங்கே துவங்குகிறது சமீபத்திய தமிழ்ச்சினிமாவின் அருமையான காட்சியமைப்பு.

    வருணும் நித்யாவும் சிறுகுழந்தைகளாக இருந்தபோதிலிருந்து ஒன்றாக வளர்ந்து சண்டையிட்டுப் பிரிந்து பிரிந்து மீண்டும் சேரும் காதலர்கள். பெரும் பிரிவுக்குப்பின் ஒரு மாதம் முன்பு தன்னுடன் வருமாறு அழைக்கவந்த வருணை வைது நாம் சேர்ந்திருக்க படைக்கப்பட்டவர்கள் இல்லை என்று நித்யா திருப்பி அனுப்ப வருண் வீட்டுவிருப்பத்தின் படி ராதிகாவை மணக்க சம்மதிக்கிறான். இது முன்கதை.

  இப்பாடல்காட்சியமைப்பு மிகுந்த ஆற்றலைப்பொதித்து படமாக்கப்பட்டுள்ளது. அனேகமாக படத்தின் முழுக்கதையும் இங்கு சுட்டப்படுவதால் பாடல் அசாதாரணமானவீச்சையும் கொண்டுள்ளது ராஜாவின் சமீபத்தியக் கொடை இப்பாடல். அதை கௌதம் முழுக்கப் பயனாக்கி தன் கதையை எதோ உயரத்துக்கு கொண்டுசென்றுவிட்டார். திரைப்படத்தில் பாடல்காட்சிகள் கண்டிப்பாக இருக்கவேண்டும் அதுதான் நம் சினிமாவின் கதைகூறுமுறையின் இலச்சினை எனக்கருதுபவன் நான். பாட்டில்லாத தமிழ்ப்படத்தில் உட்காருவதையே நினைக்கமுடியாது எனக்கு.

        கல்யாண ஹாலில் நுழைந்து இருக்கைகளை நோக்கி நடக்கும் நித்யா வருணைப் பார்க்கும் கணத்தில் எந்தப் பின்னணி இசையுமின்றி திடீரென ஒரு பெண்குரலில்  "சற்றுமுன்பு பார்த்த மேகம் மாறிப் போக..." எனத்துவங்குகிறது பாடல். அடுத்த 14 நிமிடங்களுக்குத் தொடரும் இக்காட்சியடுக்கு தமிழ்த் திரையில் சமீப காலங்களில் வந்ததொரு மகத்தான ஒன்றாக எனக்குப் படுகிறது.

 இந்தப்பாடல் படத்தின் கதையாடலில் மிக வீரியமிக்க இடத்தில் வருகிறது.  அதேசமயம் இந்தப்பாட்டிலேயே வீரியமிக்க காட்சிகள் என இரண்டு உண்டு. அவற்றை மட்டும் எழுதுகிறேன். முழுப்பாடலையும் பற்றி எழுதவேன்டுமானால் மிகவும் நீண்டுவிடும். இன்னொரு முறை முயலலாம்.

 இந்த இரண்டு காட்சிகளிலும் சமந்தாவும் ஜீவாவும் மிக அருமையாக தம் பாத்திரத்தின் சாரத்தை முழுவதுமாக உள்வாங்கி நமக்குக் காட்டுகிறார்கள். அந்த இரண்டு காட்சிகள்:
(அ) நித்யா மணமக்களுக்கு வாழ்த்துச் சொல்ல மேடைக்கு வந்து நிற்கும் காட்சி.
(ஆ)  பாடல் முடியும்போது இறுதியாக நித்யா வருணிடமிருந்து விடைபெறும் காட்சி.

(அ) முதல்காட்சியைப் பார்ப்போம்.

(பின்னணியில்: நெஞ்சம் துடிப்பதும் மின்னல் அடிப்பதையும் சொல்
                ஒ ஹோ .. உன்னை பிரித்திட என்னை எரித்து நீ செல்)

     கூட்டத்தில் அமர்ந்திருந்த நித்யாவை ஜென்னி அழைத்துக்கொண்டு மேடைக்கு வருகிறாள். காட்சியில் நித்யாவும் வருணும் இரண்டே பேர். முழுஹாலும் காலி. மற்றவர்கள் யாரையும் காட்டவில்லை கௌதம். வர்ணம் தீட்டுகையில் ஒரு சிறுஇடத்தை எடுப்பாகக்காட்ட சுற்றிவர இருக்கும் பகுதியை சற்றே மங்கலாக தீட்டுவார்கள்.ஓவியர்களுக்குத் தெரியும். accenting.  இதே டெக்னிக் தான். மூன்று நான்கு பேரின் உணர்ச்சிகளின் விளையாட்டைக் காண்பிக்க வேண்டிய தொடர்ந்துவரும் பகுதிக்காக. கௌதம் நித்யா நடந்து வரும் காட்சியில் அவர்கள் இருவரைத்தான் காட்டுகிறார்.

("எல்லாமே பொய் என்று சொல்வாயா.. ஒ.ஹோ.")
வருணின் கையைக் குலுக்கி வாழ்த்துத் தெரிவிக்க தன் கையை நீட்டுகிறாள் நித்யா. திருமண வரவேற்பில் நாம் எல்லோரும் செய்யும் ஒரு சடங்குதான் இது. மேலும் வருண் அவள் தொட்டுப் பழகிய காதலன்தான்.தன் இயல்பாக, சடங்காகவும் கையை நீட்டுகிறாள். வருண் அதைப்பற்றி குலுக்கியிருந்தால் அது சடங்காகவும் அதனாலேயே அக்கணத்தின் இயல்பாகவுமே இருந்திருக்கும். அவன் அதைச்செய்யாமல் அவள் கையைத் தவிர்க்கிறான். ராதிகாவிடம் அவளை அறிமுகம் செய்ய, நீட்டிய கையைராதிகாவிற்கு திருப்புகிறாள் நித்யா.

   இயல்பாகவோ, சடங்காகவோ நடந்திருக்கக் கூடிய ஒன்று அது நடக்காமையால்அதன் இன்மையை பெருப்பித்து உணர்த்துகிறது.  வருணின் அம்மா நித்யாவை இழுத்து அருகில் புகைப்படத்துக்காக் நிறுத்துதல், வருணின் திணறல், அவன் அப்பா இதை கூர்ந்து கவனித்தல், அவசரமாக நித்யா ஜென்னியை விட்டு முன்னால் நகர்ந்து விரைதல் என இக்காட்சியடுக்கின் முழுமையும் இருபதே நொடிகளில் முடிந்து விடுகிறது. இந்த இருபது நொடிகளில் சமந்தாவின் நடிப்பு மிக உயர்தரம். மின்னல் போல் தெறிக்கும் ஆயிரம் உணர்ச்சிகளை அமைதியாக அலட்டல் இன்றி உள்ளிருந்து ஊற்றெடுக்கும் உணர்வோடு வெளிப்படுத்தியிருக்கும் இப்பெண் என்ன ஓர் அருமையான நடிகை.


(ஆ) இருவரும் காரில் ஒரு சுற்றுபோய்வந்து மீண்டும் வருணின் வீட்டுக்கே வருகிறார்கள்.

நித்யா இறுதியாக விடைபெற தன் கார் அருகில் சென்று " எனக்கு எல்லாமே நீயாதான் இருந்திருக்கே. எனக்கு என்னைத் தெரிவது போலவே உன்னையும் தெரியும். இதையும் சொல்லத்தான் வந்தேன்" என்கிறாள். "வேறறெதுவும் இல்லையா. இதைச் சொல்லவா வந்தே" என்று கேட்கும் வருணுக்கு அவள் பதில் சொல்வதில்லை. காரின் கதவைத் திறக்கத் திரும்புகிறாள். வருண் அவளை நெருங்கி அவள் தோளைத் தொட்டு நிறுத்துகிறான். தன் தோளின் மீதிருக்கும் அவன் கையைப் பற்றுகிறாள் அவள். அவன் அவள் கைவிரல்களை இணைத்து தன் முகத்தை கையை நோக்கி சற்றே இழுத்து, ஒரு கணம் தயங்கி முகத்தைத் திருப்பி கைகளை விடுவிக்கிறான். அந்த ஒரு கணத்தில் நித்யா அவன் முகத்தில் எதையோ தேடுகிறாள். வருண் அவளை விட்டு விலகித் திரும்புகிறான். மீண்டும் அவளை நோக்கி நகர்ந்து மிக நெருக்கமாக வருகிறான். நித்யா சடாரென விலகி கதவைத் திறந்து காரினுள் நுழைந்து கிளப்பிக்கொண்டு போய் விடுகிறாள். பாடல் "காலம் இன்று காதல் நெஞ்சைக்கீறிப் போக" என முடிகிறது.

 இந்த ஒரு காட்சியில் நித்யா வருண் இருவரின் முழு மனங்களும் தெளிவாக வெளிப்படுகின்றன. வருண் தான் எடுத்த முடிவை நினைத்துத் தடுமாறுகிறான். மீண்டும் நித்யாவைக் கண்டதில் இருந்து அவன் மனம் கூறுபட்டுச் சிதைந்து விட்டது. மீண்டும் மீண்டும் அவளிடமே இழுக்கப்படுகிறான்.

"நான் கல்யாணம் செய்யப்போறேன்" என்று வருண் நித்யாவிடம் சொன்ன கணத்திலிருந்து இந்த பாடல் முடிவுக்காட்சி வரை நித்யா அவனை இழந்துவிட்டதாகவே நினைக்கிறாள். நம்புகிறாள். அவள் அதை வைத்து அவனிடம் தன்னை மீண்டும் ஏற்றுக்கொள் என்று கேட்கவே இல்லை. அவன் அண்மை அவன் நேசம் அவன் காதல் இதுவே அவள் வேண்டியது. அது அவளுக்கு இல்லை என்பதே அவள் உணர்வு. அதனால் இன்னொருத்திக்குப் போகும் அவனை எவ்விதத்திலும் அவள் தனக்காக மீட்டுக்கொள்ள முயற்சி செய்யவில்லை. என்னை தவறாக புரிந்து கொள்ளாதே நான் மணப்பாடில் மறுத்ததற்கு என்னை வெறுக்காதே என்று சொல்லிச் செல்லவே முயல்கிறாள்.  இந்த மன வேறுபாடு இப்பாடல் காட்சியில் முழுமையாக வெளிப்படுத்தப்பட்டு இருக்கிறது.

    அந்த இறுதிக்கணத்தில் நித்யா தன் தேர்வை முடித்துக்கொண்டாள். அதற்குமேல் அவளுக்கு இந்த உறவில் கேட்கவோ வழங்கவோ ஏதுமில்லை. அதற்குப் பிறகு படத்தில்  வருவது வாழ்வு அவளுக்குக் கொடுத்தது. அது எப்படியும் முடிந்திருக்கலாம். வருணுடனோ இல்லாமலோ. அவன் அப்பா அவனைத் தூண்டாவிட்டால்  வருண் நித்யாவிடம் மீண்டு வரப்போவதில்லை. கதை எனக்கு இங்கேயே முடிந்தது. இவ்வளவே நான் ஒரு 'கலை'ப் படப்பிலிருந்து எதிர்பார்ப்பதும்.
     
    படம் நித்யாவையும் அருணையும் சேர்த்துவைக்கிறது. அந்த முடிவில் எனக்கு மிகவும் மகிழ்ச்சி. ஆனால் வாழ்வு அத்தகைய மகிழ்ச்சிகளை அனைவருக்கும் எப்போதும் அளிப்பதில்லை. அதைப்பற்றி எனக்கு கவலையுமில்லை. வாழ்வின் அநீதிகளை வாழ்ந்து யாரும் சரி செய்ய ஏலாது. அவை அப்படியேதான் இருக்கும். ஆனால் ஒவ்வொரு மனிதனுக்கும் அவனுடைய மானுடம் இருக்கிறது. அதை வாழும் ஒவ்வொருகணத்திலும் அவன் வெளிப்படுத்திக்கொண்டே இருக்கிறான். மானுடம் என்பது இந்த கணங்களில் வருவதுதான். இதற்கும் சமூகம் விரிக்கும் பிற சமய குழு அற பின்னல்களுக்கும் தொடர்பில்லை. இக்கணங்கள்தாம் இப்புவியில் மானுட வாழ்கை.  இக்கணங்கள் மானுடத்தின் உன்னதங்களல்ல.உச்சங்களல்ல. முழுமைகள்.